முட்டையில ஆம்லெட் போடலாம்; முட்டைக்கோஸ்ல ஆம்லெட் போட முடியுமா?
கோஸ்ல பொரியல் செய்யலாம்; குளுக்கோஸ்ல பொரியல் செய்ய முடியுமா?

‘‘ஆனாலும் தலைவருக்கு ரொம்பத்தான் பேராசைங்கறியே... ஏன்?’’
‘‘வெறும் நாலு லட்ச ரூபாய் ஊழல் பண்ணிட்டு,
விசாரிக்க வந்த உள்ளூர் போலீஸ்கிட்ட ‘இந்த கேஸை சி.பி.ஐ விசாரிக்காதா’ன்னு கேட்கறாரே...’’

ஓட்டல்ல இட்லி ஆர்டர் பண்ணலாம்; பூரி ஆர்டர் பண்ணலாம்; சப்பாத்தி ஆர்டர் பண்ணலாம்... ஆனா மணி ஆர்டர் பண்ண முடியாது!
- ஆர்டரை வைத்து தத்துவத் தேர்வெழுதி பார்டரில் பாஸ் செய்வோர் சங்கம்

‘‘கட்சி ஆபீஸ்ல
என்னய்யா கூட்டம்..?’’
‘‘மகளிரணித் தலைவிக்கு ‘செல்லப் பெயர்’ சூட்டறாங்களாம்..!’’

கோயிலுக்குப் போய், ‘‘இறைவா... எனக்கு படிப்பைக் கொடு, புத்தியைக் கொடு, கொஞ்சம் பொறுமையைக் கொடு’’ன்னு வேண்டலாம். ஆனா, ‘‘கொஞ்சம் கடன் கொடு’’ன்னு வேண்ட முடியுமா?

‘‘டாக்டர்! எனக்கு தினமும் தூக்கத்துல பேய் கனவா வருது...’’
‘‘கனவுதானே... அதுக்கு ஏன் பயப்படுறீங்க?’’
‘‘அதை ரெண்டு பேய் தொகுத்து வேற வழங்குதே டாக்டர்!’’

‘‘என் பையன் வேலைக்குப் போற பெண்ணைத்தான் கல்யாணம் பண்ணிப்பேன்னு சொல்றான்...’’
‘‘ஏன்..?’’
‘‘பின்னே... ரெண்டு பேருமே வேலைக்குப் போகலைன்னா, அப்புறம் எப்படி குடும்பம் நடத்த முடியும்?’’