சிம்ம வாகனத்தில்
அமர்ந்து அம்மன்
வீதியுலா செல்வதென்னவோ
டிராக்டர் வாகனத்தில்!
- பா.விஜயராமன்,

வாசலில் கோலம்
தாண்டிப் போகத் தயங்கும்
காற்று!

என்னோடு எப்போதுமிருக்கும்
உன் வெறுமையை
எதைக் கொண்டு நிரப்ப,
சூன்யத்தைத் தவிர!

நீ, நான் மற்றும் மழை
மழை மீதான உன் கோபங்கள்
எனக்குக் கவலையளிக்கின்றன
என் மீதான உன் காதலும்
மழை மீதான என் காதலுமே
அதற்குக் காரணிகள்
என்றறிகிறபோது
அதே மழையிலேயே
கவலைகள் கரைந்துவிடுகின்றன!

எதற்காக
சத்தியம் செய்கிறது,
எரியும் கற்பூரத்தை
அணைத்த காற்று!

புழுதி படிந்த
சாலையோரச் செடிகள்
பூக்கும்போது மட்டும்
யார் கண்ணிலாவது
பட்டு விடுகின்றன.