இந்தியாவின் கோடை வெப்பத்துக்கு நூற்றாண்டு வரலாறு உண்டு. பிரித்தானியர் நம்மை ஆண்டுகொண்டிருந்த 1900ம் ஆண்டுகளில் பழைய தில்லியில் கோடை வெப்பம் மக்களை காலரா வடிவில் வாட்டி வதைத்துக்கொண்டிருந்தது. மக்கள் வாந்தியாலும் பேதியாலும் மடிந்துகொண்டிருந்தார்கள். 

ஆங்கிலேய அரசு கையைப் பிசைந்துகொண்டிருந்தது. என்ன செய்யலாம் என்று நினைத்த அரசு அன்றைக்கு தில்லியில் இருந்த புகழ்பெற்ற முஸ்லிம் மருத்துவர் ஒருவரை அழைத்து, வாந்தி பேதியால் ஏற்படும் நீரிழப்பையும், அதனால் ஏற்படும் மரணங்களையும் தடுக்கமுடியுமா என்று ஆலோசனை கேட்டது.

அந்த மருத்துவரும் தன் மருத்துவ அனுபவத்தில் ஒரு பானத்தைத் தயாரித்துக் கொடுத்தார். அந்த பானத்தின் பெயர் ரூஹ் அஃப்சா (Rooh Hafza). ரூஹ் அஃப்சா பானம் காலராவின் தீவிரத்தைக் குறைத்ததோடு பின்வந்த காலங்களில் கோடை வெப்பத்தால் ஏற்படும் நீரிழப்பைத் தடுக்கும் பானமாகவும் பிரபலமலடைந்தது. 

காலங்கள் செல்லச் செல்ல சகலவிதமான விசேஷங்களிலும் அருந்தும் பானமாக ரூஹ் அஃப்சா களை கட்டியது. மக்களின் வரவேற்பை புரிந்துகொண்ட மருத்துவர், அரசு சம்மதத்துடன் அந்த பானத்தை பெரிய அளவுக்கு தயாரித்து வழங்கினார்.

‘சர்பத் பெயரில் சதி செய்யும் சில நிறுவனங்களால் மசூதிகளும், மதராசாக்களும்தான் வளரும்’ என்று அவர் பேசிய வீடியோ, மறைமுகமாக ரூஹ் அஃப்சாவை குறிவைக்க... இந்த வழக்கு தில்லி உயர்நீதிமன்றத்தையும் எட்டியது.

நீதிமன்றம் அந்த சாமியாரின் குறிப்பிட்ட அந்த வீடியோவை நீக்கச் சொல்லி தீர்ப்பு வழங்கவே இந்த பானம் இந்தியாவில் பேசுபொருளாக மாறியிருக்கிறது. சென்னையிலும் இந்த பானம் பல சூப்பர் மார்க்கட்டுகளிலும் மளிகைக் கடைகளிலும் கிடைக்கிறது.

இந்நிலையில் இந்த பானத்தின் வரலாறு, முக்கியத்துவம், பலன்கள் பற்றி அது தொடர்பான ஆர்வலர்களை பிடித்துப் பேசினோம். சென்னை அரும்பாக்கத்தில் உள்ள அரசு சித்தா மருத்துவமனையின் கீழ் வரும் யுனானி மருத்துவத் துறையின் மருத்துவரான ரிஸ்வான் உற்சாகமாக பேசத் தொடங்கினார்.

‘‘1904ம் ஆண்டு மற்றும் அதன் பிறகான காலத்தில் தில்லியில் காலரா பரவியதைத் தொடர்ந்து யுனானி மருத்துவம் மற்றும் பாரம்பரிய மருத்துவரான ஹக்கீம் ஹஃபீஸ் அப்துல் மஜீத் என்பவரை ஆங்கிலேய அரசு சந்தித்து அந்த நோயைக் கட்டுப்படுத்தக் கேட்டுக்கொண்டது.

மஜீத்தும் தன் மருத்துவ அனுபவத்தைக் கொண்டு இந்த சிரப்பைஉருவாக்கினார். அந்த இனிப்பு சிரப் இயற்கையான மருத்துவ மூலிகைகள், பழங்கள், பூக்கள் மற்றும் காய்களில் இருந்து தயாரிக்கப்பட்டது. 

காலராவால் பாதிக்கப்படுபவர்கள் வாந்தி மற்றும் பேதியால் பெரும் நீரிழப்புக்கு உள்ளாவார்கள். இந்த நீரிழப்பைப் போக்குவதற்கே இந்த பானத்தை மஜீத் கண்டுபிடித்தார். ஆனால், போகப் போக கோடை வெப்பத்தாலும் நீரிழப்பு ஏற்படவே இந்த பானத்தின் தேவையும் பயன்பாடும் பிறகான காலத்திலும் உணரப்பட்டது.

ஒரிஜினல் பானம் 750 மில்லி லிட்டரில் அதாவது முக்கால் லிட்டரில் விற்பனைக்கு கிடைக்கிறது. போலிகளை கண்டுபிடிக்க இந்த ஒரிஜினல் பானத்தின் மூடியில் ‘ஹம்டார்ட்’ என்ற எழுத்துக்கள் பதிக்கப்பட்டுள்ளன. 

இந்த பானத்தின் பாட்டில்களில் பானத்தில் என்ன வகையான பொருட்கள் இருக்கிறது என்ற குறிப்பும் இருக்கிறது. உதாரணமாக இந்த இனிப்பு சிரப்பில் மல்லி, கசகசா, ரோஜா, காசினி கீரை, புதினா, கேரட், திராட்சை, தாழம்பூ, அன்னாசி, ஆரஞ்சு போன்ற இன்னும் சில உணவுப் பொருட்கள் இருப்பதாக குறிப்பு உள்ளது.