வரலாறு காணாத பேரழிவைச் சந்தித்திருக்கிறது கேரள மாநிலத்திலுள்ள வயநாடு. இதுகுறித்து பேசும் ‘பூவுலகின் நண்பர்கள்’ அமைப்பின் சூழலியல் பொறியாளர் பிரபாகரன் வீரஅரசு, ‘‘இத்துயர நிகழ்வை இயற்கைப் பேரிடர் என இயற்கையின் மீது பழிபோட்டு நாம் எளிதில் கடந்துவிடக் கூடாது. 

இந்நூற்றாண்டில் நாம் எதிர்கொள்ளும் ஒவ்வொரு இயற்கைச் சீற்றத்திற்கும் மனித செயல்பாடுகளே அடிப்படைக் காரணம்...’’ என வருத்தம் பொங்க சொல்பவர், இப்பேரழிவில் இருந்து கற்றுக்கொண்டு தமிழ்நாடு அரசு உடனடியாகச் செய்யவேண்டிய விஷயங்கள் குறித்தும் பகிர்ந்தார்.

‘‘வயநாடு மாவட்டத்தில் தற்போது நிலச்சரிவு ஏற்பட்டுள்ள வைத்திரி தாலுகாவிற்கு உட்பட்ட பகுதிகளில் இப்படி ஒரு விபத்து நடக்கும் என்பதை பல ஆய்வாளர்களும் தொடர்ச்சியாக எச்சரித்து வந்தனர்.கடந்த ஜூன் 2018ம் ஆண்டு கோழிக்கோடு, கண்ணூர், வயநாட்டில் ஏற்பட்ட நிலச்சரிவு தொடர்பாக இந்திய புவியியல் ஆய்வு நிறுவனம் அங்கு ஓர் ஆய்வை மேற்கொண்டது. 

அதில், நிலச்சரிவு ஏற்பட பெருமழை ஒரு காரணம் என்றாலும், பல இடங்களில் அறிவியல்பூர்வமற்ற வகையில் மலைச்சரிவுகளில் கட்டப்பட்ட கட்டடங்களும் முக்கியக் காரணம் என்றது.

குறிப்பாக இயற்கையாக அமைந்த மலைச்சரிவுகள் மற்றும் மலைமுகடுகளைத் தோண்டி பிளந்து கட்டடங்களை எழுப்பியதால் அப்பகுதியின் நில அமைப்பே மாறிவிட்டதாகக் குறிப்பிட்டது.

இதற்கிடையே வயநாடு கல்பெட்டாவைச் சேர்ந்த ‘Hume Centre for Ecology and Wildlife Biology’ சுற்றுச்சூழல் நிறுவனம், 2018ம் ஆண்டு மேற்கொண்ட ஆய்வில், வயநாட்டின் தென்மேற்குப் பகுதியில் ஏற்பட்ட நிலச்சரிவுகளில் 90 சதவீத நிலச்சரிவுகள், மலைச்சரிவு 30 டிகிரியாக இருந்த இடங்களில் நிகழ்ந்துள்ளதாகத் தெரிவித்தது. 

இதேபோன்று மலைச்சரிவு 30 டிகிரியாக உள்ள இடங்கள் தமிழகத்தில் உள்ள மேற்குத் தொடர்ச்சி மலைப் பகுதிகளிலும் இருக்கலாம். அதனால், இனி நிலம் வலுவிழப்பதைக் காடுகள் அழிப்புடனும், நிலச்சரிவைப் பெருமழையுடனும், பெருமழையைக் காலநிலை மாற்றத்துடனும் தொடர்புபடுத்திப் பார்க்க நாம் தவறினால் இப்பேரழிவுகளைத் தடுக்க முடியாது.

தமிழ்நாடு அரசு இதனை ஒரு பாடமாக எடுத்துக்கொண்டு ஊட்டி, கொடைக்கானல், கோத்தகிரி, குன்னூர், வால்பாறை ஆகிய பகுதிகளில் தொடர்ந்து நிலச்சரிவு ஏற்படுவதைக் கவனத்தில் கொள்ள வேண்டும்...’’ என்கிறவர், செய்ய வேண்டிய பணிகளைப் பட்டியலிட்டார். 

‘‘முதலாவதாக மாதவ் காட்கில் தலைமையிலான (WGEEP) அறிக்கையில், சூழல் கூர் உணர்வு மண்டலங்களாக தமிழ்நாட்டில் அடையாளம் காணப்பட்ட பகுதிகளும், நிலச்சரிவுகள் ஏற்பட வாய்ப்புள்ள பகுதிகளும் கண்டறிப்பட்டுள்ளன. இதில் நீலகிரி, கொடைக்கானல் உள்ளிட்ட பகுதிகள் முக்கியமானவை.

மூன்றாவதாக ஆண்டுதோறும் உதகையில் நடைபெறும் மலர்க் கண்காட்சியை மேட்டுப்பாளையம் அல்லது பொள்ளாச்சிக்கு மாற்ற வேண்டும். சுமார் 30 ஆண்டுகளுக்கு முன்னர் உதகையை சுற்றுலாத்தலமாக பிரபலப்படுத்த இத்தகைய விழாக்கள் தேவைப்பட்டன.

இப்போது விடுமுறை தினங்களிலேயே பல லட்சக்கணக்கான மக்கள் உதகையில் கூடுகின்றனர். இது அம்மலைக்கு மிகப்பெரிய அழுத்தமாக அமைகிறது. இந்தாண்டு ஏப்ரலில் ஊட்டி,கொடைக்கானல் பகுதிகளில் அதிகளவு கூட்டத்தால் தமிழக அரசு இ-பாஸ் நடைமுறையைப் பின்பற்றும் நிலைக்குச் சென்றது.