மீண்டும் பிரசாந்த்!

மகன் உயர வேண்டும் என்பதற்காகவே தன் வாழ்நாளை செலவிடுபவர் நடிகரும் இயக்குநருமான தியாகராஜன். இவரது மகன் பிரசாந்த் இளம் நாயகனாக அறிமுகமாகி சரசரவென உச்சத்துக்கு சென்று ‘டாப் ஸ்டார்’ ஆக உயர்ந்தார். ஓர் இடைவெளிக்குப் பிறகு ‘அந்தகன்’ வழியாக பிரசாந்த் கம் பேக் தருகிறார். இப்படத்தை இயக்கியிருக்கும் தியாகராஜனை சந்தித்தோம்.

இந்தி ‘அந்தாதூன்’ எப்படி ‘அந்தகன்’ ஆக மாறுச்சு?

‘அந்தாதூன்’ இந்தியில் மிகப் பெரிய வெற்றிப் படம். 1000 தியேட்டர்களில் வெளியாகி பெரிய  வசூலாச்சு. மொழி தெரிய லைன்னாலும் சீனாவில் சுமார் 4000 தியேட்டர்களில் வெளியாகி 700 மில்லியன் டாலர் கலெக்‌ஷன் பண்ணுச்சு. 3 தேசிய விருதுகளை தட்டித் தூக்குச்சுஅந்தப் படத்தை பிரசாந்த் ஐதராபாத்தில் பார்த்துவிட்டு புகழ்ந்து பேசினார். நானும் மும்பையில் படம் பார்த்தேன். அது பியாேனா வாசிப்பவரின் கதை. பிரசாந்துக்கு பியானோவை அற்புதமா வாசிக்கத் தெரியும். அதனால் அந்தக் கதை அவருக்கு பொருத்தமாக இருக்கும்னு நினைச்சேன்.

அதுமட்டுமல்ல, லேடி கெட்டப்ல நடிச்ச ‘ஆணழகன்’, ஹாரர் படமான ‘ஷாக்’ என பல டிரெண்ட் செட்டிங் படங்கள் பண்ணியவர். ‘அந்தாதூன்’ படம் பார்த்ததும் பிரசாந்துக்காகவே ஏன் வாங்கிப் பண்ணக்கூடாதுன்னு ரைட்ஸ் வாங்க முயற்சித்தேன்.ஆனால், பெரிய போட்டியே இருந்துச்சு. பிரபல இயக்குநர்கள், நடிகர்கள் அந்தப் படத்தோட ரைட்ஸ் ரேஸ்ல இருந்தாங்க. அதிக விலை கொடுத்து நான் வாங்கினேன்.

அது நேர்த்தியான, நிறைய டுவிஸ்டுள்ள படம். ரசிகர்களை என்கேஜ்டாக வெச்சிருக்கும். எங்களிடம் ரைட்ஸ் இருப்பதை கேள்விப்பட்ட பிரபல தமிழ் இயக்குநர்கள், நடிகர்கள் நாங்கள் பண்ணுகிறோம் என்று  கூட அப்ரோச் பண்ணினார்கள்.

தமிழுக்காக என்னென்ன மாற்றங்கள் செய்தீர்கள்?

ரீமேக் படத்தோட வெற்றி என்பது ஒரிஜினல் ஸ்டோரியைக் கெடுக்காம பண்ணுவதில்தான் அடங்கியிருக்கு. பார்வை இல்லாதவராக நடிப்பது சவால். அதுக்காகவே பிரசாந்த் பெரியளவில் பயிற்சி  எடுத்துக்கிட்டார். கதைக்களம், திரைக்கதையை கெடுக்காம எப்படி செய்யலாம் என்று பார்க்கும்போது காஸ்டிங் முக்கியம். அப்படி சின்னச் சின்ன கேரக்டர்களுக்குக் கூட பெரிய நடிகர்களை உள்ளே கொண்டு வந்தோம்.