சும்மா வாட்டமா இருக்குறியே வாட்டர் பாக்கெட் மூஞ்சி!

‘சன் பிக்சர்ஸ்’ தயாரிப்பில் தனுஷ் இயக்கி நடித்த ‘ராயன்’ ப்ளாக் பஸ்டர் படமாக வசூல் சாதனை நிகழ்த்திக் கொண்டிருக்கிறது. இதற்கு ஈடாக ஏ.ஆர்.ரஹ்மான் இசையமைத்துள்ள இப்படத்தின் பாடல்கள் வேற லெவல் என்பதோடு செம வைரல். சந்தோஷ் நாராயணன், ஸ்வேதா மேனன் பாடிய ‘வாட்டர் பாக்கெட்...’ பாடல் பட்டி தொட்டி எங்கும் பட்டையைக் கிளப்பிக் கொண்டிருக்கிறது. இந்தப் பாடலை எழுதியவர் கானா பாடகர் கானா காதர். திரையில் இதுதான் இவருக்கு முதல் பாடல்!

கானா காதர் - அறிமுகம் ப்ளீஸ்?

பிறந்தது, வளர்ந்தது எல்லாமே சென்னைல. குழந்தையாக இருக்கும்போதே அப்பா, அம்மாவை இழந்துவிட்டேன். என்னையும் என் சகோதரர்களையும்  பாட்டிதான் வளர்த்தார்.
குடும்ப சூழ்நிலை காரணமாக எட்டாம் வகுப்புக்கு மேல் படிப்பைத் தொடர முடியவில்லை. நடைபாதை செருப்புக் கடையில் ஐம்பது ரூபாய் சம்பளத்தில் வாழ்க்கை ஆரம்பிச்சது. ஒரு வேளை உணவுக்கு கஷ்டப்பட்ட காலங்களையும் கடந்து வந்துள்ளேன். இப்போது எனக்கு திருமணமாகி இரண்டு மகள்கள் இருக்கிறார்கள். பெயிண்ட் வேலைக்கு சென்றுதான் குடும்பத்தை நடத்துகிறேன்.

பிரபல கானா பாடகர்கள் பழனி, புண்ணியர், அந்தோணி ஆகியோரை சிறுவயதிலிருந்து கேட்டு வளர்ந்தவன் நான். விளைவு... வீட்ல இருக்கிற தட்டு முட்டு சாமான்களை கையிலெடுத்து நானே சொந்தமாக கானா பாடல்கள் பாட ஆரம்பிச்சேன். புகழ் பெற்ற கானா பாடகர் டோலக் ஜெகன் எனக்கு முதன் முறையாக ஒரு வாய்ப்பு கொடுத்தார். அது ஒரு சாவு வீடு. தொடர்ந்து பல நிகழ்ச்சிகளில் பாட வாய்ப்பு கிடைச்சது.ஒரு கட்டத்தில் ஃபிரெண்ட்ஸ், அம்மா, தல - தளபதி என தனிப் பாடல்கள் பாட ஆரம்பிச்சேன். அந்தப் பாடல்கள் பல மில்லியன் பார்வையாளர்களைச் சென்றடைந்தது.

சினிமா மீது ஆர்வம் எப்படி?

சினிமாவில் நடிகராக வேண்டும் என்பதுதான் என்னுடைய ஆசை. கெளதம் கார்த்திக் நடித்துள்ள ‘சிப்பாய்’ படத்தில் எனக்கு முக்கியமான ரோல் கொடுத்தார்கள். ‘சிலம்பாட்டம்’ சரவணன் இயக்கியுள்ள படம் அது. அந்தப் படம் இன்னும் வெளியாகவில்லை. தொடர்ந்து பல கம்பெனிகளில் வாய்ப்பு தேடி அலைந்தேன். எதுவும் ஒர்க் அவுட்டாகவில்லை. கானா கச்சேரி, கூலி வேலை என மறுபடியும் பழைய வாழ்க்கையை தொடர ஆரம்பிச்சேன்.