தமிழக சட்டமன்றத்தில் நிதிநிலை அறிக்கையை சமர்ப்பித்தபின், நிதியமைச்சர் தங்கம் தென்னரசு தனது உரையில் குறிப்பிட்ட ஒரு விஷயம் தேசிய அளவில் பேசு பொருளாகி உள்ளது.

அதுபோல, இப்போது முசிறியிலும் அகழாய்வைத் தொடங்க தமிழக அரசு முடிவு செய்துள்ளது. தமிழ் ஆர்வலர்களிடையே இப்பணி மகிழ்ச்சியை ஏற்படுத்தியுள்ளது. பின்னே... அடுத்த மாநிலத்தில் நடக்கவிருக்கும் அகழாய்வுப் பணியை தமிழகம் அல்லவா மேற்கொள்ளப் போகிறது?!சரி... முசிறி அகழாய்வு தமிழகத்துக்கு அந்தளவு முக்கியமானதா?

கேரளாவின் பழங்காலத்தை, அதாவது பண்டைய சேர நாட்டின் வரலாற்றைத் தெரிந்துகொள்வதற்கான முதன்மை ஆதாரமாக இரண்டாயிரம் ஆண்டுகள் பழமையான சங்க இலக்கியமே திகழ்கிறது. உலகின் செல்வாக்கு மிக்க வணிக வழித்தடங்களில் ஒன்றாகவும், சேர நாட்டின் பிரபல துறைமுகப் பட்டணமாகவும் முசிறி இருந்ததாக சங்க இலக்கிய குறிப்புகள் குறிப்பிடுகின்றன.

சங்க இலக்கியச் சான்றுகள் படி, கொச்சிக்கு வடக்கே 25 கிமீ தொலைவில் இருக்கும் கொடுங்கல்லூர் எனும் ஊரே பண்டைய முசிறி எனும் யூகம் வரலாற்று ஆய்வாளர்களிடையே இருந்து வந்தது. கொடுங்கல்லூருக்கு அருகே உள்ள பட்டணம் எனும் சிறு கிராமத்தில் மணலுக்கடியில் பழங்கால பானை ஓடுகள், வெளிநாட்டு நாணயங்கள், சிறு சிறு மிளிரும் கற்கள் போன்றவற்றை அப்பகுதி மக்கள் அவ்வப்போது கண்டெடுத்து வந்தனர். 

இதனையடுத்து, கேரள வரலாற்று ஆய்வு நிறுவனம் 2007ம் ஆண்டு பட்டணத்தில் அகழாய்வைத் தொடங்கியது.இந்த அகழாய்வில் பட்டணத்தில் ஒரு கடல்சார் வணிக நகரம் இருந்ததற்கான தரவுகள் கிடைக்கத் தொடங்கின. தங்க ஆபரணங்கள், கண்ணாடி மணிகள், சேர மன்னர்கள் கால

அக்காலத்தில் இந்த துறைமுகத்தில் இருந்துதான் வாசனைத் திரவியங்கள், ரத்தினங்கள், யானைத் தந்தம், பட்டு போன்றவை வர்த்தகம் செய்யப்பட்டுள்ளன.இது தொடர்பாக இந்த அகழாய்வை மேற்கொண்ட செரியன், “பட்டணம் நகரம் பல்வேறு நாடுகளில் இருந்து வந்தவர்களுக்கு ஒரு நுழைவாயிலாக இருந்தது என்று நம்புகிறோம். 

எங்களுக்கு கிடைத்த எலும்புத் துண்டுகளை டிஎன்ஏ சோதனைக்கு உட்படுத்தியபோது, அவை மேற்கு மற்றும் தெற்கு ஆசியப் பகுதி, மற்றும் ஐரோப்பியப் பகுதியில் இருந்து வந்தவர்களின் எலும்புகள் என்பதைக் கண்டறிந்தோம்.

இரும்புக் காலம் முடிந்து, வரலாற்றுக்கு முந்தைய காலத்தில், இந்தியாவின் மேற்கில் உள்ள அரேபிய நாடுகள் மற்றும் சீனா போன்ற நாடுகளில் இருந்து வரும் வணிகர்கள், பட்டணம் நகரத்தில் வாணிபம் செய்ததற்கு அடையாளமாக பல வெளிநாட்டு ரத்தினக் கற்களும் முசிறி அகழாய்வில் கிடைத்தன. இப்படியாக இதுவரை 146 நாணயங்களைக் கண்டறிந்தோம். விதவிதமான குடுவைகளும் கிடைத்தன. 

அந்த குடுவைகளைக் கூர்ந்து நோக்கியபோது, வெளிநாடுகளில் இருந்து வந்தவர்கள் கொண்டுவந்த குடுவைகள் அவை என்று தெரிந்தது. அதற்கு சாட்சியாக மேல்பகுதியில் ஒவ்வொரு நாட்டின் பிரத்தியேக அலங்கார வேலைப்பாடுகள் தெரிந்தன. அதேபோல படகுகளைக் கட்டி வைப்பதற்கான இரும்புக் கம்பிகள் கிடைத்தன...” என்கிறார்.

இன்னும் சில வரலாற்றாசிரியர்கள், 1341ல் பெரியாற்றில் ஏற்பட்ட வெள்ளத்தால் இந்நகரம் அழிந்துவிட்டது என்கிறார்கள்.

இதனிடையே ஒவ்வொரு ஆண்டும் அகழாய்வின் முடிவுகள் வெளியிடப்பட்டபோது மலையாள ஊடகங்கள் அதிக முக்கியத்துவத்துடன் அவற்றை விவாதித்து வந்தன. மலையாள அறிவுலகினர் மத்தியில் சங்க இலக்கியப் பாடல்கள் அதிக கவனம்பெறத் தொடங்கின. தமிழகத்தில் கீழடி, அழகன்குளம் போன்ற இடங்களில் எடுக்கப்பட்ட தொல்லியல் பொருட்களுக்கும், பட்டணத்தில் எடுக்கப்பட்ட பொருட்களுக்கும் ஒற்றுமை இருந்ததும் இதற்குக் காரணம்.

பட்டணம் அகழாய்வில் கிடைத்த பொருட்களைக் கொண்டு பள்ளி மாணவர்களுக்காக அருங்காட்சியகம் ஒன்றை கேரள வரலாற்று ஆராய்ச்சி நிறுவனம் ஏற்படுத்தியிருக்கிறது. இங்கு காட்சிக்கு வைக்கப்பட்டிருக்கும் தொல்லியல் பொருட்கள் குறித்து விளக்கம் அளிப்பதற்கு வழிகாட்டி ஒருவரும் நியமிக்கப்பட்டிருக்கிறார்.

இதனிடையே, கீழடி போலவே முசிறி பட்டண அகழாய்வு முடிவுகளும் சிலருக்கு எரிச்சலைத் தந்தது. குறிப்பாக கேரளத்தின் வரலாற்று மூலத்தை சங்க இலக்கியத்தில் தேடுவது என்பதை, ‘பரசுராமன் கோடாலியை எறிந்து கேரளத்தை உருவாக்கியதாக’ தொன்ம கதை கூறுபவர்கள் விரும்பவில்லை.