தமிழ் சினிமா பல்வேறு குழந்தை நட்சத்திரங்களை அறிமுகப்படுத்தி இருக்கிறது. அவர்களில் சிலர் பின்நாட்களில் பெரிய நட்சத்திரங்களாகவும் ஜொலித்துள்ளனர்.அந்த வகையில் தமிழ்சினிமாவுக்கு குழந்தை நட்சத்திரமாக சமீபத்திய வரவு கணேஷா ஷ்யாம். 

‘7ஜி’ திரைப்படம், ‘தாத்தா’ குறும்படம் போன்றவற்றில் நடித்துள்ள இவர், தற்போது சூப்பர் ஸ்டார் ரஜினிகாந்த் நடிக்கும் ‘வேட்டையன்’ படத்தில் நடித்து வருகிறார். கூடவே பல்வேறு விளம்பரப் படங்களிலும் கலக்குகிறார்.

‘‘டிவிஎஸ் எக்ஸ்எல் 100 விளம்பரத்துல என்னைப் பார்த்திருக்கிறீங்களா அங்கிள்? அதுல நம்ம தோனி அங்கிள் கூட நடிச்சிருக்கேன். அவர் கிரவுண்ட்ல இருந்து வர்றப்ப, ‘அங்கிள்’னு கத்துவேனே... அது நான்தான். அவர் என் தலையில் கை வச்சிட்டு போவார்...’’ என கீச்சுக் குரலில் சொல்லும் கணேஷா ஷ்யாம், அந்த விளம்பரப் படத்தை தன் அப்பாவின் செல்போனில் போட்டு நமக்குக் காண்பித்து பூரிக்கிறார். 

 ‘‘எங்களுக்குப் பூர்வீகம் காசர்கோடு. என் மனைவி பெயர் ரெஜிதா. 2017ல் மகன் கணேஷா ஷ்யாம் பிறந்தான். ஆரம்பத்துல நான் மகாராஷ்டிராவுல வேலை செய்தேன். இப்ப சென்னைக்கு வந்து நான்கு ஆண்டுகள் ஆகுது. இங்க விருகம்பாக்கத்தில் உள்ள வங்கியில் மானேஜராக இருக்கேன்...’’ என ஒரு சின்ன இன்ட்ரோ கொடுத்தார் கணேஷா ஷ்யாமின் அப்பா சரத்குமார்.