‘‘‘குங்குமம்’ பத்திரிகை எனக்குச் செய்த உதவியை மறக்கவே முடியாது. ‘ஹேப்பி சிங்கிள்டைன்ஸ் டே’ என்கிற ஷார்ட் ஃபிலிம் வந்தபோது இதே ‘குங்குமம்’ பத்திரிகைதான் என்னைப் பேட்டி எடுத்திருந்தாங்க. இவ்வளவு பெரிய பத்திரிகையிலே என்னுடைய பேட்டியான்னு சந்தோஷப்பட்ட நாள் அது.

 இதோ இப்பவும் ‘குங்குமம்’ பேட்டி, ஹேப்பியா இருக்கு...’’ உற்சாகமாகப் பேசுகிறார் ‘வல்லவன் வகுத்ததடா’ படத்தின் மூலம் இயக்குநராக அறிமுகமாகும் விநாயக் துரை. ‘‘எங்களின் 2 வருட போராட்டம்தான் இந்தப்படம். தனஞ்செயன் சார் படம் பார்த்திட்டு பிடிச்சிருக்குன்னு சொன்னார். அவர்தான் கால் பண்ணிப் பேசுகிறாரா என ஆச்சரியமா இருந்துச்சு. ‘நல்ல க்யூட் படம்’ என பாராட்டி அவர் பேனரையும்  கொடுத்தார்.

இது ஹைபர்லிங்க் கதைக்களம். ஒரு தயாரிப்பாளரிடம் கதை சொல்லி எல்லாம் ஓகே ஆகியிருந்த நிலையில், அவர் எனக்கு செக் சைன் பண்ணும்போது அவர் அறையிலே பாம்பு படமெடுத்து நின்றிருக்கு. 

அத்தோடு அந்தத் தயாரிப்பாளர் அப்படியே போய்விட்டார்...’’ பல சிந்தனைகள் மனதுக்குள் ஓடியவராக தொடர்ந்தார் விநாயக் துரை. ‘‘சொந்த ஊர் சென்னைதான். என் அப்பாவைப் பொருத்தவரை நான் ஒரு அயோக்கியன். அப்பாவுக்கு நான் ஒரு ஏசி ரூமில் உட்கார்ந்து வேலை செய்து கை நிறைய சம்பாதிக்கணும்னு ஆசை, கனவு.

எங்களுக்கு ஒரு சின்ன நிலம் இருந்துச்சு. அதை அக்கா கல்யாணத்திற்காக வித்துட்டு பாதி அக்கா கல்யாணத்திற்கும் மீதியை என்னுடைய வங்கிக் கணக்கிலும் அப்பா போட்டார். ‘குறைந்த பட்சம் இதன் மூலமா ஏதாவது வருமானம் வரும், உன்னை நீ பார்த்துக்கோ’னு கொடுத்தார். 

ஆனா, அதையும் என் நண்பருடன் சேர்ந்து சாண்ட்விச் கடை வைக்கப் போகிறேன்னு பொய் சொல்லி அந்தக் காசை வைத்துதான் இந்தப் படத்தை எடுத்து முடிச்சேன்!இந்த விஷயத்தை அப்பாவிடம் சொன்னப்ப ரொம்ப பெரிய ஏமாற்றத்தை சந்தித்தவரா ஒரு நிமிஷம் பேசாம அப்படியே உட்கார்ந்திட்டார். தொடர்ந்து இந்தப் படத்தை ரிலீஸ் செய்ய தனஞ்செயன் சார் ஒப்புக்கொண்டார்னு சொன்னபோது, ‘நான்தான் படிக்காதவன், இவரைப் பார்த்தால் நல்ல படித்த மனிதரா வடநாட்டுக்காரர் மாதிரி இருக்கார்... இவரை எப்படிடா ஏமாத்தினே’னு கேட்டார்!