இங்கிலாந்தில் கள்ளுக் கடை!

கேரளாவில் பல இடங்களில் ‘டோடி கடை’ பார்த்திருக்கலாம். அது என்ன ‘டோடி கடை’?

கள்ளுக் கடைதான்!

இந்த கடைகள் கேரளாவில் மிகவும் பிரபலம். கடைகள் மட்டுமில்லாமல் அங்கு வீட்டிலும் பொரும்பாலானவர்கள் கள்ளை ஒரு பானமாகப் பருகுவதை வழக்கமாகக் கொண்டுள்ளனர்.
தென் தமிழகத்தின் பாரம்பரிய பானமான டோடியினை இங்கிலாந்திற்குக் கொண்டு செல்ல விரும்பினார் கேரளாவைச் சேர்ந்த ஜான். அதற்காக பல தடைகளைக் கடந்து அங்கு டோடி கடை ஒன்றை துவங்கியது மட்டுமில்லாமல் கேரளா, தமிழ்நாடு, ஆந்திரா என நம்முடைய தென் தமிழகத்தின் பாரம்பரிய உணவுகளை அதே சுவையில் அங்கு வழங்கியும் வருகிறார் இவர்.

‘‘நான் மேற்படிப்பு படிக்கதான் இங்கிலாந்திற்கு வந்தேன். படிப்பு முடிச்சதும் இந்தியாவில் 5 வருடங்கள் இருந்தேன். இந்தக் காலத்தில் துபாயில் தொழில் துவங்கினேன். அதன் பிறகு சுமார் 47 நாடுகளுக்கு பயணித்து இருக்கிறேன். அதன் அடிப்படையில் இங்கிலாந்திலும் என்னுடைய தொழிலினைத் துவங்கி இப்போது அங்கேயே செட்டிலாகிட்டேன். என்னதான் நான் பல தொழில்களில் ஈடுபட்டு வந்தாலும், எனக்கு உணவகம் ஒன்றைத் திறக்க வேண்டும் என்பது நீண்ட நாள் கனவாக இருந்தது. அந்தக் கனவு கோவிட் காலத்தில்தான் நிறைவேறியது.

கொரோனா தாக்கம் உலகம் முழுக்க இருந்ததால், எல்லா இடங்களிலும் ஊரடங்கு உத்தரவு பிறப்பிக்கப்பட்டது. இதில் உணவுக் கடைகளுக்கு மட்டும் விதிவிலக்கு அளித்திருந்தனர். அந்த சமயத்தில் என்னுடைய மற்ற தொழிலும் பெரிய அளவில் செயல்படுத்த முடியாமல் முடங்கியது. எப்போதும் பிசியாக பயணித்து வந்த எனக்கு, வீட்டில் அடைந்து இருப்பது பெரிய சவாலாகவும் இருந்ததால், என் கனவு பிசினசான உணவகத்தை திறந்தேன்.

இதற்கு ‘தட்டுக்கடை’ என்று பெயர் வைத்தேன். இரண்டு பேர் மட்டுமே வேலைக்கு நியமித்து பார்சலில் உணவுகளை வழங்கி வந்தேன். முழுக்க முழுக்க தென்தமிழக உணவுகளை பாரம்பரிய முறையில் கொடுக்க ஆரம்பித்தேன். காரணம், நான்  இங்கிலாந்தில் படிக்கும் காலத்தில், இங்கு வட இந்திய உணவகங்கள்தான் அதிகம் பார்க்க முடியும். தென் தமிழக உணவகங்கள் என்பது மிகவும் குறைவு.

அப்போதே என் மனதில் இதுபோன்ற உணவகம் ஒன்றை ஆரம்பிக்க வேண்டும் என்ற எண்ணம் இருந்தது. அதிலும் குறிப்பாக டோடி பானமும் வழங்க வேண்டும் என்பதில் நான் உறுதியாக இருந்தேன். இங்கு மற்ற மதுபானங்கள் கிடைக்கும். ஆனால், டோடி கிடைக்காது. சில சமயம் டோடி பருக வேண்டும் என்பதற்காகவே இந்தியாவிற்கு வந்து சென்றிருக்கேன்...’’ என்றவர் டோடி பானத்தை இந்தியாவில் இருந்து இங்கிலாந்திற்குக் கொண்டு வருவதற்காகப் பல வருடங்களாகப் போராடியுள்ளார்.

‘‘இந்தியாவில் கேரளா மட்டுமில்லை, தமிழகம், ஆந்திரா போன்ற இடங்களிலும் டோடி  மிகவும் பிரபலம். அதனால் இதனை எப்படியாவது இங்கிலாந்திற்குக் கொண்டு வர விரும்பினேன்.
ஆனால், நான் எடுத்த பல முயற்சிகள் தோல்வியில்தான் முடிந்தது. இந்தியாவில் இருந்து பல உணவுப் பொருட்கள் இங்கு ஏற்றுமதி செய்யப்பட்டாலும், இதனை மட்டும் ஏற்றுமதி செய்ய இந்திய அரசு அனுமதிப்பதில்லை. அதனால் இங்கிலாந்திலும் மது சார்ந்த எந்த பொருட்களும் இந்தியாவில் இருந்து கொண்டு வர அனுமதிப்பதில்லை.

எதற்காக இந்த விதிமுறைகள் என்று இன்று வரை எனக்கு புரியவும் இல்லை. நான் ஒரு பிசினஸ்மேன். அதனால் அதன் அடிப்படையில்தான் பார்ப்பேன். இதற்காக பலமுறை போராடினாலும் ஒரு பிசினசாக என்னால் அதனை செயல்படுத்த முடியவில்லை. அதனால் என்னுடைய ‘தட்டுக்கடை’யினை பெரிய உணவகமாக மாற்றாமல் இருந்தேன்.