இயக்கணும்னு ரொம்ப நாட்கள் நினைச்சதுதான். 2011ம் ஆண்டே, ‘அழகர்சாமியின் குதிரை’ படத்துல இணை இயக்குநராக வேலை செய்தநேரம் ஒரு படம் பண்ணணும்னு முயற்சி செய்தேன். அதுக்காக ஒரு திரைக்கதையும் எழுதியிருந்தேன். 

அந்நேரம், சரியான தயாரிப்பாளர்கள் அமையல. அப்புறம் சீரியல், சினிமானு எழுத்து வேலைகள்ல பிஸியாகிட்டேன். நல்ல கதையும், தயாரிப்பாளரும் அமையும்போது பண்ணுவோம்னு மனசுல நினைச்சுக்கிட்டே இருந்தேன்.

இப்பதான் ரெண்டுமே கைகூடி வந்தது. டைரக்டராகிட்டேன்...’’ அத்தனை இயல்பாய் பேசுகிறார், ‘வடக்கன்’ படம் மூலம் அறிமுக இயக்குநராகியிருக்கும் எழுத்தாளர், பத்திரிகையாளர், வசனகர்த்தா, திரைக்கதையாசிரியர் எனப் பன்முகம் கொண்ட பாஸ்கர் சக்தி.

‘மெட்டிஒலி’ தொடரில் தொடங்கி, ‘எம்டன் மகன்’, ‘முனியாண்டி விலங்கியல் மூன்றாமாண்டு’, ‘வெண்ணிலா கபடிக்குழு’, ‘நான் மகான் அல்ல’, ‘பாண்டிய நாடு’ உள்ளிட்ட பல படங்களின் வசனகர்த்தாவாக நமக்கு அறிமுகமானவர். ‘அழகர்சாமியின் குதிரை’ படத்தில் இணை இயக்குநராகவும், திரைக்கதை ஆசிரியராகவும் பணியாற்றிய அனுபவம் பெற்றவர். இப்போது இயக்குநர் அவதாரம் எடுத்துள்ளார்.

இந்தப் படம் ஒரு நிஜ சம்பவத்தின் அடிப்படையில் உருவானது. அந்தச் சம்பவம் என்னனு சொன்னால் படத்தின் சுவாரஸ்யம் குறைஞ்சிடும். அந்தச் சம்பவம் எங்க ஊர் தேனியில் நடந்தது. அது நடந்து பதினைந்து ஆண்டுகளுக்கு மேல் இருக்கும். ஆனா, அந்தச் சம்பவம் என் மனசுல இருந்துட்டே இருந்தது. 

அந்தச் சம்பவத்தை வச்சு ஒரு சிறுகதை எழுதலாம் அல்லது குறும்படம் எடுக்கலாம்னுதான் முதல்ல நினைச்சிருந்தேன். ஆனா, எனக்கு அது போதல. நிறைய சொல்ல வேண்டியிருக்குனு தோணுச்சு. அதனால, அதை பெரிய திரைக்கதையாகப் பண்ணி எமோஷனலாகவும் அதேநேரம் ரொம்ப என்டர்டெய்னிங்காகவும் படமாக்கியிருக்கேன்.  

வேடியப்பன் சினிமாவுக்காகவே சென்னைக்கு வந்தவர். இயக்குநர் லிங்குசாமியிடம் உதவி இயக்குநராக இருந்திருக்கார். அவர் மனசு முழுவதும் சினிமாத் துறைக்குள் வரணும்னு இருந்தது. அதற்குச் சரியான வாய்ப்புகள் அமையல. 

இந்தத் திரைக்கதை அவருக்கு ரொம்பப் பிடிச்சிருந்தது. சேர்ந்து பண்ணலாம்னு சொன்னார். நான்கூட ஒருகட்டத்துல செலவுகள் அதிகமாகிவிடுமோனு தயங்கினேன். அவர்தான் நம்பிக்கை தந்தார். பண்ணுவோம்னு தைரியம் கொடுத்தார். நண்பர் என்பதால் சிக்கல் இல்லாமல் வேலை செய்ய முடிஞ்சது.

ஒரு படம் இயக்குவதே சவால்தான். எனக்கு 20 ஆண்டுகள் அனுபவம் இருக்கு. ‘மெட்டிஒலி’யில் திருமுருகன் கூட ஆரம்பிச்சது. பிறகு அவருடன், ‘எம்டன் மகன்’ பண்ணியிருக்கேன். அப்புறம், சுசீந்திரன்கூட பணிசெய்திருக்கேன். அவங்க எல்லாம் எப்படி ஒவ்வொரு விஷயங்களையும் கையாள்வாங்கனு எனக்குத் தெரியும். அந்த அனுபவம் எனக்கு இங்கே கைகொடுத்தது.

ஹீரோ குங்குமராஜ், நாடகத் துறையில் அனுபவம் உள்ளவர். ஞாநியின் பரீக்‌ஷா நாடகக் குழுவில் இருந்தவர். நான், ஞாநியின் நெருங்கிய நண்பன் என்பதால் அப்போதிலிருந்தே எனக்கு குங்குமராஜை நல்லா தெரியும். நல்ல நடிகர். இந்தப் படத்துக்கு ஹீரோ தேடும்போது அவர் பொருந்தி வந்தார். அவரை சினிமா நடிப்பிற்காக கொஞ்சம் மாத்தினோம்.

அவர் கோயமுத்தூர்காரர் என்பதால் தேனி ஸ்லாங்கை கத்துக்க தேனியில் உள்ள நண்பர்கள் மூலம் ஏற்பாடு செய்தோம். அங்குள்ள ஊர்களை சுற்ற வைச்சோம். நிறைய ஹோம்வொர்க் செய்தோம். அவரின் உடல்மொழியும், பேச்சுமொழியும் படத்தில் நல்லா வந்திருக்கு.