இந்த வினாதான் உலகம் முழுக்க வைரலாக கேட்கப்பட்டது. அதற்கான பதிலும் கிடைத்திருப்பதுதான் சென்ற வார இணைய டிரெண்டிங்.டுவிட்டர் நிறுவனத்தின் மூத்த இயக்குனராக இருந்தவர் ஹல்லி தோலிஃப்சன்.

சென்ற வாரம் இவர் எலன் மஸ்க்கை tag செய்து, ‘‘ஒன்பது நாட்களுக்கு முன் நிறுவனத்தில் நான் பயன்படுத்தி வந்த கணினி வேலை செய்யாமல் நின்றது. சட்டென ‘நான் வேலையில் இருக்கிறேனா இல்லையா’ என சந்தேகம் வந்தது. இதை எச்.ஆரால் உறுதி செய்ய முடியவில்லை. உங்களுக்கு மின்னஞ்சல் அனுப்பினேன். நீங்கள் எனது இ-மெயில்களுக்கு பதிலளிக்கவில்லை. அதனால் டுவிட்டரில் உங்களை tag செய்து கேட்கிறேன்...’’ என டுவிட் போட்டார்.

ஐஸ்லாந்தைச் சேர்ந்தவர். வயது 45. தொழில்முனைவர். 2021ல் Ueno டிசைன் என்ற தனது நிறுவனத்தை டுவிட்டருக்கு விற்றுவிட்டு அங்கு முழுநேர ஊழியராக பணியாற்றத் தொடங்கியவர்.

‘‘இவர் ஒரு சுதந்திரமான செல்வந்தர். எந்த வேலையும் செய்யாமல் தனது இயலாமையை (மாற்றுத்திறன்) சாக்காகக் கூறி பணி செய்யாமல் தப்பிப்பவர்...’’ என டுவிட் போட்ட மஸ்க், கூடவே, ‘‘இதற்காக அவருக்கு அதிக மரியாதை கிடைக்கும் எனக் கூறிவிட முடியாது...’’ என பதிவிட்டார்.அவ்வளவுதான். நெட்டிசன்கள் பொங்கிவிட்டார்கள்.

பணியாளரை வேலையில் அமர்த்துவதும் நீக்குவதும் நிறுவனம் தொடர்பானது. அதற்காக மாற்றுத்திறனாளியை பொதுவெளியில் கிண்டலடிப்பதா... என ஈரேழு உலகில் இருந்தும் டுவிட் போட்டு இணையவாசிகள் எலன் மஸ்க்கை காய்ச்சி எடுத்துவிட்டார்கள்.