தமிழ்ப் பத்திரிகையின் இளைய தலைமுறை ஓவியர்களில் ஸ்யாம் மிஸ்டர் ஸ்டைலிஷ்!  குறும்பு மின்னும் கண்கள், அட்டகாச உயரம், ரகளையான கிராஃப் கொண்ட வாழ்க்கை. அதெல்லாம் இப்போது விஷயம் இல்லை. ஸ்யாம் இப்போ நடிகர்!நடிகர் இ.வி.கணேஷ்பாபு ஹீரோவாகி இயக்கும் ‘கட்டில்’ படத்தில் மிக முக்கிய கேரக்டராகி வந்து நிற்கிறார்.

அத்தனை பேரையும்ஆனந்த அதிர்ச்சி அடைய வைத்து அருமையாகப் புன்னகைக்கிறார்.‘‘நண்பர்களுக்கெல்லாம் ரொம்பவும் ஆச்சர்யம். யாரும் இதை எதிர்பார்க்கலை. நானே இதை எதிர்பார்க்கவில்லை என்பதுதான் உண்மை.

ஒளிப்பதிவு செய்யும் வைட் ஆங்கிள் ரவிஷங்கர், என் நீண்ட நாள் நண்பர். இவரும் இயக்குநர் கணேஷ்பாபுவும் படத்தை வடிவமைப்பது ரொம்பவும் பிடிச்சிருக்கு. ‘கட்டில்’னு வேறு அர்த்தத்தை அது கொண்டு வரலை. வீடு என்பதும், அதன் பொருள்களும் அஃறிணை அல்ல. இந்த வீட்டில் 200 வருஷங்களா ஒரு கட்டில் கிடக்கு. மூணு தலைமுறையைப் பார்த்திருக்கு. ஏகப்பட்ட பேருக்கு அதில் பிரசவம் நடந்திருக்கு. வம்சம் விருத்தியாகியிருக்கு.

கட்டிலுக்குக் கால் இருக்கு. கையிருந்தால் அதனால் ஓர் உயிர்ச்சித்திரம் வரைய முடியும். அப்படி ஒரு கதை. அந்த வீட்டையும் கட்டிலையும் வித்துட்டு வேற இடத்திற்குப் போயிடணும்னு நினைக்கிற மூத்த மகனா, கணேஷ்பாபுவுக்கு அண்ணனா நடிக்கிறேன். பாசத்தைக் கொட்டிட்டு, பைசா உதவாமல் இருக்குறவன். பேசினால் தேள் மாதிரி கொட்டுவேன்.

எவ்வளவு பெரிய தப்பு செய்திருந்தாலும், அதை அவன் வேணும்னு செய்யாதவரைக்கும் மன்னிப்பு காத்திருக்கு. வயசுக்கோளாறு, ரத்தம் சூடா இருக்கும்போது எதற்கும் அஞ்ச மாட்டோமே, அப்படி அமைகிற சூழ்நிலைகளும் இதில் இருக்கு...’’ தன் ஓவியங்கள் போலவே அமைதியாகவும் அழுத்தமாகவும் அழகாகவும் பேசுகிறார் ஸ்யாம்.