ரூ.95,800 கோடி எங்கே? அரசு வங்கிகளில் அசகாய ஊழல்

மத்திய நிதி அமைச்சர் நிர்மலா சீதாராமன் மக்களவையில் ஒரு தகவலைத் தெரிவித்திருக்கிறார். இந்தியாவின் நிதி அமைப்புகளையே ஆட்டம் காணச் செய்யக்கூடிய மோசமான ஊழல் ஒன்றைப் பற்றிய தகவல் அது.

ஆம்! நமது அரசு வங்கிகளில் இதுவரை ரூபாய் 95,800 கோடிகள் வரை போலியான ஆட்களுக்குக் கடனாக கொடுத்திருக்கிறார்களாம்! கடந்த ஏப்ரல் முதல் செப்டம்பர் வரையான அரையாண்டு முடிவிலான நிதி நிலை விவரம் இது. இந்த நிதியாண்டில் இதுவரை மொத்தம் 5,743 போலிக் கணக்குகள் மூலம் நிதி வழங்கப்பட்டிருக்கிறது.

அதில், ஆயிரம் போலிக் கணக்குகளுக்கு சுமார் ரூ.2500 கோடி நிதி சமீபத்தில்தான் போய்ச் சேர்ந்திருக்கிறது!‘இப்படியான போலியான நிறுவனங்கள் மற்றும் கணக்குகளுக்கு வழங்கப்பட்ட நிதியை வசூலிக்க அரசு தேவையான நடவடிக்கைகளை எடுத்து வருகிறது...’ என்று தெரிவித்திருக்கிறார் நிதியமைச்சர்.

இப்படி போலியான நிதி பெற்றிருக்கும் நிறுவனங்களில் மூன்று லட்சத்து 38 ஆயிரம் நிறுவனங்களைக் கண்டடைந்து அவற்றின் செயல்படாத வங்கிக் கணக்குகளை முடக்கி, அந்த நிறுவனங்களுக்குச் சொந்தமான சொத்துகளைப் பறிமுதல் செய்ய நடவடிக்கை எடுக்கப்பட்டுள்ளது என்கிறார்கள்.
ஆனால், இதெல்லாம் தும்பை விட்டு வாலைப் பிடிக்கும் ஆகாத வேலை என்றே பொருளாதார நிபுணர்கள் சொல்கிறார்கள்.

இத்தனை கோடி ஊழல் என்பது மாநில மற்றும் தேசிய ஆளும் கட்சிகள், அதிகாரிகளின் ஆசி இல்லாமல் கண்டிப்பாக நடக்க முடியாது. எனவே, நிதியமைச்சர் நடவடிக்கை எடுக்கப்படும் என்று சொல்லியிருப்பது வெறும் கண்துடைப்பே என்கிறார்கள். இந்த வங்கி ஊழல் என்பது இன்று நேற்று நிகழ்வதில்லை. பல ஆண்டுகளாக இருந்து வருவதுதான் என்றாலும் சமீபமாக இது மிக அதிகமாகிக் கொண்டிருக்கிறது.

போலியான ஆவணங்களைக் கொடுத்து வங்கியில் கடன் வாங்குவது, வழங்கப்பட்ட அடமான சொத்துகளைக் காட்டிலும் அதிகமாக வங்கிக் கடன் பெறுவது, ஒரே சொத்து ஆவணத்தைக் காட்டி இரண்டுக்கும் மேற்பட்ட வங்கிகளில் கடன் வாங்குவது, ஒரே சொத்துக்காக ஒன்றுக்கும் மேற்பட்ட நிறுவனங்களுக்கு கடன் பெறுவது என்று விதவிதமான நிதி ஊழல்கள் அரசு வங்கிகளில் நடந்து கொண்டிருக்கின்றன.

இவற்றில் வங்கியின் மிகப் பெரிய பொறுப்பில் இருக்கும் அதிகாரிகளில் தொடங்கி உள்ளூர் அரசியல்வாதிகள், தொழிலதிபர்கள் வரை அனைவரது கரங்களும் கறைபட்டிருக்கின்றன.இப்படி அனைவரின் ஆசியோடும் நடைபெறும் ஊழல் என்பதால் இவை பெரும்பாலும் வெளியே தெரிவதில்லை.
நிறுவனம் திவாலானாலோ, இயக்குநர்களுக்கு ஏதும் நேர்ந்தாலோதான் இந்த போலி நிதிகள் வெளிச்சத்துக்கு வருகின்றன.

இந்த ‘கொள்ளை’ சமீப காலமாக கணக்குவழக்கின்றி அதிகரித்துக் கொண்டிருப்பதை இந்த ஆண்டின் தொடக்கத்தில்ரிசர்வ் வங்கி அதிகாரி ஒருவர் கவலையோடு தெரிவித்தார். கடந்த நிதியாண்டில் ரூ.71,543 கோடி போலி நிதி வழங்கப்பட்டிருப்பதாக அதிர்ச்சி தெரிவித்த ரிசர்வ் வங்கியின் பொது மேலாளார் ஜெயந்த் தாஸ், இது அதற்கு முந்தைய நிதியாண்டோடு ஒப்பிடும்போது 74 சதவீதம் அதிகம் என்ற அதிர்ச்சித் தகவலையும் வெளிப்படுத்தினார்.