வெப் சீரிஸ் தமிழ் சினிமாவுக்கு ஆபத்தா..?

தமிழ் சினிமா வட்டாரத்தில் இப்போது கவனிக்கப்படுகிற வார்த்தை ‘வெப் சீரிஸ்’.

சினிமாவில் தடம் பதிக்க விரும்புகிற இளைஞர்களின் குறி இதுதான். தமிழ்  ரசிகர்கள் மெதுவாக வெப் சீரிஸுக்கு தாவிக் கொண்டிருக்கிறார்கள்.
தமிழில் மூன்றாவது இடத்தில் இருக்கிற கதாநாயகர்கள் இதில் புகுந்துவிட, இதன் செல்வாக்கையும், வளர்ச்சியையும் முக்கிய நடிகர்கள் கவனித்துக் கொண்டிருக்கிறார்கள்.

இதனால் தமிழ் சினிமாவிற்கு பாதிப்பு உண்டா, தியேட்டர்களில் ஏற்கனவே குறைந்திருக்கும் ரசிகர்கள் கூட்டம், மேலும் குறையுமா என்ற கேள்வி எழ, சினிமா உலகத்தில் சலசலப்பு கூடியிருக்கிறது. இத்தகைய சூழ்நிலையில் இதன் மெய்நிலை, பிரச்னைகள், ரசிகர்களின் மாறுபட்ட ரசனை குறித்தெல்லாம் தமிழ் சினிமாவை உற்று கவனித்துக் கொண்டிருக்கும், பங்கு பெற்றிருக்கும் சிலரிடம் பேசினோம்.

பிரபல திரைப்பட விநியோகஸ்தர் திருப்பூர் சுப்பிரமணியன் சொல்வது புரிந்துகொள்ளக் கூடியதாக இருக்கிறது: ‘‘நாம் நினைத்தாலும் இதை நிறுத்த முடியாது. யாரும் போய் கோர்ட் ஆர்டர் வாங்கிக்கொண்டு தடை போடவும் முடியாது. வெப் சீரிஸ் வேண்டாம்னு சொல்லக்கூடிய நிலைமையிலும் நாம் இல்லை.

இதனால் தமிழ் சினிமாவுக்கு பாதிப்பு ஒன்றுமே கிடையாது. டிவி வந்தபோது சினிமா தியேட்டரை எல்லாம் இழுத்து மூடிவிட வேண்டியதுதான் என்று பேசிக்கொண்டார்கள். நாமும் அதை கிட்டத்தட்ட நம்பினோம். அதுமாதிரி நடக்கலை. பிறகு திடீரென்று டிவியில் 24 மணி நேரமும் சினிமாப்படம் போட்டார்கள். அப்பொழுதும் சினிமா அவ்வளவுதான் என்றார்கள்.

ஆக, சினிமா தியேட்டருக்கு மக்கள் செல்வது குறையாது. ஆனால், இப்போது தியேட்டரில் ரசிகர்கள் அதிக வசதியை எதிர்பார்க்கிறார்கள் என்பது உண்மை. இரண்டு கோடி வாங்கிய நடிகன் 20 கோடி வாங்குகிற நல்ல நிலைமையில்தான் சினிமா இருக்கு. சினிமா எந்த அளவுக்கு டெவலப் ஆகியிருக்குன்னு இதை வைத்து பார்த்துக் கொள்ளுங்கள்.

எல்லாவற்றையும் தாண்டி சினிமா வரும். இஷ்டப்பட்டால், செய்தி பரவினால் வெப் சீரிஸ் பார்ப்பார்கள். பார்த்தாலும் சினிமாவுக்குத் திரும்பி வந்துவிடுவார்கள். இப்பவும் படம் ஓடிப்பார்த்த பிறகு சேட்டிலைட் ரைட்ஸ் வாங்கிக் கொள்கிற நிலைமை வந்தாச்சு. சேர்ந்து பார்த்து படத்தை கொண்டாட்டமாகப் பார்க்கிற மனோநிலைதான் இங்கே முக்கியம். காலம் அதை இன்னும் மாற்ற வில்லை...’’ அழுத்தம்திருத்தமாகச் சொல்கிறார் திருப்பூர் சுப்பிரமணியன்.

முக்கியமான தமிழ் இயக்குநரும், ஒளிப்பதிவாளருமான செழியன் கூறுவது இதுதான்: ‘‘டெக்னாலஜியின் வசமாகி சினிமாவின் வடிவம் மாறிக்கிட்டே இருக்கு. கதை சொல்வதும், கதை கேட்பதும் மரபுப்படி எப்போதும் மாறாது.

இப்போது வெப்சீரிஸ் வரை டெக்னாலஜி வந்துவிட்டது. இனி கேம்ஸ்தான் பொழுது போக்கில் முன்னிலை வகிக்கப்போகிறது என்கிறார்கள்.
ஒரு கதையில் கதாநாயகனிடம் வில்லன் தோற்றுப்போய் விடுகிறான் என்றுதான் வரும். ஆனால், ‘வீடியோ கேமில்’ அப்படி இல்லையென்றால் என்ன ஆகும் என்ற வெர்ஷன் ஒன்று வரும். அது இப்போது மக்களுக்குப் பிடித்திருக்கிறது.

நீங்கள் போகும் வழியில் டைனோசர் ஒன்று வரும். இன்னொரு வழியில் வேறு மாதிரி முயற்சித்துப் பார்க்கலாம் என கேம் வருகிறது. அதை இளைஞர்கள் சிரமேற்கொண்டு விழுந்து விழுந்து பயணிக்கிறார்கள்.