பத்தையும் பெற்றவனான உத்தரன்

மகாபாரதத்தில் விரிவாக, அடிக்கடி வரும் நாயகர்கள் உண்டு. மின்னல் மின்னி மறைவதைப்போல, சிறிதளவே வரும் நாயகர்களும் உண்டு. சிறிதளவே வரும் நாயகர்கள், ஏராளமாக இடம் பெற்றிருக்கிறார்கள் மகாபாரதத்தில். அப்படிப்பட்ட நாயகர்களில் ஒருவன் தான் உத்தரன். விராட மன்னரின் மகனான உத்தரனைப் பற்றிய தகவல்கள், அவனாலேயே அந்தப்புரத்தில் பெண்கள் மத்தியில் வெளியிடப்படத் தொடங்குகின்றன. பஞ்ச பாண்டவர்களும் திரௌபதியும் வனவாசம் முடித்து, அக்ஞாத வாசம் எனும் மறைந்திருந்து வாழவேண்டிய ஒரு வருட காலத்தை, விராட மன்னரின் அரண்மனையில், பெயர்களையும் வடிவங்களையும் மாற்றிக்கொண்டு, பல்வேறு விதமான பணிகளில் ஈடுபட்டிருந்தார்கள்.

அப்போது அவர்கள் அங்கே தங்கி இருப்பதைச் சந்தேகித்த துரியோதனன், திரிகர்த்த தேசாதிபதியான சுசர்மா என்பவர் மூலமாக, விராட நகரத்தில் இருந்து பசுக்குலங்களைக் கவரச் செய்தான். அதை அறிந்த விராட மன்னர், யுத்தத்திற்குப் புறப்பட்டார். பிருகன்னளை எனும் பேடி வடிவில் இருந்த அர்ஜுனனைத் தவிர, தர்மர் முதலான சகோதரர்களும் விராட மன்னருக்கு உதவியாகப் போருக்குச் சென்றார்கள்.

அவர்கள் எல்லோரும் அங்கே போர்க் களத்தில் ஈடுபட்டிருந்த அந்த வேளையில், விராட நாட்டின் மற்றொரு பக்கத்தில் உள்ள பசுக்கூட்டங்களைக் கவர்ந்து வரத் திட்டமிட்டான் துரியோதனன். பீஷ்மர் - துரோணர் - கர்ணன் முதலான மாபெரும் வீரர்களுடன் புறப்பட்டுப் சென்று, விராட நகரத்தின் மற்றொரு பக்கமாக நுழைந்து, அங்கிருந்த பசுக்கூட்டங்களைக் கவர்ந்தான். அங்கிருந்த கோபாலர்கள் மற்றும் பசுக்கூட்டங்களைக் காப்பவர்கள், தகவல் தெரிவிப்பதற்காக அரண்மனை நோக்கி ஓடி வந்தார்கள். அவர்கள் வந்த நேரத்தில், மன்னர் மகனான உத்தரன், அரண்மனை அந்தப்புரத்தில் பெண்கள் நடுவே இருந்தான்.

கோபாலர்கள் வந்து, ‘‘இளவரசே! நாட்டின் ஒரு பக்கத்தில் இருந்த பசுக்கூட்டங்களைக் கவர்ந்தவர்களுடன் போரிட, உங்கள் தந்தையும் படைகளும் சென்று விட்டார்கள். இந்தச் சந்தர்ப்பத்தைப் பயன்படுத்திக்கொண்டு, இப்போது மற்றொரு பக்கத்தில் இருக்கும் பசுக்கூட்டங்களைப் பகைவர்கள் கவர்ந்து கொண்டு போகிறார்கள். நீங்கள்தான் வந்து காப்பாற்ற வேண்டும். எழுந்திருங்கள்! பசுக்கூட்டங்களைக் காப்பாற்றுங்கள்!’’ என வேண்டினார்கள். அந்தப்புரத்தில் பெண்கள் நடுவில் இருந்த உத்தரன், பெருமை பாராட்டித் தற்பெருமை பேசத் தொடங்கினான்.

‘‘ஹும்! இது என்ன பெரிய விந்தை! எனக்கு மட்டும் ஒரு நல்ல தேரோட்டி இருந்தால் போதும். எவ்...வளவு பெரிய வீரர்களாக இருந்தாலும், அவர்களை நான் வென்று விடுவேன். ‘‘அப்படியிருக்க இந்தப் பீஷ்மர், துரோணர், கர்ணன் முதலானவர்கள் எல்லாம் எம்மாத்திரம்? ஓடஓட அவர்களை விரட்டிவிடுவேன். இவன் தேரில் வந்திருக்கும் அர்ஜுனனோ?’’ என்று சொல்லக்கூடிய அளவிற்கு, திறமையாகப் போர்புரிந்து பகைவர்களை வென்று, பசுக்கூட்டங்களை மீட்டு வருவேன். ‘‘என்ன செய்ய? திறமைசாலியான தகுந்த தேரோட்டி ஒருவன் இல்லையே!’’ என்று தற்பெருமை பாராட்டிப் பேசினான் உத்தரன்.