பகவத் கீதையின் பல அத்தியாயங்களை படிக்கும்போது தேறிய பொருளாக சில விஷயங்கள் மனதில் எழுந்தன. எதிர்வருவதை எதிர்கொள் அதில் முக்கியமானது. ஏனெனில், இந்தப் பிறப்பெடுக்கும்போதே சிலவற்றை பிராரப்த கர்மா எனும் வினையூழை மூட்டையாக சுமந்து வருகின்றோம். அதை அனுபவித்துத்தான் தீர்க்க வேண்டும்.

உங்கள் முயற்சியில் நீங்கள் தவிர்க்க முடியாத இன்பங்களும் துன்பங்களும் அதில் அடக்கம். அதனால், எதையுமே ஏற்றுக் கொள்ளுதல் மிகப்பெரிய நிம்மதியையும் வாழ்வைப்பற்றிய புரிதலையும் கொடுக்கும்.‘‘எங்கிட்ட பணம் மட்டும் இருந்தா போதும். எல்லா பிரச்னையையும் சுலபமா சாதிச்சுடுவேன்’’ என்று பலர் சொல்வார்கள்.

‘‘இந்த ஒரு பிரச்னை மட்டும்தான் சார் என் வாழ்க்கைல… இது மட்டும் தீர்ந்துடுச்சுன்னா போதும் என்று தினமும் அந்தப் பிரச்னை குறித்து யோசித்தபடி இருப்போம். ஆனால், உண்மை அதுவல்ல. மனம் ஒன்றன்பின் ஒன்றாக இது போனால் நிம்மதி... இது வந்தால் நிம்மதி… என்று கணக்கு போட்டு குழப்பும். எனவே, என்ன பிரச்னை இருக்கின்றதோ அது இருக்கின்றது.

இந்தப் பிரபஞ்சம் எல்லோருக்கும் ஏதேனும் பிரச்னையை தருவதுபோன்று, சந்தோஷத்தை தருவதுபோன்று, செல்வத்தை தருவதுபோன்று, ஏழ்மையை தருவதுபோன்று தந்திருக்கின்றது. இவையெல்லாமுமே காலக்கிரமத்தில் மாறக் கூடியவை. அதனால் எது வருகின்றதோ எதுவாக இப்போது இருக்கின்றீர்களோ அதை அப்படியே ஏற்றுக் கொள்ளுங்கள்.