கிச்சன் டைரீஸ்

டயட் மேனியா

ஐடியல் புரோட்டின் டயட் பற்றி இந்த இதழில் பார்ப்போம். இதை ட்ரான் டைன் சான் என்பவர் வடிவமைத்தார். நாம் உண்ணும் உணவில் உடலுக்கு அடிப்படையான கட்டுமானத்தை வழங்கும் புரோட்டினை சிறந்த முறையில் சேர்ப்பதை வலியுறுத்தும் இந்த டயட் உடல் இளைப்பதை நோக்கமாகக் கொண்ட டயட்களில் ஒன்று. இதில் நான்கு நிலைகள் உள்ளன. டயட் இருப்பவரின் உடல் நிலை, வயது, பாலினம் ஆகியவற்றுக்கு ஏற்ப அவருக்கான டயட் முறை பரிந்துரைக்கப்படும் என்பதால் இது ஒருவகை ஒன் டூ ஒன் டயட்டும்கூடத்தான். எல்லோருக்கும் பொதுவான உணவியல் விதிகள் இதில் அதிகம் இல்லை. புரோட்டினை சிறப்பாகப் பயன்படுத்துவது மட்டுமே பொதுத்தன்மை.

குறைந்த அளவு புரோட்டின் உணவுகள், காய்கறிகள், நீர் ஆகியவற்றின் மூலம் உடலின் கீட்டோசிஸை மேம்படுத்தி எடைக்குறைப்பை நிகழ்த்தும் டயட் இது. கீட்டோசிஸ் கட்டுப்படும்போது தசையின் அடர்த்தியும் ரத்த சர்க்கரை அளவும் கட்டுப்படுகிறது. இதனால் எடை குறைகிறது. நான்கு கட்டமாக நடைபெறும் இந்த டயட் பிளானில் சர்க்கரையும் கார்போஹைட்ரேட்டும் மிகக் குறைந்த அளவே இடம்பெறும். இந்த டயட்டுக்கு என்று தனியார் நிறுவனங்கள் ஆன்லைன் சர்வீஸ் கூட உண்டு. அதில் இருக்கும் பயிற்சி பெற்ற நிபுணர்கள் ஒருவர் உண்ணவேண்டிய ஆரோக்கியமான உணவுகள் பற்றி அறிவுறுத்துவார். மில்க் ஷேக், ஸ்நாக்ஸ் என்று பால் பொருட்களால் ஆன உணவுகளுக்கு முதலிடம் இருக்கும்.

முதல் நிலையில்தான் அதிகப்படியான உடல் எடைக் குறைப்பு திட்டமிடல் இருக்கும். இதில் காலை, மதியம் மற்றும் இரவு உணவு உண்டு. அனைத்துமே ஹோல் புரோட்டின், காய்கறிகள், ஐடியல் புரோட்டின் ஸ்நாக்ஸ் ஆகியவற்றைக் கொண்டவை. இரண்டாவது நிலையில் மதிய உணவில் மட்டும் புரோட்டின் மற்றும் காய்கறிகள் உண்பதில் கொஞ்சம் தளர்வான விதிகள் உள்ளன. மூன்றாவது நிலையில் ஆரோக்கியமான காலை உணவு, பழங்கள், தானியங்கள் உண்டு. நான்காம் நிலையில் கார்போஹைட்ரேட்டுடன் புரோட்டின் மற்றும் கொழுப்புச்சத்து ஆகியவையும் உண்டு. பின்பற்றுவதற்கு கொஞ்சம் காஸ்ட்லி என்பதுதான் இதன் மிகப் பெரிய குறை. மற்றபடி, சிறப்பான உடல் எடைக் குறைப்புக்கு இது ஏற்றது.

ஃபுட் சயின்ஸ்

வைட்டமின் பி3 பற்றி இந்த இதழில் பார்ப்போம். பி காம்ப்ளெக்ஸ் தொகுதியைச் சேர்ந்த வைட்டமின்களில் முக்கியமானது இது. அடிப்படையில் இந்த பி3 மூன்று வகையாகப் பிரிக்கப்பட்டுள்ளன. நிகோட்டினமைடு, நியாசின் எனப்படும் நிகோட்டினிக் அமிலம், நிகோட்டினமைடு ரிபோசைடு என்று சொல்வார்கள். வைட்டமின் பி3 நம் உடலில் சேரும்போது நிகோட்டினமைடு அடினைன் டைனக்ளியோடைடு என்ற உயிர்வேதிப் பொருளாக மாறுகிறது.

இதை, NAD என்பார்கள். இதுதான், நம் உடலின் அடிப்படையான டிஎன்ஏ பழுதுபார்த்தலுக்கும் கால்சியம் உடலில் கரைவதற்கும் முக்கியப் பங்காற்றுகிறது. பீன்ஸ், பால், அசைவம், முட்டை ஆகியவற்றில் வைட்டமின் பி3 நிறைந்துள்ளது. ஒருவர் உடலில் தினசரி 35 மி.கி நியாசின் இருக்க வேண்டும். இது மாறுபட்டால் சரும எரிச்சல், சரும உலர்வு, அரிப்பு, தலைவலி ஆகியவை தோன்றக்கூடும். இது அளவுக்கு அதிகமானாலும் ரிஸ்க்தான். குறிப்பாக, கல்லீரல் நச்சாகும் பிரச்சனை இதன் அதிகரிப்பால் உருவாவதுதான்.

காமாலை போன்ற நோய்களைக்கூட உருவாக்கும் மோசமான நோய்த்தொற்று இது. க்ளூகோஸ் இண்டாலரன்ஸ், ஹைப்பர்யூரிசீமியா, மேக்குலர் எடிமா, மேக்குலர் கட்டிகள் போன்ற பிரச்சனைகளையும் உருவாக்கும். பெல்லக்கரா என்ற மோசமான சரும நோய் நியாசின் போதாமையால் ஏற்படுவது. குடிகாரர்களுக்கு இது வருவதற்கான வாய்ப்பு மிகவும் அதிகம். மருத்துவர் பரிந்துரைத்தால் மட்டுமே இந்த வைட்டமினை மாத்திரை வடிவில் உண்ண வேண்டும். பொதுவாக, ஆரோக்கியமான ஒருவருக்கு உணவின் மூலமே தேவையான நியாசின் கிடைத்துவிடும் என்பதால் அச்சப்பட வேண்டியதில்லை.

எக்ஸ்பர்ட் விசிட்

டெல்லியைச் சேர்ந்த இந்தியாவின் புகழ்பெற்ற ஊட்டச்சத்து நிபுணர் ரூபாலி தத்தாவிடம் அவரின் ஃபிட்னெஸ் ஃபுட் சீக்ரெட் பற்றி கேட்டபோது சொன்னது இது… ‘தினசரி நான் எப்போதும் அளவாகவே உண்பேன். ஒரு உணவு இடைவேளைக்கும் இன்னொரு உணவு இடைவேளைக்கும் ஐந்து மணி நேரம் இருக்கும்படி பார்த்துக்கொள்வேன். தினசரி உணவில் புரோட்டின் கண்டிப்பாக நிறைந்திருக்க வேண்டும் என்று நினைப்பேன். பால், பழங்கள் ஆகியவை நிச்சயமாக இருக்கும். பழங்கள், காய்கறிகள் சாப்பிடுவது ஆரோக்கியமான வாழ்க்கைக்கு மிகவும் அடிப்படை. யோகா செய்யும்போது வெறும் வயிற்றில் செய்வதே நல்லது.

அதிகாலையில் சிறிது தண்ணீர் குடித்துவிட்டு யோகா செய்யலாம். உடற்பயிற்சி, ட்ரெட் மில்லில் ஓடுவது என்றால் வெறும் வயிற்றில் செய்ய வேண்டாம். அதே சமயம் வயிறு முட்ட சாப்பிட்டுவிட்டும் உடற்பயிற்சி செய்ய வேண்டாம். நொறுக்குத் தீனிகள் அளவாகச் சாப்பிடுவதில் தவறு இல்லை. ஆனால் அதையே உணவாக்கிக்கொள்ள கூடாது. இனிப்புகளைத் தவிர்த்தாலே உடல் பெருக்காது. அதேபோல் ஃபாஸ்ட் ஃபுட், ஜங்க் ஃபுட்களிடம் எச்சரிக்கையாக இருக்க வேண்டும். சோளப் பொறி, சமோசா, பஜ்ஜி, போண்டா எல்லாம் உடல் எடையைக் கூட்டும் சமாசாரங்கள் என்பதால் அதில் கவனமாய் இருப்பேன்’ என்கிறார் ரூபாலி தத்தா

மரவள்ளிக் கிழங்கின் கதை

உலகில் அதிகம் உற்பத்தியாகும் உணவுப் பயிர்களில் மரவள்ளிக் கிழங்கும் ஒன்று. மரவள்ளிக் கிழங்கில் அரிசி உணவுகளுக்கு இணையான மாவுச்சத்து (கார்போஹைட்ரேட்) இருப்பதால் இதனை ஆப்பிரிக்கா போன்ற வறுமையான நாடுகளில் முக்கியமான உணவுப் பொருளாகப் பயன்படுத்துகிறார்கள். மரவள்ளியை தமிழில் ஏழிலைக் கிழங்கு என்றும் சொல்வார்கள். இதைத் தவிர குச்சிக் கிழங்கு, குச்சிவள்ளிக் கிழங்கு, மரச்சீனிக் கிழங்கு போன்ற பெயர்களும் இதற்கு உள்ளன. இது ஒரு இயுபோபியேசியே தாவரக் குடும்பத்தைச் சேர்ந்த செடி. தென் அமெரிக்காவையும் மேற்கு ஆப்பிரிக்காவையும் தாயகமாகக் கொண்டது.