இன்று உலகம் முழுவதும் வியப்புடன் உச்சரிக்கும் ஒரு சொல் பிளாக்ஹோல். ‘‘இந்தப் பிரபஞ்சமே ப்ளாக்ஹோல் எனப்படும் கருந்துளையில் இருந்துதான்  உருவானது...’’ என்கின்றனர் விஞ்ஞானிகள்.

‘பிங் பேங்’ தியரி  மூலமாக இந்த உலகம் உருவானது  என்றும், பிங் பேங்கிற்கு முன்பிருந்த அண்டம் கருந்துளையிலிருந்துதான் உருவானது என்றும் சொல்லப்படுகிறது. இப்படி எண்ணற்ற கருத்துகள் கருந்துளையைப் பற்றி இணையத்தில் கொட்டிக்கிடக்கின்றன.

இதுபோக ஸ்டீபன் ஹாக்கிங், ஜான் மிசைல், ஆல்பர்ட் ஐன்ஸ்டீன், கார்ல் ஸ்வார்ஸ்சைல்டு போன்ற உலகப் புகழ்பெற்ற விஞ்ஞானிகளும் அறிஞர்களும் பிளாக்ஹோல் என்கிற கருந்துளையைப் பற்றி நிறைய சொல்லியிருக்கின்றனர்.

ஹாலிவுட் சயின்ஸ் ஃபிக்சன் படங்களும் ஃபிளாக்ஹோலைப் பற்றி அதிகமாகப் பேசியிருக்கிறது. இருந்தபோதிலும் பெரும்பாலானவர்கள் பிளாக்ஹோலை ஒரு கற் பனையாக மட்டுமே நினைத்து வந்தனர். இந்நிலையில் பிளாக் ஹோலின் புகைப்படத்தை வெளியிட்டு அசத்தியிருக்கிறது ஒரு ஆய்வுக் குழு. இணையமெங்கும் அந்தப் புகைப்படம்தான் ஹாட் வைரல்.

தவிர, இந்தப் புகைப்படத்துக்காக இருபது நாடுகளைச் சேர்ந்த 200 விஞ்ஞானிகள்,  60 பல்கலைக்கழகங்கள் 15 ஆண்டு காலமாக  கடுமையாக உழைத்திருக்கின்றனர்.   இந்தப் புகைப்படம் எடுப்பதற்கான  செலவு 60 மில்லியன் டாலர்கள். இதில் 26  மில்லியன் டாலர்களை ‘National Science Foundation (NSF)’ என்ற அமைப்பு  கொடுத்துள்ளது.

புகைப்படத்தின் அளவு பெரியதாக இருந்ததால் அதைச் சுருக்கி வெளியிட்டுள்ளனர். சுமார் 5.2 கோடி ஒளி ஆண்டுகள் தொலைவில் இருக்கிறது இந்த பிளாக் ஹோல். ஒரு ஒளி ஆண்டு என்பது 9 லட்சத்து 46 ஆயிரம் கோடி கிலோ மீட்டர் தூரம் ஆகும்.