மீன்கள் அதிகம் கிடைக்கும் காலங்களில் அவற்றைப் பதப்படுத்தி பிறகு பயன்படுத்துவதற்கு, உப்பு சேர்த்து சூரிய ஒளியில் உலர்த்தி கருவாடு தயாரிப்பது பழைய முறை. இதுதான் பெரும்பாலும் அனைவருக்கும் தெரிந்த மீன் பதப்படுத்தும் முறை. 

அதைத் தொடர்ந்து வினிகர் சேர்த்து ஊறுகாய் போடும் முறை. இன்றைய நவீன உணவு யுகத்தில், மீன் முள், மீன் தோல், மீன் கண், மீன் கல்லீரல், மீன் கொழுப்பு, மீன் கழிவு என்ற மீனின் ஒவ்வொரு உறுப்பும் ஏதேனும் ஒருவகையில் பக்குவப்படுத்தப்பட்டு மதிப்பூட்டப்பட்ட பொருளாக விற்பனைக்கு வருகிறது. 

மீன் சுரிமியில், 76% தண்ணீர், 15% புரதச்சத்து, 6.85 % கார்போஹைடிரேட் மற்றும் 0.9% கொழுப்பு உள்ளது. மீனிலுள்ள தசை நார்ப்பொருளில் இருக்கும் மையோசின் (Myosin) என்னும் புரதத்தின் அளவை வைத்தே, சுரிமி தயாரிப்பதற்குத் தேவையான மீன்கள் தேர்ந்தெடுக்கப்படுகின்றன. மீன் கழிவு, தோல், முள் போன்றவற்றை நீக்கியபிறகு கிடைக்கும் சதைப்பகுதியில் 70 % தசை நார்ப்பொருள் இருக்க வேண்டும். 

அப்போதுதான் அதில் கிடைக்கும் 50-60% மையோசின் புரதம், சுரிமி தயாரிப்பதற்குத் தேவையான கொழகொழப்பான பசை போன்ற தன்மையைக் கொடுக்கும். அதுவே, வெப்பப்படுத்தும்போது, திடமான மற்றும் மென்மையான சுரிமியை உருவாக்குவதற்குத் தேவையான மூலப்பொருளாக இருக்கிறது. 

சுரிமி செய்வதற்காகத் தேர்ந்தெடுக்கப்படும் மீன்கள், தோல், முள், குடல் பகுதி நீக்கப்பட்டு, நன்றாக சுத்தம் செய்யப்படுகிறது. பிறகு பல முறைகள் கழுவப்பட்டு கொழுப்பு, ரத்தம் போன்றவையும் நீக்கப்படுகிறது. இந்த சதைப்பகுதி, திருகுகள் மூலம் அழுத்தம் கொடுக்கப்பட்டு, அதிகப்படியான நீர் பிரித்தெடுக்கப்பட்டு, அடர்த்தியான மீன் பசை தயாரிக்கப்படுகிறது.

இந்தப் பசையுடன் உப்பு, உருளைக்கிழங்கு அல்லது மரவள்ளிக்கிழங்கின் ஸ்டார்ச், முட்டை வெள்ளைக்கரு, சோயாபுரதம் போன்றவை சேர்க்கப்பட்டு, தேவையான வடிவங்களில் வார்க்கப்பட்டு 18 டிகிரி வெப்பநிலைக்கும் கீழே உறைநிலையில் பதப்படுத்தப்படுகிறது. 

செய்வதற்குப் பயன்படுத்தப்படுகின்றன என்று கருதக்கூடாது. நண்டு, இறால் போன்ற கடல் உணவுகளும் சுத்தம் செய்யப்பட்டு, சதைப்பகுதி பதப்படுத்தப்பட்டு, சுரிமி தயாரிக்கப்படுகிறது. இவற்றில் போலிகளும் உண்டு. 

மீன் சுரிமியை துண்டுகளாக்கி, அவற்றின்மேல் நண்டின் நிறம் பூசப்பட்டு, நண்டின் சுவையும் செயற்கையாக சேர்க்கப்படுகிறது. இவை, மலிவு விலை சுரிமி உணவுகள் என்று விற்பனை செய்யப்படுகிறது. சுரிமி வாங்கி உபயோகப்படுத்துபவர்கள் இதில் கவனமாக இருக்க வேண்டும். 

மீன்கள் பொதுவாகவே முதல் தர புரத உணவுகள் வகையில் வருவதால், அத்தியாவசிய அமினோ அமிலங்கள் மற்றும் எளிதில் செரிக்கக்கூடிய புரதம் போன்றவை சுரிமி உணவில் கிடைத்துவிடுகின்றன. 

100 கிராம் சுரிமியில் ஏறக்குறைய 11 - 15 கிராம் புரதம் கிடைப்பதுடன், லியூசின், லைசின், வேலின் போன்ற முக்கிய அமினோஅமிலங்களும் உள்ளன. மேலும், 99 கிலோ கலோரி ஆற்றல், 1 கிராம் அளவில் பல்நிறைவுறா கொழுப்பு அமிலம் போன்றவையும் கிடைக்கிறது.