இன்றைய சுகாதாரச் சூழலில் “உணவு ஒவ்வாமை” (Food Allergy) என்பது அதிக கவனத்தைப் பெற்றுள்ள, ஆனால் இன்னும் பலரால் சரியாகப் புரிந்துகொள்ளப்படாத ஒரு சிக்கலான சுகாதாரப் பிரச்சினையாகும். உணவுக்குப் பின் உடலில் ஏற்படும் சீரற்ற மற்றும் தீவிரமான எதிர்வினைகள் சில நேரங்களில் உயிருக்கே ஆபத்தாக (Anaphylaxis) மாறக்கூடும். 

ஆகவே, இதன் மூலக்காரணம், அறிகுறிகள், கண்டறியும் முறைகள் மற்றும் சிகிச்சை உத்திகள் பற்றி சுகாதார நிபுணர்களும் பொதுமக்களும் தெளிவாகத் தெரிந்துகொள்வது மிகவும் அவசியமானதாகும்.

​உணவு ஒவ்வாமை மற்றும் உணவு பொறாமை ஆகிய இரண்டையும் பலர் குழப்பிக்கொள்கிறார்கள். ஆனால் இவை அடிப்படையில் வேறுபட்டவை. உணவு ஒவ்வாமை (Food Allergy) என்பது ஒரு குறிப்பிட்ட உணவுப் பொருளில் உள்ள புரதத்தை உடல் எதிர்ப்பு அமைப்பு (Immune System) தவறாக அடையாளம் கண்டு, அதற்கு எதிராகச் செயல்படும் நேரடி எதிர்வினையாகும். 

இது பெரும்பாலும் IgE எனப்படும் எதிர்வினை ஊக்கிகளால் தூண்டப்படுகிறது. இந்த நிலையில் தோல் தடிப்புகள், சுவாசம் மற்றும் செரிமானக் கோளாறுகள் ஏற்படுவதுடன், உயிருக்கு ஆபத்தான நிலை (Anaphylaxis) ஏற்படும் வாய்ப்பும் உள்ளது. 

இதற்கு மாறாக, உணவு ஏற்காமை (Food Intolerance) என்பது உடல், குறிப்பிட்ட உணவைச் செரிமானம் செய்யத் தேவையான என்சைம்கள் (Enzymes) குறைவாக இருப்பதாலோ அல்லது செரிமானக் கோளாறுகளாலோ ஏற்படும் பிரச்னையாகும். 

இது செரிமான மண்டலத்தில் மட்டுமே வெளிப்படுகிறது (உதாரணமாக, லாக்டோஸ் இன்டாலரன்ஸில் ஏற்படும் வயிற்று வலி மற்றும் வயிற்றுப்போக்கு). உணவு ஏற்காமையால் பொதுவாக உயிருக்கு ஆபத்து ஏற்படுவதில்லை. சுருக்கமாக, ஒவ்வாமை என்பது உடல் எதிர்ப்பு அமைப்பின் தவறு, ஏற்காமை என்பது செரிமான மண்டலத்தின் பிரச்னை.

உணவு ஒவ்வாமை என்பது ஒரு சாதாரண செரிமானப் பிரச்சினை அல்ல - அது உடல் எதிர்ப்பு அமைப்பின் தவறான செயல்பாடாகும். இது குழந்தைகளில் இருந்து பெரியவர்கள் வரை யாருக்கும் ஏற்படலாம்.

மருத்துவ ரீதியாகச் சரியான பரிசோதனை, தகுந்த ஆலோசனை, உணவைத் தவிர்ப்பதில் விழிப்புணர்வு, மற்றும் அவசர நிலைக்கான முன்னெச்சரிக்கை பற்றிய அறிவு - இவையே உணவு ஒவ்வாமையால் ஏற்படும் உயிராபத்துகளைத் தடுக்கின்ற முக்கியக் கருவிகளாகும்.