பெண்களின் வாழ்க்கை ஒரு இயற்கைச் சுழற்சி போலவே தொடர்ந்து மாறிக்கொண்டே செல்கிறது. குழந்தை பருவத்திலிருந்து மாதவிடாய் தொடக்கம், தாய்மை, குடும்பப் பொறுப்புகள் என பல்வேறு கட்டங்களை கடந்து, 40-45 வயதுக்குள் வரும்போது ஒரு புதிய மாற்றக் கட்டம் தொடங்குகிறது. 

இது பெரும்பாலும் முன்-மெனோபாஸ் (Perimenopause) என்று அழைக்கப்படுகிறது - அதாவது மாதவிடாய் முடிவதற்கு முன் உடல் அனுபவிக்கும் ஹார்மோன்கள் சார்ந்த மாற்றங்கள். இந்தக் காலத்தில் உயிரியல், மனநலம், உடல் வடிவம், பாலியல் வாழ்க்கை என பல பரிமாணங்களிலும் மாற்றங்கள் நிகழ்கின்றன.

பல பெண்கள் 40-45 வயதில் பாலுணர்ச்சி குறைவு அல்லது வலி உடனான உடலுறவு குறித்து புலம்புகிறார்கள். இது ஈஸ்ட்ரோஜன் குறைபாட்டால் யோனியின் ஈரப்பதம் குறைவதாலும், தசைச் சுருக்கம் ஏற்படுவதாலும் நிகழ்கிறது. இதுபோன்ற பிரச்சினைகள் “taboo” என கருதப்படுவதால் பல பெண்கள் அதை சொல்லாமல் தாங்கிக் கொள்கிறார்கள். 

ஆனால் உண்மையில் இது ஒரு சாதாரண உயிரியல் மாற்றம் - அதற்கான சிகிச்சைகள், ஈரப்பதம் தரும் கிரீம்கள், ஹார்மோன் மாற்று சிகிச்சைகள் போன்றவை கிடைக்கின்றன.பாலியல் ஆர்வம் என்பது உடலின் ஆரோக்கியமான உயிரியல் வெளிப்பாடு ஆகும். இது குறைபட்டால் தாழ்வு உணர்ச்சி அல்லது உறவுப் பிரச்னைகள் தோன்றலாம். எனவே இதைப் பற்றி திறந்த மனதுடன் மருத்துவரிடம் ஆலோசனை பெறுவது அவசியம்.

இந்த வயதில் மார்பக புற்றுநோய், கருப்பை வாயில் புற்றுநோய்  (Cervical cancer) ஆகியவற்றின் அபாயம் அதிகம். 

இங்கு “மெனோபாஸ்” என்றால் “நிறுத்தம்” அல்ல; இது புதிய வாழ்க்கையின் அத்தியாயம் - அனுபவம், ஞானம், தன்னம்பிக்கை நிறைந்த கட்டம். ஒவ்வொரு பெண்ணும் தன்னுடைய உடல் மாற்றங்களை வெட்கமின்றி ஏற்றுக் கொண்டு, மருத்துவ அறிவை பயன்படுத்தி ஆரோக்கியமாக வாழ்ந்தால், 40 வயதுக்குப் பின் வாழ்க்கை இன்னும் அழகாகவும் அமைதியாகவும் மாறும்.