ஹேப்பி ஹேர் கலரிங்!

நீண்ட கூந்தல் வளர்ப்பு பழைய பஞ்சாங்கம் ஆகி பல வருடங்கள் ஆன நிலையில், தற்போதைய புதிய டிரண்ட், விதவிதமாக கூந்தல் நிறத்தை அழகுப்படுத்திக் கொள்வதே. இவ்வாறு அடிக்கடி ஹேர் கலரிங் செய்து கொள்வது, ஆபத்தில் முடியும் என்று எச்சரிக்கின்றனர் சரும மருத்துவர்கள்.  முன்பெல்லாம் இளநரை அல்லது குறைந்த வயதில் முடி நரைத்துப் போனவர்கள் ஹேர் டை உபயோகிப்பார்கள். 

ஆனால், தற்போது அப்படியில்லை, தங்களது தலைமுடியை ஆரஞ்சு, நீலம், பிரவுன் என்று பல வண்ணங்களில் அழகுபடுத்திக் கொள்வதே அழகு என்று உலாவருகிறார்கள். இளைஞர்கள் பலரும் அதில் நிறைந்திருக்கும் ஆபத்தை உணராமலே. ஏனென்றால், ஹேர் கலரிங் செய்வதற்காக பயன்படுத்தும் வண்ணங்களில் இருக்கும் வேதிப் பொருட்கள், 
உடலில் பலவித பிரச்னைகளை உருவாக்குகிறது. 

பொதுவாக, கருப்பு நிறத்தில் இருந்து அதிக வேறுபாடு இல்லாமல் லேசான மாற்றம் செய்தால் எந்த பிரச்னையும் வராது என்றும் நிபுணர்கள் கூறுகின்றனர். அதுவே, வாரத்திற்கு ஒருமுறை, மாதம் ஒருமுறை அல்லது நீண்ட நாட்கள் என்று அவர்களது விருப்பத்துக்கேற்றவாறு, கூந்தலின் இயற்கையான நிறத்திலிருந்து முற்றிலும் அடர்ந்த நிறங்களுக்கு மாற்றும்போது நாளடைவில் பலவித உபாதைகளை சந்திக்க நேரிடும் என்று எச்சரிக்கின்றனர்.