இன்றைய அறிவியலின் அதீத வளர்ச்சியின் கண்டுபிடிப்புகளில், செல்போன் பயன்பாடும் ஒன்று. உட்கார்ந்த இடத்திலிருந்தே அனைத்து தேவைகளையும் நிறைவேற்றிக் கொள்ள உதவும் செல்போன் நம்மை ஒருபுறம் சோம்பேறியாக மாற்றினாலும் இன்னொருபுறம் நமக்கே தெரியாமல் செல்போனுக்கு அடிமையாக்கிவிட்டது. 

இந்த நிலை குழந்தைகளையும் விட்டு வைக்கவில்லை. அதிலும், தற்போது, பள்ளிகளில் கோடை விடுமுறை தொடங்கிவிட்டதால், குழந்தைகள் அனைவரும் செல்போனிலேயே மூழ்கிக் கிடக்கும் நிலை உருவாகியுள்ளது.

இவ்வாறு குழந்தைகள் அதிகநேரம் செல்போன் பார்ப்பதால் என்னென்ன பாதிப்புகள் ஏற்படுகின்றன. எந்த வயது குழந்தைகள் எவ்வளவு நேரம் மொபைல் போன் பார்க்கலாம், செல்போனை தவிர்க்கும் வழிகள் என்ன போன்றவற்றை நம்முடன் பகிர்ந்து கொள்கிறார் குழந்தைகள் நல மருத்துவர் அமுதாதேவி.முன்பெல்லாம் குழந்தைகளுக்கு சோறு ஊட்டும்போது நிலாவை காட்டுவதும், காக்கா கதை சொல்வதும் வழக்கமாக இருந்தது.

இப்போதெல்லாம் குழந்தைகளுக்கு சோறு ஊட்டுவதற்கும், அவர்களை சமாதானப்படுத்துவதற்கும் ஒரு கருவியாக கைப்பேசி மாறிவிட்டது. அங்கிருந்தே குழந்தைகளின் செல்போன் பயன்பாடு தொடங்கிவிட்டது.

அதிலும் குறிப்பாக சின்ன குழந்தைகளுக்கு அதிகளவு ஆபத்தை ஏற்படுத்தும். ஏனென்றால் குழந்தைகளின் மூளை பெரியவர்களின் மூளையை விட இரண்டு மடங்கு அதிகளவு கதிர்வீச்சுகளை உறிஞ்சக்கூடிய சக்தி கொண்டது. 

இதனால் குழந்தைகளின் வழக்கமான நடவடிக்கைகள் கூட சில நேரங்களில் பாதிக்கக்கூடும். இது தெரியாமல் பெற்றோர் பலரும் குழந்தைகள் அழுகையை நிறுத்த பயன்படுத்தும் ஆயுதமாகவே செல்போனை உபயோகிக்கின்றனர்.

அதேபோல வீட்டில் உள்ள அனைவரும் ஞாயிற்றுக்கிழமைகளில், விடுமுறை தினங்களில் கைப்பேசியை பயன்படுத்தக் கூடாது என்று கட்டுப்பாடு நிர்ணயிக்க வேண்டும். இதற்கு பதிலாக பெற்றோர் தங்கள் குழந்தைகளை அருகில் உள்ள பூங்கா அல்லது வெளி இடங்களுக்கு அழைத்து செல்லலாம். 

அல்லது உறவினர்கள் வீட்டிற்கு அழைத்துச் செல்லலாம். இதனால் சமூகத்தில் எல்லோருடனும் எப்படி பழக வேண்டும் என்ற புரிதல் குழந்தைகளுக்கு ஏற்படும். இதன்மூலம் குழந்தைகள் வாழ்வியலை கற்றுக்கொள்வார்கள்.

பெற்றோரும் உடற்பயிற்சி செய்தல், புத்தகங்கள் வாசித்தல் போன்றவற்றில் ஈடுபட வேண்டும். மேலும், குழந்தைகளுக்கு கதை சொல்லுதல், கதை எழுதுதல், நீதி நெறிக் கதைகளை சொல்லித் தருதல், நீச்சல், தற்காப்பு கலைகள் போன்றவற்றை பயிலச் செய்ய வேண்டும். மேலும், தடகள போட்டிகளுக்கான பயிற்சிகளில் ஈடுபடுத்த வேண்டும். 

அதுபோன்று, இசைக் கருவிகள் வாசித்தல், வாய்ப்பாட்டு சொல்லித் தருதல் போன்றவற்றில் ஊக்கப்படுத்தினால் அவர்கள் சமூகத்தோடு கலந்து இந்த கலைகளை எல்லாம் கற்கும்போது, கைப்பேசி, தொலைக்காட்சியில் நேரத்தை செலவழிப்பது குறைந்துவிடும்.

இன்று உலகம் வீட்டுக்கு உள்ளே அதுவும் நம் உள்ளங்கையிலேயே சுருங்கிவிட்டது. இதனால், நம் பார்வையும் எண்ணமும் சுருங்கிவிட்டது. ஓடி ஆடி விளையாடுவதால் உடல் ஆரோக்கியம், மன ஆரோக்கியம், சமூகத்துடன் கலந்து வாழ்வது, தோல்வியை ஏற்கும் மனப்பக்குவம், வெற்றி பெற மீண்டும் மீண்டும் முயற்சிக்கும் தன்மை, விதிகளை மதிக்கும் பழக்கம், ஆரோக்கியமான ஆழ்ந்த தூக்கம், அதிகாலை கண் விழிக்கும் பழக்கம் போன்றவை இயல்பாகவே ஏற்படுகிறது.

 எனவே, குழந்தைகளை அதிகளவில் விளையாட்டில் ஈடுபடுத்தினாலே, செல்போன் பார்க்கும் நேரம் குறைந்துவிடும். அதற்கு வழிவகையை ஏற்படுத்தித் தருவதே பெற்றோரின் கடமையாகும்.