நவீன மருத்துவம் எவ்வளவோ முன்னேறிய இன்றைய நாட்களிலும் சின்னம்மை நமக்கு சவாலான ஒரு பிரச்சனைதான். என்னதான் தடுப்பூசி கண்டுபிடித்தாலும் இன்றும் பலருக்கும் சின்னம்மை பரவிக்கொண்டுதான் உள்ளது.

அம்மையை கடவுளோடு தொடர்புபடுத்தி வீட்டிலேயே வேப்பிலை கட்டி படுக்க வைத்ததெல்லாம் அக்காலத்தில் சுத்தமாகவும் ஒதுக்கமாகவும் இருக்க வேண்டும் என்ற புரிதலில்தான். வேப்பிலை மருத்துவக்குணம் கொண்டது என்பதால்தான் வேப்பிலைய அம்மைக்குப் பயன்படுத்தினார்கள். இன்று அம்மை குறித்த நவீன மருத்துவப் புரிதல் நன்கு உருவாகியுள்ளது. அது சார்ந்த விழிப்புணர்வு மக்களிடையே உருவாக வேண்டியது அவசியம்.

அமெரிக்காவில் உள்ள நோய்க் கட்டுப்பாடு மற்றும் தடுப்பு மையங்கள் அவ்வப்போது தடுப்பூசிகளைப் பரிந்துரைக்கின்றன.தடுப்பூசி போடுவதன் குறிக்கோளானது, பாதுகாப்பான மற்றும் திறமையான வழியில் சின்னம்மை நோய் மற்றும் அதன் விளைவுகளில் இருந்து மக்களைப் பாதுகாப்பதேயாகும்.

 உங்களுக்கு ஏற்கெனவே சின்னம்மை வந்திருந்தால், வேறு ஒருவரிடம் இருந்து உங்களுக்குப் பரவாது. நீங்கள் தடுப்பூசி போட்டுக் கொள்ளவில்லை என்றால் எந்த வயதிலும் சின்னம்மை உங்களைத் தாக்கலாம். சின்னம்மை நோய் வந்த பெரியவர்கள் உடல்நிலை மிகவும் சரியில்லாமல் போகலாம். எனவே, குழந்தைப் பருவத்தில் சின்னம்மை வருவது அல்லது அதைத் தவிர்க்க தடுப்பூசி போட்டுக்கொள்வது நல்லது.

சின்னம்மையின் மூன்று நிலைகள் சினப்பின் தோற்றத்தைப் பொறுத்தது. முதல் நிலை சிவப்பாகவும் மற்றும் கரடுமுரடாகவும் உள்ள சினப்பு. திரவம் நிறைந்த கொப்புளங்கள் கொண்ட சினப்பு இரண்டாவது நிலையாகும். மூன்றாவது நிலையில் கொப்புளங்கள் வெடித்து பொக்குகள் ஏற்படுவது.

எனக்கு இரண்டு முறை சின்னம்மை வருமா?ஒருவருக்கு இரண்டு முறை சின்னம்மை வருவது அசாதாரணமானது, ஆனால் அது நடக்கும்.