கண்ணைக் கட்டிக்கொள்ளாதே-ஆடிக் காற்றும் அலர்ஜி பிரச்சனையும்!

ஆடிக் காற்றில் அம்மியும் நகரும் என்பது பழமொழி. எங்கள் பகுதியில் சித்திரை பத்துக்கு மேல் சிறந்த பெருங்காற்று என்றும் சொல்வார்கள். ஆடி மாதம் தென்மேற்குப் பருவக்காற்று வீசக்கூடிய காலம். காற்றினை ரசித்து அனுபவிக்கும் அதே வேளையில், உங்கள் வீட்டுக்குள்ளும், பணியிடங்களிலும் தூசும் குப்பைகூளமும் அதிகம் சேர்ந்து தொல்லை தருவதையும் பார்த்திருப்பீர்கள். காற்று அதிகம் வீசும் இந்தக் காலகட்டத்தில் கண் மருத்துவராகிய நாங்கள் சந்திக்கும் நோயாளிகளில் சராசரியாக பத்தில் ஒருவராவது ஒவ்வாமை பிரச்சனையுடன் வருகின்றனர். தும்மல், மூச்சிரைப்பு இவற்றுடன் கண் ஒவ்வாமையின் பாதிப்பும் சித்திரை, ஆடி மாதங்களில் அதிகம் பார்க்கிறோம்.

கண்களில் அரிப்பு, சிவப்பு, கண்களில் இருந்து கண்ணீர் வடிதல், நூல் போல பீழை சாடுதல் (Ropy discharge) இவையே ஒவ்வாமையின் அறிகுறிகள். ‘‘எனக்கு எப்பவும் டஸ்ட் அலர்ஜி உண்டு டாக்டர்! தும்மலும் இளைப்பும் வரும். இந்த தடவை கண்ணும் ரொம்ப அரிக்குது” என்று நோயாளிகள் கூறுவதுண்டு.காற்று சில நேரத்தில் அதிகம் காணப்பட்டாலும் வருடத்தில் எப்பொழுது வேண்டுமானாலும், யாருக்கு வேண்டுமானாலும் ஒவ்வாமை வரலாம்.

தீராத ஒவ்வாமை சிலருக்கு மன உளைச்சலைக்கூட விளைவிப்பது உண்டு. ‘ ‘எங்க வீட்ல யாருக்குமே அலர்ஜி பிரச்சினையில்லை. எனக்கு மட்டும் ஏன் வருது?’’ என்பது பலரின் கேள்வி. ‘சூரியனுக்கு கீழே உள்ள அனைத்துமே, சூரியனுமேகூட ஒவ்வாமையைக் கொண்டுவரக்கூடும்’ (Everything under the sun, including the sun can cause allergy) என்பது மருத்துவத்துறையினர் அடிக்கடி கூறும் பொன்மொழிகளில் ஒன்று.

சிலருக்கு வெயில் பட்டால்கூட ஒத்துக்கொள்ளாது. தோலில் கொப்புளங்கள், வெடிப்புகள், அரிப்பு இவை தோன்றும். ஒருவருக்குப் பொருத்தமாக இருக்கும் உணவு மற்றவருக்கு ஒவ்வாமையை உருவாக்கக்கூடும். முட்டை, மீன், கத்தரிக்காய் போன்ற உணவுகளை உட்கொண்டு ஒவ்வாமை காரணமாக அவதிப்பட்டவர்களைப் பற்றிக் கேள்விப்பட்டிருப்பீர்கள்‌. எந்த வகைக் காளான் சாப்பிட்டாலும் ஒத்துக்கொள்ளாது என்று கூறுபவர்களும் உண்டு; எத்தனையோ முறை காளான் சாப்பிட்டிருக்கிறேன், குறிப்பிட்ட வகையை சாப்பிட்டதில் ஒத்துக்கொள்ளாமல் மருத்துவமனையில் சேரும் அளவிற்கு பாதிப்பு ஏற்பட்டது என்றவர்களும் உண்டு.

சிலருக்கு சில விதமான உடைகள் ஒத்துக்கொள்ளாது. பருத்தி உடை மட்டுமே அணிவார்கள். பட்டு, சிந்தெடிக் வகைகள் ஒவ்வாமை உண்டாக்கக்கூடும். தங்கம், வெள்ளியை சிலரது தோல் ஏற்றுக்கொள்ளும், கைக் கடிகாரத்தின் பட்டையில் இருக்கும் சிறிய உலோகம், சேஃப்டி பின் இவை தோலில் பட்டால் அரிப்பு உண்டாகும். இதை போலத்தான் கண்களுக்கும்.

தீராத கண் அரிப்பு மற்றும் சிவப்பால் அவதிப்பட்டு வந்தார் ஒரு பெண். எங்கெல்லாமோ அலைந்தேன், எவ்வளவோ செலவழித்தேன் என்றார். பெரிய மருத்துவமனைகள் முதல் சிறிய கிளினிக்குகள் வரை அலைந்திருக்கிறார். யாரோ செய்வினைக் கோளாறால் வந்தது இது என்று சொல்ல, பேய் ஓட்டும் இடத்துக்குக்கூட போனாராம். அவர் என்னிடம் வருகையில், உங்கள் வீட்டில் நாய் பூனை எதுவும் வளர்க்கிறீர்களா என்று கேட்டேன்.

‘ ‘நாங்க வளர்க்கல… ஆனா ஒரு பூனை அப்பப்ப வந்து எங்க வீட்ல குட்டி போட்டுட்டுப் போகும். எனக்கு குழந்தைங்க கிடையாதா, அதனால் போயிட்டுப் போகுதுன்னு விட்டுடுவேன்” என்றார். உடன் வந்த அவரது தம்பி, ‘‘டாக்டர் நீங்க சொல்றது கரெக்ட். எப்பெல்லாம் அந்தப் பூனை வருதோ அப்பதான் இவங்களுக்கு இந்தத் தொந்தரவு ரொம்ப அதிகமா இருக்கு” என்றார். விலங்குகளின் ரோமம் குறிப்பாக பூனைகளுடைய மெல்லிய ரோமம், பஞ்சு பொம்மைகள் இவை  பலருக்கு ஒவ்வாமையை ஏற்படுத்தக் கூடும்.

‘உங்கள் நலனில் அக்கறை இருந்தால் அந்தப் பூனைக்கு நல்லதாக வேறு ஒரு வாழ்விடத்தை கண்டுபிடித்துக் கொடுங்கள்’ என்றேன் அவரிடம். ‘அதை எப்படித் துரத்துவது?’ என்று மனமில்லாமல் கூறிச் சென்றார். அதன் பின்னும் அவ்வப்போது சிகிச்சைக்காக வருவார். ஓரிரு ஆண்டுகளில் அந்தப் பூனை தானாகவே போய்விட்டதாம். பத்து வருடங்கள் இருக்கும். அன்றிலிருந்து இன்று வரை ஒரு முறைகூட ஒவ்வாமை வரவே இல்லையாம்.