உலகிலேயே பெண்களுக்கு எதிரான குற்றங்களும், அடக்குமுறைகளும் அதிகமாக நடக்கும் நாடுகளில் ஒன்று, செனகல். குழந்தைத் திருமணமும் அதிகமாக நடக்கும் நாடும் இதுவே. திருமணத்துக்கு முன்பு பெண்கள் அனுபவிக்கும் பாலின ரீதியான துன்புறுத்தல்களை வார்த்தைகளால் விவரிக்க முடியாது. 

இப்படி பெண்களுக்கு எதிரான குற்றங்களையும், அடக்குமுறைகளையும் குறைத்து பாலின சமத்துவத்தை ஏற்படுத்துவதற்காக செனகல் நாட்டில் கணவர்களுக்காக பிரத்யேகமாக ஒரு பள்ளியை நடத்தி வருகின்றனர். இந்தக் கணவர்களுக்கான பள்ளி நல்ல மாற்றத்தைக் கொண்டு வருவதாகவும் சொல்கின்றனர். 

செனகல் நாட்டின் குக்கிராமங்களிலும், சிறு நகரங்களிலும் பெண்களைக் கொடுமைப் படுத்தும் கணவர்களை அடையாளம் கண்டுகொண்டு, இந்தப் பள்ளிக்கு வலுக்கட்டாயமாக இழுத்து வந்து, அவர்களுக்கான பாடத்தைக் கற்பிக்கின்றனர். சில கணவர்கள் பள்ளியை விட்டு ஓடிவிடுவதும், தலைமறைவாகும் சம்பவங்களும் நடக்கின்றன.

மதுவுக்கு அடிமையானவர்களுக்கு மறுவாழ்வு மையம் இருப்பதுபோல செனகலில் கணவர்களுக்கு இந்தப் பள்ளி இருப்பதாகச் சொல்கின்றனர். இதுவரையில் கணவர்களுக்கான பள்ளியில் ஐந்தாயிரத்துக்கும் அதிகமானோர் படித்துவிட்டு, தங்களின் குடும்பத்தினருடன் இணைந்துவிட்டனர்.