கடந்த 1962ம் வருடம் மகாராஷ்டிராவில் உள்ள தானே மாவட்டத்தில் பிறந்தார், ரஜனி பண்டிட். நடுத்தரக் குடும்பத்தைச் சேர்ந்த ரஜனியின் தந்தை குற்றப்பிரிவில் சப்-இன்ஸ்பெக்டராக வேலை செய்து வந்தார். 

சிறு வயதிலேயே துப்பறிவுத்துறையின் மீது ஆர்வமுடையவராக இருந்தார் ரஜனி. அவர் குடியிருந்த அடுக்குமாடி குடியிருப்பில் ஒரு பெண் இறந்துவிட்டார். அந்தப் பெண் உண்மையிலுமே இறந்துவிட்டாரா என்று அருகில் போய் கைகளைப் பிடித்துப் பார்த்திருக்கிறார் ரஜனி. அப்போது அவரது வயது 8. 

11 வயதிலேயே போலியான ஒரு பொருளைக் கண்டுபிடித்து சுற்றியிருந்தவர்களை வியப்பில் ஆழ்த்தியிருக்கிறார். எண்பதுகளில் மும்பையில் உள்ள ஒரு கல்லூரியில் மராத்தி இலக்கியம் படித்தார். அப்போது அவருடன் படிக்கும் சக மாணவிகளில் சிலர் மது அருந்துதல், புகைப்பிடித்தல் மற்றும் ஆண்களுடன் ஹோட்டல் அறைகளுக்குச் செல்லுதல் போன்ற செயல்களில் ஈடுபட்டனர். இது ரஜனியைக் கவலையடைய வைத்தது. 

ரகசியமாக அந்தப் பெண்களைப் புகைப்படம் எடுத்து, அவர்களுடைய பெற்றோர்களுக்கு அனுப்பிவிட்டார் ரஜனி. 

கல்லூரிக் காலத்தில் சக மாணவி ஒருவரின் வீட்டில் திருட்டுச் சம்பவம் நடந்தது. திருடியவர்களைக் கண்டுபிடிக்க அந்த மாணவி ரஜனியின் உதவியை நாடினார். ரஜனியும் திருடியவர்களைக் கண்டுபிடிக்க தன்னால் முடிந்த உதவிகளைச் செய்தார். இதுதான் அவரது முதல் வழக்கு. படிப்பு முடிந்ததும் ஓர் அலுவலகத்தில் குமாஸ்தா வேலைக்குச் சேர்ந்தார் ரஜனி. அவருடன் வேலை செய்த ஒரு பெண் வீட்டில் பணம் திருடு போய்விட்டது. 

திருடனைக் கண்டுபிடிக்க உதவி செய்யும்படியும், மருமகள் திருடியிருக்கலாம் என்றும் ரஜனியிடம் சொல்லியிருக்கிறார் அந்தப் பெண். அவரது குடும்ப உறவினர்கள் அனைவரையும் ரகசியமாக கண்காணிக்க ஆரம்பித்தார் ரஜனி. 

அந்தப் பெண்ணின் இளைய மகன்தான் திருடியிருக்கிறான் என்று கண்டுபிடித்து அசத்தியிருக்கிறார். திருடனைக் கண்டுபிடித்ததற்காக ரஜனிக்கு ஒரு தொகை வழங்கப்பட்டது. 

இதுதான் துப்பறியும் வேலைக்காக அவர் வாங்கிய முதல் சம்பளம். இதற்குப் பிறகு பல பெண்கள் துப்பறியும் பணிக்காக ரஜனியை நாடினார்கள்.ஒரு செய்தித்தாளில் ரஜனியைப் பற்றி துண்டுச் செய்தி வெளிவந்தது. இதைப் படித்த நிருபர் ஒருவர், தன்னுடைய சகோதரியின் கணவரை, அதாவது மச்சானைக் கண்காணிக்கும்படி ரஜினிக்கு ஒரு துப்பறியும் வேலையைக் கொடுத்தார். 

தொடர்ந்து நிறைய வழக்குகள் வர ஆரம்பித்தன. அதனால் 1986ம் வருடம் ‘ரஜனி’ஸ் புலனாய்வு பணியகம்’ எனும் தனியார் துப்பறியும் ஏஜென்ஸியைத் தொடங்கி, லேடி ஜேம்ஸ் பாண்டாக வலம் வந்தார். 

இந்த ஏஜென்ஸியை ஆரம்பிக்கும்போது ரஜனிக்கு வயது 24. தனது ஏஜென்ஸியை விளம்பரப்படுத்துவதற்காக ஒரு செய்தித்தாள் நிறுவனத்தை அணுகினார். ஒரு பெண் துப்பறிகிறார் என்பதை அந்த செய்தித்தாள்களின் எடிட்டர்களால் நம்ப முடியவில்லை. அதனால் விளம்பரம் செய்ய முடியாது என்று ரஜனியை நிராகரித்துவிட்டனர். 

துவண்டுபோகாத ரஜனி பல வழக்குகளைத் தீர்த்து வைத்து, தனக்கான அங்கீகாரத்தை, தானே தேடிக்கொண்டார். அவரது நேர்காணல்களுக்காக பல செய்தித்தாள்களும், பத்திரிகைகளும் வரிசையில் நின்றன. விளம்பரம் இல்லாமலேயே அவரை நாடி பலபேர் வந்தனர். மட்டுமல்ல, காவல்துறையே ரஜனியின் உதவியைத் தேடிச் சென்றது. 

ஏஜென்ஸி ஆரம்பித்த இரண்டாவது வருடத்திலேயே முக்கியமான ஒரு வழக்கு ரஜனியிடம் வந்தது. தன் குடும்பத்தைச் சேர்ந்த ஒரு நபர் கொல்லப்பட்டுவிட்டார், உறவினர்கள் மீது சந்தேகம் இருக்கிறது, கொலையாளியைக் கண்டுபிடித்துத் தரும்படி ரஜனியை அணுகியிருக்கின்றனர். 

கொலை நடந்த வீட்டுக்கே வேலைக்காரியாகச் சென்றார் ரஜனி. அந்தக் குடும்பத்தின் தலைவியால் நியமிக்கப்பட்ட ஒருவன்தான் கொலையாளி என்பதைக் கண்டுபிடித்தார். இந்தக் கொலை வழக்கு தொழில்முறை ரீதியாகவும் ரஜனிக்கு நல்ல பெயரை வாங்கிக் கொடுத்தது. 

2003ல் ரஜனியின் ஏஜென்ஸியில் 8 பேர் துப்பறியும் பணிக்கு நியமிக்கப்பட்டனர். தினமும் புதுப்புது வழக்குகள் வர ஆரம்பித்தன. 2010ல் ரஜனியின் ஏஜென்ஸியில் வேலை செய்யும் துப்பறிவாளர்களின் எண்ணிக்கை முப்பதாக உயர்ந்தது. குறைந்தபட்சம் மாதம் 20 வழக்குகளையாவது அவரது ஏஜென்ஸி துப்பறிந்தது. 

கடந்த 40 வருடங்களில் 80 ஆயிரத்துக்கும் மேலான வழக்குகளைத் தீர்த்து வைத்திருக்கிறார் ரஜனி. கணவனை ஏமாற்றும் மனைவி, மனைவியை ஏமாற்றும் கணவன், காணாமல் போகும் நபர்கள், குடும்பப் பிரச்னைகள், அரசியல் விசாரணைகள், நிறுவனங்களின் ஊழல்கள் மற்றும் திருட்டு, கொலைச் சம்பவங்கள் உட்பட பலவிதமான வழக்குகள் இதில் அடக்கம்.