‘‘இந்தியாவுல மொத்தம் 1,350 வண்ணத்துப்பூச்சி இனங்கள் இருக்கு. இதில் அழியும் தருவாயில் உள்ளவை மட்டும் 74 இனங்கள். இதுதவிர, மேற்குத் தொடர்ச்சி மலையில் மட்டும் 40 இனங்கள் அழிந்து வரும் நிலையில் இருக்கின்றன. மொத்தமாக 114 வண்ணத்துப்பூச்சி இனங்கள் இன்று அழியும் நிலையில் இருப்பது வேதனையான விஷயம்.

இதனை பாதுகாக்கணும்னு வலியுறுத்தியே, ஒரு விழிப்புணர்வை உருவாக்கும் பொருட்டு என் தூரிகை வழியே ஓவியமாக ஆவணப்படுத்தியிருக்கேன்...’’ ஆத்ம திருப்தியாகப் பேசுகிறார் ராகவன் சுரேஷ்.   

‘‘கடந்த 2017ம் ஆண்டிலிருந்து அழிந்துவரும் தாவரங்கள், வனவிலங்குகள், பறவைகளின் ஓவியங்களை வரைஞ்சிட்டே இருக்கேன். அதன் தொடர்ச்சியாகவே அரிய வகை மற்றும் அழிந்துவரும் வண்ணத்துப்பூச்சிகளைத் தேர்ந்தெடுத்தேன். இதனை கடந்த ஒன்றரை ஆண்டுகளாக வரைஞ்சு முடிச்சேன். 

இதற்காக வண்ணத்துப்பூச்சிகளைப் பத்தி நிறைய படிக்கவும் செய்தேன். உலகில் மொத்தம் 18 ஆயிரத்திற்கும் மேற்பட்ட வண்ணத்துப்பூச்சி இனங்கள் இருக்கு. இதில் இந்தியாவில் மட்டும் 1,350 வண்ணத்துப்பூச்சி இனங்கள் உள்ளன. மேற்குத் தொடர்ச்சி மலைனு பார்க்கிறப்ப 340 இனங்களும், தமிழ்நாட்டில் 329 இனங்களும் இருக்கின்றன. இதில் நான் அழிந்து வரும் அரிய வகைகளை மட்டும் தேர்ந்தெடுத்துக்கிட்டேன்.  

சயின்டிஃபிக்காக வரையும்போது நீளம், அகலம், உயரம்னு பல விஷயங்களை நாம் கணக்கில் கொள்ளணும். அதேபோல் வண்ணத்துப்பூச்சியின் ஆறு கால்கள், இரண்டு நீண்ட உணர்வுக் கொம்புகள், நான்கு இறக்கைகள், அதன் மேல் அமைப்பு, அதிலுள்ள விதவிதமான வண்ணங்கள்னு எல்லாவற்றையும் கவனிக்கணும். 

இருந்தும் வண்ணங்களைத் தீட்டும் போது நம்மால் 95 சதவீதமே கொடுக்க முடியும். ஏன்னா, இயற்கையை எப்போதுமே விஞ்சமுடியாது. அப்புறம் இதனை என்னுடைய சயின்டிஸ்ட் நண்பர்களிடம் காட்டி அவங்க ஒப்புதல் தந்தபிறகே வெளியே கொண்டு வந்திருக்கேன். 

ஆனா, கடந்த பத்து ஆண்டுகளாக வண்ணத்துப்பூச்சி இனங்கள் அழிஞ்சிட்டு வருது. இதுக்குக் காரணம் விவசாயத்தில் வேதிப்பொருட்கள் நிறைய பயன்படுத்துறதும், நகரமயமாக்கலுமே ஆகும். 

இந்தியாவில் சில மாநிலங்கள், வண்ணத்துப்பூச்சிகளின் முக்கியத்துவத்தை உணர்ந்து மாநிலத்திற்கான வண்ணத்துப்பூச்சிகளை அறிவிச்சிருக்காங்க. அந்தவகையில் தமிழ்நாடு அரசு கடந்த 2019ம் ஆண்டு, ‘தமிழ் மறவன்’ என்ற வண்ணத்துப்பூச்சிஇனத்தை மாநில வண்ணத்துப்பூச்சி இனமாக அறிவித்தது.இது அழியும் பட்டியலில் இல்லை. 

இருந்தும் நம் மாநில வண்ணத்துப்பூச்சி என்பதால் இதனை என்னுடைய பட்டியலில் சேர்த்து வரைஞ்சிருக்கேன். கேரளாவில், ‘மலபார் மயில்’ என்ற இனம் மாநில வண்ணத்துப்பூச்சியாக இருக்குது. இது அழியும் தருவாயில் உள்ளது. அதுவும் என் பட்டியலில் இருக்கு.