அவர்களுக்கு முன் விலையுயர்ந்த டெலஸ்கோப் ஒன்று வைக்கப்பட்டுள்ளது. 

அதனை ஆச்சரியம் பொங்க பார்ப்பவர்கள், அதன்வழியே வானத்தைப் பார்த்து இன்னும் வியப்பில் ஆழ்கின்றனர். அதில் அந்த அந்திசாயும் நேரத்து நிலவு, அவர்கள் தொட்டுவிடும் தூரத்தில் கண்சிமிட்டி சிரிக்கிறது.  

ஒவ்வொருவராகப் பார்த்து முடித்ததும் அவர்களுக்குக் கோள்கள், நட்சத்திரங்கள் குறித்த வானியல் விளக்கங்களை அத்தனை எளிமையாக புரிந்துகொள்ளும் வகையில் சொல்லித் தருகின்றனர் தமிழ்நாடு அஸ்ட்ரானமி சயின்ஸ் சொசைட்டியின் மாநில செயற்குழு உறுப்பினரான முத்துசாமியும், தூத்துக்குடி மாவட்ட அஸ்ட்ரோ கிளப் செயலாளர் முத்து முருகனும்.

இது தூத்துக்குடி மாவட்டத்தில் மட்டும் என்றில்லை. தமிழகத்தின் அனைத்து மாவட்டங்களிலும் உள்ள கிராமங்கள், பள்ளி, கல்லூரி வளாகங்களிலும் அந்தந்தப் பகுதியைச் சேர்ந்த வானியல் ஆர்வலர்களால் நடத்தப்படுவதுதான் ஆச்சரியமான செய்தி. இதனை அஸ்ட்ரோ கிளப்பின் வழியே முன்னெடுத்து வருகிறது தமிழ்நாடு அஸ்ட்ரானமி சயின்ஸ் சொசைட்டி எனும் அமைப்பு.

இதுக்கு முன்னாடி மாவட்ட அளவுல அந்தந்த மாவட்டப் பெயர்கள்ல அஸ்ட்ரோ கிளப் மட்டும் இருந்தது. இந்த அஸ்ட்ரோ கிளப்பை எட்டு ஆண்டுகளுக்கு முன்னாடி திருச்சியில் முதன்முதலாக நான் ஆரம்பிச்சேன். காரணம் எனக்கு வானியல் மேல் அதீத ஆர்வம். அதுமட்டுமில்லாமல் கடந்த 35 ஆண்டுகளாக அறிவியல் பிரசார பணிகளில் ஈடுபட்டுட்டு வர்றேன். அறிவியல் இயக்கத்திலும் இருந்தேன்.

இன்னைக்கு அறிவியல் ஆர்வம் மக்களுக்கு ஓரளவு இருக்கு. பள்ளி, கல்லூரிகள் மூலம் அவங்களுக்கு அந்த ஆர்வம் வந்திருக்கு. ஆனா, வானியல் குறித்த ஆர்வம் குறைவாக இருக்கு. அல்லது ஆர்வம் இருந்தாலும் அதை அட்ரஸ் பண்ணக்கூடிய அமைப்புனு எதுவும் இங்கில்ல.

இப்ப சந்திராயன் உள்ளிட்ட விஷயங்கள் வந்தபிறகு மக்களுக்கு வானியல் ஆர்வம் கூடியிருக்கு. அதனால் இதை ஃபோகஸ் பண்ணணும்னு நினைச்சு ஆரம்பிச்சதுதான் அஸ்ட்ரோ கிளப்.

உதாரணத்திற்கு ‘கோள்கள் திருவிழா’, ‘5 ஆயிரம் இடங்களில் அஸ்ட்ரானமி’ உள்ளிட்ட நிகழ்வுகளைப் பண்றோம். அதாவது இதன்வழியே பூமி என்றால் என்ன?, செவ்வாய் கிரகம் என்றால் என்ன... என்பதை அது சம்பந்தமான படங்களையும், தகவல்களையும் சொல்லி கோள்கள் பத்தின விழிப்புணர்வை பொதுமக்களிடம் கொண்டு சேர்க்குறோம்.

இப்ப மக்களிடையே நல்ல விழிப்புணர்வு வந்திருக்கு. இருபது ஆண்டுகளுக்கு முன்னாடி, சூரியகிரகணம் வரும்போது கிராமங்கள்லயும், நகரங்கள்லயும் வீட்டுக் கதவை அடைச்சு வச்சிடுவாங்க. அந்நேரம் உணவு சாப்பிடக்கூடாது, கிரகணம் முடிஞ்சதும் குளிச்சிட்டு சாப்பிடணும்னு இருந்தாங்க. 

ஆனா, இப்ப எல்லா மக்களும் சூரிய கிரகணத்தை பார்க்க விருப்பப்படுறாங்க. கொஞ்சம் கொஞ்சமாக அவர்களின் தவறான நம்பிக்கை குறைந்து வருவதை நாங்கள் பார்க்கிறோம். அவங்களுக்கு இதனால் எந்தப் பாதிப்பும் இல்லை என்பது தெரிஞ்சு பார்ப்பதற்கு முன்வர்றாங்க.