ஜூன் 1, 2025 அன்று மலையாள சினிமாவுக்கு மறக்க முடியாத வரலாற்று நாளாக மாறலாம். ஆம். அன்றைய தினம் ஒரு சில காரணங்களை முன்வைத்து மலையாள சினிமா உலகம் படப்பிடிப்புகளையும் தயாரிப்புகளையும் காலவரையின்றி நிறுத்த இருக்கிறார்கள். இதற்கு காரணமாக கழுத்தை நெரிக்கும் வரி மற்றும் நடிகர்களின் சம்பளம் என இரண்டு காரணங்களை முன் வைக்கிறார்கள். 

முழுமையான காரணம் என்ன... வரி பிரச்னை என்ன... நடிகர்கள் அப்படி என்ன சம்பளம் வாங்குகிறார்கள்... இந்த படப்பிடிப்பு மற்றும் தயாரிப்பு நிறுத்தம் மாற்றத்தை கொண்டு வருமா... உள்ளிட்ட வினாக்களுக்கு விடை சொல்கிறார்கள் கேரள சினிமாவின் முக்கிய தயாரிப்புத் தரப்புகள்.

‘‘பொழுதுபோக்கு வரி, பொருள் மற்றும் சேவை வரி ஆகிய இரண்டு வரிகளும் சேர்த்து ஒரு படத் தயாரிப்பில் 30% வரியாக மட்டுமே கட்ட வேண்டி இருக்கிறது.

ஓடிடி மார்கெட்டும் சொல்லிக் கொள்ளும்படி இல்லை. கிட்டத்தட்ட அடிமாட்டு விலைக்கு படத்தை கேட்கிறார்கள். ஒரு படத்தின் வசூல் மற்றும் பட்ஜெட் தாண்டி அதன் பிரபலம், டிரெண்ட் அடிப்படையில்தான் தற்சமயம் வாங்கப்படுகிறது. மற்ற மொழி சினிமா போல் இசை உரிமமும் இங்கே சரியாகச் சீரமைக்கப்படவில்லை. 

இதனால் மலையாள சினிமா மார்க்கெட் ரீதியில் இன்னமும் தடுமாற்றத்துடன்தான் இருக்கிறது. இதையெல்லாம் சீர் செய்ய நடிகர்கள் ஒத்துழைக்க வேண்டும். தங்கள் சம்பளத்தை குறைத்துக்கொள்ள அவர்கள் முன்வந்தால் எளிமையான பட்ஜெட்டில் நல்ல வருமானம் ஈட்டும் படங்களை தயாரிக்கலாம்.

இவை அத்தனையும் முன்வைத்து வரிகளை குறைக்கவும் நடிகர்களின் சம்பளத்தை குறைத்துக் கொள்ளவும் வேண்டி அனைத்துத் தயாரிப்புப் பணிகளையும் திரையிடல்களையும் ஜூன் ஒன்று முதல் நிறுத்த மலையாள சினிமா முடிவு செய்து இருக்கிறது...’’ என்கிறார் சுரேஷ்குமார்.

 ‘‘வாரத்துக்கு மூன்றுக்கும் மேலான படங்கள் வெளியாவதும் இந்த இழப்புக்குக் காரணம்...’’ என்றபடி தொடர்ந்து பேச ஆரம்பித்தார் சசி அயன்சிரா. இவர் மலையாள திரைப்படத் தயாரிப்பாளர் மட்டுமல்ல... 15க்கும் மேற்பட்ட படங்களின் விநியோகஸ்தரும் கூட.

‘‘இந்த வேலை - பணி நிறுத்தம் ஏற்கனவே எடுத்து வைத்திருக்கும் திரைப்படங்களை வெளியிடவும், அடுத்தடுத்து திரைப்பட வெளியீடுகளை கட்டுப்பாட்டுக்குள் கொண்டு வரவும் உதவும்.

ஒரு படம் ஓடி இரண்டு நாட்களை கடப்பதற்குள் அதனுடன் வெளியான மற்ற படங்களை ரசிகர்கள் மறந்துவிடுவார்கள் அல்லது இன்னொரு வாரம் முடிந்து அடுத்த படங்களுக்கான வெளியீட்டு வேலைகள் துவங்கி விடுகின்றன. இதில் தனியாக வந்தால் ஓரளவு வருமானம் ஈட்டும் படங்கள் வசூலை ஈட்ட முடியாமல் தத்தளிக்கின்றன. 

இவற்றையெல்லாம் சரிசெய்ய இந்த இடைவேளை நிச்சயம் அவசியம். நடிகர்கள் பான் இந்தியா மார்க்கெட் அளவுக்கு தற்போது தங்கள் சம்பளத்தை நிர்ணயிக்கத் துவங்கிவிட்டனர். ஒவ்வொரு மொழிக்கும் ஒவ்வொரு விதமான மார்க்கெட் நிலவரம் இருக்கும் பட்சத்தில் இந்திய அளவில் ஒரு படத்திற்கு வாங்கும் சம்பளமும், வெறும் மலையாள சினிமாவில் வெளியாகப் போகும் படத்திற்கு

வாங்கும் சம்பளமும் எப்படி ஒன்றாக முடியும்?

இவற்றையெல்லாம் கட்டுப்பாட்டுக்குள் கொண்டுவர பல கட்ட பேச்சுவார்த்தைகள் நடந்துவருகின்றன. முன்பு போலவே படத்தின் வெளியீடு,  நடிகர்களின் சம்பளம் மற்றும் மார்க்கெட் நிலவரம் என அனைத்தும் தயாரிப்பாளர்கள் முடிவு செய்தால்தான் செலவு செய்யும் பணத்திற்கு தகுந்த வருமானத்தை ஈட்ட முடியும்.

நடிகர்கள் சம்பளம் மற்றும் படப்பிடிப்பு செலவுகள் தென்னிந்தியாவிலேயே கேரளாவில்தான் குறைவு. இங்கேயே இந்த நிலையெனில் மற்ற மொழிகளின் நிலை என்ன? நினைக்கவே பயமாக இருக்கிறது.மற்ற மொழிகளில் வாரத்துக்கு சுமார் எட்டு படங்கள் கூட வெளியாகின்றன. கேரளா சினிமா போல் மற்ற தென்னிந்திய மொழிகளும் இப்படியான முடிவுகளை எடுக்க வேண்டும்...’’ என்கிறார் சசி அயன்சிரா.