வயது ஆக ஆக நம் உடலும், மனமும் வேகத்தைக் குறைத்து சோர்வாகத் துவங்கிவிடும். இதில் நீரிழிவு, தைராய்டு, உடல் பருமன், இதயப் பிரச்னை, இரத்த அழுத்தப் பிரச்னைகள் சேர்ந்தால் இன்னும் நம் வாழ்வியலில் சிக்கல் உண்டாகும்.

மருந்து , மாத்திரிகைகள், மருத்துவமனை இதற்கிடையில் பிடித்த உணவுகளையும் ஓரம் கட்ட வேண்டிய சூழல் மேலும் மன உளைச்சலைக் கொடுக்கும். ஆனால், கேரளா எர்ணாகுளம் பகுதியைச் சேர்ந்த பி.பி. சாந்தகுமாரி 76 வயது. மார்பகப் புற்றுநோயால் பாதிக்கப்பட்டு இன்று அத்தனையும் கடந்து ஆரோக்கியமாக இருக்கிறார் என்றால் நம்ப முடிகிறதா?!

ஆனால், சாந்தகுமாரி இதனை பெரிதாக எடுத்துக்கொள்ளாமல் மருத்துவர் ஆலோசனைகளை தொடர்ந்து பெற்று கீமோதெரபிக்கு மாற்று என்ன என யோசிக்கத் துவங்கினார். அவருடைய தேடலுக்கு பதில் கிடைத்தது. 

யோகா, இயற்கையான மசாஜ், எண்ணெய்க் குளியல்கள், வெப்பக் குப்பிகள் தெரபி என பழங்கால மருத்துவத்தை தேர்வு செய்தார் சாந்தகுமாரி.

மார்பக நீக்கத்திற்குப் பிறகான ரேடியேஷன் கீமோதெரபியைதான் சாந்தகுமாரி தவிர்த்து ஆயுர்வேத முறைகளுக்கு தன்னை மாற்றிக் கொண்டார். அத்தனையும் இயற்கையான பழங்கால கேரள மருத்துவமுறைகள், உணவுப் பழக்கங்கள் உடன் யோகா, ஹீலிங் தெரபிகள் எடுத்துக் கொண்டார். 

‘‘2002ம் ஆண்டு இந்த சிகிச்சை எடுத்துக்கிட்டேன், இப்போ 22 வருடங்கள் ஓடிடுச்சு. என்னால் இப்ப ஜிம்மில் வெயிட் கூட தூக்க முடியும்...’’ பெருமையுடன் சொல்கிறார் சாந்தகுமாரி. ‘‘என் கணவர் சி.ஆர்.என்.பனிக்கர். என்னுடைய எந்த முடிவுக்கும் செவி சாய்த்து பக்கபலமாக நின்றார். உண்மையில் அவர் கொடுத்த ஊக்கம்தான் இன்று நான் இவ்வளவு வலிமையுடன் நிற்கக் காரணம்.

இரண்டு வருடங்களுக்கு முன்பு அவர் இறந்துவிட்டார். ஆனால், இறக்கும் நொடி வரை எனக்கு அவர் கொடுத்த ஊக்குவிப்பு, அவருக்குப் பிறகு என் மகள்கள் இருவர் ஷாலினி ராக்கேஷ் மற்றும் மாலினி எஸ் ஒன்றிணைந்து என்னை பாதுகாத்து வருகிறார்கள். 

இருவரும் என் ஆரோக்கியத்தில் காட்டும் அக்கறை எனக்கே என் மீது நான் காட்டியதில்லையோ எனத் தோன்றும்...’’ நெகிழ்கிறார் சாந்தகுமாரி. சாந்தகுமாரி தனது புற்றுநோய் முழுமையாகக் குணமான பிறகும் சும்மா இல்லை. தனது மகள் ஷாலினியுடன் இணைந்து திருப்புனித்துறாவில் இருக்கும் ஜிம்மிற்கு தினமும் செல்கிறார்.