கல்யாண சமையல் சாதம்... ஜி20-யில் பிரமாதம்!

ஜி20 உச்சி மாநாட்டை பிரமாண்டமாக நடத்திக் காட்டியிருக்கிறது ஒன்றிய அரசு. சாப்பாட்டிலும்தான்!

ஜி20 மாநாட்டுக்காக பல்வேறு நாடுகளில் இருந்தும், முன்னணி தலைவர்கள் உட்பட சுமார் 10 ஆயிரம் பேர் தில்லிக்கு வந்ததை ஒட்டி அவர்கள் சாப்பிட லீலா பேலஸ், ஐடிசி ஹோட்டல்ஸ், ஹயாத் ரீஜென்ஸி, ஓபராய் ஹோட்டல்ஸ் உட்பட 11 நட்சத்திர ஹோட்டல்களில் அறைகள் ஒதுக்கப்பட்டன. இவர்களுக்கு உணவு பரிமாறும் பாத்திரங்களை தங்கம் மற்றும் வெள்ளி முலாம் பூசப்பட்ட உலோகங்களில் தயாரித்து வைத்தார்கள்.

இந்த தங்கம் மற்றும் வெள்ளி முலாம் பூசப்பட்ட பாத்திரங்களை ஹோட்டல்களுக்கு சப்ளை செய்யும் பொறுப்பை ஜெய்ப்பூரைச் சேர்ந்த Iris என்ற நிறுவனம் ஏற்றது. “இந்தியாவின் கலாசாரம் மற்றும் பாரம்பரியத்தை ஜி20 மாநாட்டில் கலந்துகொள்பவர்களுக்கு விளக்கும் வகையில் தட்டுகள், டம்ளர்கள், கோப்பைகள் போன்றவை வடிவமைக்கப்பட்டன. ஜெய்ப்பூர், உதய்ப்பூர், வாரணாசி மற்றும் கர்நாடக கலைநயத்தை பின்பற்றி இவை வடிவமைக்கப்பட்டன.

பெரும்பாலான பொருட்களில் நம் தேசிய பறவையான மயிலின் உருவத்தை கலையழகுடன் பொறித்தோம். பல்வேறு கட்ட தர சோதனைக்குப் பிறகே விருந்தினர்களின் டேபிளை இவை சென்றடைந்தன. இந்த தட்டுகள் மற்றும் கோப்பைகளில் தலைவர்கள் மற்றும் அவர்களுடன் வரும் விஐபிக்களுக்கு ‘மகாராஜா தாளி’ வகை விருந்து படைத்தோம்...’’ என்கிறது Iris நிறுவனம்.உணவுகளைப் பரிமாற பாத்திரங்களை பார்த்துப் பார்த்து தேர்ந்தெடுத்ததைப் போலவே உணவு வகைகளையும் பார்த்துப் பார்த்து சமைத்திருக்கிறார்கள்.