முதல் குற்றம் பண்ணியவரின் நேர்மையும்... நிறைய குற்றம் பண்ணியவரின் முதல் நேர்மையும் இணையும் புள்ளிதான் இந்தப் படம்!

‘‘சினிமாவில் போலீஸ் என்றாலே நமக்கு ஒரு கற்பனைத் தோற்றம் முன்னாடி வந்து நிற்கும். ஆனா, எங்க ஊர் மதுரை பக்கம் போலீஸ்காரர்களின் அணுகுமுறை எப்படி இருக்கும் என்பதை யதார்த்தத்துக்கு மிக அருகில் நெருங்கிச் சொல்லும் படம்தான் ‘கிரிமினல்’. நிச்சயமா அதகளம் செய்யும்...’’ என்ற முன்னோட்டத்துடன் பேச ஆரம்பித்தார் இயக்குநர் தட்சிணாமூர்த்தி ராமர். இதில் சரத்குமார், கெளதம் கார்த்திக், ஜனனி, ரவீணா ரவி ஆகியோர் முதன்மை வேடத்தில் நடிக்கிறார்கள்.

வழக்கமா போலீஸ் கதையில் துப்பாக்கிதான் இருக்கும். முதல் பார்வை போஸ்டரில் சைலன்சர் இருக்கிறதே?

இது வழக்கமான போலீஸ் கதை கிடையாது. எல்லோரும் சொல்ற வார்த்தை மாதிரி தெரியலாம். படம் பார்த்தால் உங்களுக்கே தெரியும். எங்க ஊர்ல போலீஸார் வழக்கை எப்படி கையாள்வார்கள் என்பதை காட்டவேண்டும் என்ற சிந்தனையில உருவான ஸ்கிரிப்ட் இது. அதுவும் டீக்கடையில் எதேச்சையாக உதிச்ச கதை என்றும் சொல்லலாம்.இன்னொரு யதார்த்தமான உண்மை என்னனு  பார்க்கும்போது, வழக்குனு வரும்போது போலீஸ் சினிமாத்தனமா துப்பாக்கி எடுத்துட்டு போய் நிக்கமாட்டாங்க. கையில இருக்கிற பிரம்பை எடுத்துதான் அடிக்கப் பார்ப்பாங்க.