தமிழுக்கு வரும் உலக மொழி களும்... உலகுக்கு செல்லும் தமிழ் மொழியும்!

46வது சென்னை புத்தகக் கண்காட்சி இனிதே நிறைவடைந்துள்ளது. இதில் கூடுதல் சிறப்பு இந்த ஆண்டு சென்னையின் முதல் சர்வதேச புத்தகக் கண்காட்சியும் இடையில் மூன்று நாட்கள் நடந்திருப்பதுதான். இதை பள்ளிக்கல்வித் துறை மூலம் தமிழ்நாடு அரசே நேரடியாக நடத்தியிருப்பது பெரும் வரவேற்பைப் பெற்றுள்ளது.  சர்வதேச புத்தகக் கண்காட்சி என்றதும் வெளிநாடுகளிலிருந்து பதிப்பாளர்கள் தங்கள் புத்தகங்களைக் காட்சிப்படுத்த கடைவிரிப்பார்கள் என்றே பலரும் நினைத்திருந்தனர். ஆனால், பதிப்புரிமையை விற்பதும், வாங்குவதுமான ஒரு செயல்பாடு என்பது கண்காட்சி தொடங்கிய அன்றே அனைவருக்கும் தெரிய வந்தது.

இப்போது 365 நூல்கள் பிறமொழிகளில் மொழிபெயர்ப்பு செய்யப் புரிந்துணர்வு ஒப்பந்தங்கள் போடப்பட்டுள்ளன. இதில் தமிழிலிருந்து 90 நூல்கள் உலக மொழிகளுக்கும், 60 நூல்கள் பிற இந்திய மொழிகளுக்கும், உலக மொழிகள் மற்றும் பிற இந்திய மொழிகளிலிருந்து 170 நூல்கள் தமிழுக்கும் மொழிபெயர்க்கப்பட உள்ளன. இது அருமையான தொடக்கம் என மெச்சுகின்றனர் பதிப்பாளர்களும், எழுத்தாளர்களும். இந்நிலையில், சர்வதேச புத்தகக் கண்காட்சியை ஒருங்கிணைத்தவர்களில் ஒருவரான ஆழி செந்தில்நாதனிடம் பேசினோம்.

‘‘ரொம்ப சந்தோஷமா இருக்கு. குறுகிய காலத்துல இந்தப் பணியை அரசுடன் இணைந்து செய்து முடித்தோம். சென்னையின் முதல் சர்வதேச புத்தகக் கண்காட்சி சிறப்பாக முடிஞ்சிருக்கு. இது தற்புகழ்ச்சியானதல்ல. இங்கே வந்திருந்த வெளிநாட்டுப் பதிப்பாளர்கள் அனைவரும் தங்கள் சமூக வலைத்தளத்தில் பாராட்டி தொடர்ந்து பதிவிட்டுட்டு வர்றாங்க. தமிழ்நாடு அரசின் முதல் முயற்சியே மிகப்பெரிய வெற்றியைப் பெற்றிருக்கு’’ என்கிறவரிடம் எப்படி தொடங்கியது இந்தப் பணி என்றோம்.  

‘‘மூன்றாயிரம் ஆண்டுகள் பாரம்பரியம் உள்ள தமிழ் மொழியினுடைய இலக்கியங்கள் உலக மொழிகளில் பெருவாரியாகப் போகல என்கிற வருத்தம் இங்க ரொம்ப நாட்களாக இருந்திட்டு வருது. இந்தக் குறையை முதல்ல தீர்க்கணும்னு தமிழ்நாடு அரசு நினைச்சாங்க. அதனால, தமிழ்நாடு அரசும் அதன் மூத்த அதிகாரிகளும் சென்னையில் சர்வதேச புத்தகக் கண்காட்சியை நடத்தணும்னு முயற்சி எடுத்தாங்க.

நான் பல சர்வதேச புத்தகக் கண்காட்சிகளை நேரில் சென்று பார்த்தவன். அந்த அனுபவத்திலும், இதை சென்னையில் நடத்தணும்னு கோரிக்கை வைத்ததில் ஒருவன் என்கிற அடிப்படையிலும் என்னை இதில் பங்களிக்க முடியுமானு கேட்டாங்க. நான் சர்வதேச பதிப்பகத் தொடர்புகள் பற்றின விஷயங்களில் பங்களிக்க முடியும்னு சொன்னேன். அதன்பிறகு தமிழ்நாடு அரசு உலகின் மிகப்பெரிய புத்தகக் கண்காட்சியான ஜெர்மனியின் ஃப்ராங்க்ஃபர்ட் புத்தகக் கண்காட்சிக்கு இங்கிருந்து ஒரு குழுவை அனுப்பினாங்க. அதனுடைய தலைவராக நூலகத் துறை இயக்குநர் இளம் பகவத் ஐஏஎஸ் இருந்தார். அந்தக் குழுவில் நானும் இருந்தேன்.

அங்க போய் அனைத்தையும் பார்த்தோம். பிறகு, இவ்வளவு பெரிய பிரம்மாண்டமான கண்காட்சியை நம்மால் சென்னையில் நடத்தமுடியுமா, எவ்வளவு நாட்கள் நடத்த முடியும் உள்ளிட்ட விஷயங்களை ஆலோசித்தோம். கடைசியில் சின்ன அளவிலாவது தொடங்கிடணும்னு முடிவெடுத்தோம்.அப்போதிலிருந்து நான் உள்பட பலரும் ஒரு குழுவாக உருவானோம். இளம் பதிப்பாளர்கள், பதிப்புத்துறையில் புதிதாக வந்தவர்கள்னு எல்லோரையும் அழைத்து ஒவ்வொரு விஷயத்திற்கும் தனித்தனியாக அணிகளை அமைத்து கடந்த ரெண்டு மாதங்களாக உறக்கமில்லாமல் பணியாற்றினோம்.

எல்லோரையும் சென்னைக்கு வரவழைத்து வேலைகளை முடித்து அனுப்பி வைக்கணும்னு திட்டம் வகுத்து செயல்பட்டோம். குறிப்பாக தமிழ்நாடு முதல்வர் மு.க.ஸ்டாலின், பள்ளிக்கல்வி அமைச்சர் அன்பில் மகேஸ் பொய்யாமொழி ஆகியோரின் முழுமையான ஆதரவுடன் இந்தக் குறுகிய காலத்தில் இதை நம்மால் செய்ய முடிந்தது.இதற்கு நல்ல வரவேற்பு கிடைச்சிருக்கு. அடுத்த ஆண்டு நிச்சயமாக இதைவிட இரண்டு அல்லது மூன்று மடங்கு கூடுதலாக பதிப்பாளர்கள் வருவார்கள்னு எதிர்பார்க்கலாம்...’’ என உற்சாகமாகச் சொல்லும் ஆழிசெந்தில்நாதன், சில விஷயங்களைப் பகிர்ந்தார்.  

‘‘பொதுவா, சர்வதேச புத்தகக் கண்காட்சி என்பது ஒரு வழக்கமான கண்காட்சி கிடையாது. புத்தகக் கண்காட்சினா நாம் பெரும்பாலும் புத்தகம் வாங்குறதுனு நினைச்சிட்டு இருப்போம். இது புத்தகங்களை வாங்கும் கண்காட்சி கிடையாது. அதேமாதிரி ஃபர்னிச்சர், எலக்ட்ரானிக்ஸ் கண்காட்சிகள் போல வெறும் பிசினஸ் நடக்கிற இடமும் கிடையாது. இது ஒரு பண்பாட்டு கண்காட்சி. தமிழ்நாட்டின் இலக்கியங்களை உலகம் முழுவதும் சென்று சேர்ப்பதற்கும், உலகம் முழுவதும் உள்ள புத்தகங்கள் தமிழில் வருவதற்கும் ஒரு பாலத்தை அமைக்கிற முயற்சிதான் இந்தக் கண்காட்சி.

தமிழ்ல நிறைய இலக்கியங்கள் அது நாவலாகவோ, கவிதையாகவோ, அல்லது மற்ற புத்தகங்களாகவோ இருக்கலாம். அது ஆங்கிலத்திற்கு போனது மிகக்குறைவு. மற்ற மொழிகளில் போனதை விரல்விட்டு எண்ணிவிடலாம்.அந்தக் குறையைத் தீர்க்கவே உலகம் முழுவதுமுள்ள பதிப்பாளர்களை இங்கே அழைத்து, அவர்களுக்கு நம் மொழியின் இலக்கியங்களை அறிமுகம் செய்து, உங்க மொழியில் இதனைக் கொண்டு போங்கனு சொல்ல வேண்டியிருக்கு. அதற்கு மொழிபெயர்ப்புக்கான உதவிகளும் நாங்கள் செய்கிறோம்னு சொல்லும்போது அவங்க உற்சாகமாக உள்ள வர்றாங்க. இதை மொழிபெயர்ப்பு நல்கை (Translation grants) திட்டம்னு சொல்றோம்.