பிரசவ ஆஸ்பிடலில் ஒரு லைப்ரரி! கர்ப்பிணிகளை படிக்கச் சொல்லி மிரட்டுகிறார் இந்த Lovable மருத்துவர்

குழந்தைக்கு அம்மா மற்றும் அப்பாவின் ஜீன் மூலமாக வரும் அனைத்தும் Genetics. கருவில் இருக்கும் சிசுவைச் சுற்றி நிகழும் விஷயங்களை தாயின் மூலம் உள்வாங்குவது Epigenetics.  சுருக்கமாக, தாயின் எண்ணங்கள் கருவில் இருக்கும் குழந்தைக்கு கடத்தப்படும். கருவுற்ற ஒரு பெண், தன் வாழ்க்கைமுறை வழியே, மரபணுக்களின் நினைவுத்திறனை மாற்றியமைக்க முடிந்ததையே epigenetics என்கின்றனர் மருத்துவ ஆராய்ச்சியாளர்கள்.

‘‘பெண் கருவுற்ற ஐந்து முதல் ஆறாவது மாதத்தில் தொடங்கி, குழந்தை தன் தாயைச் சுற்றி நிகழும் சூழலை உள்வாங்கத் தொடங்குகிறது. கர்ப்ப காலத்தில் இருக்கும் பெண்களை நல்லதையே பார், நல்லதையே கேள், நல்லதையே நினை, நல்லவற்றையே பேசு என நம் வீட்டுப் பெரியவர்கள் சொல்வது இந்த எபிஜெனடிக்ஸ் மாற்றத்தை ஏற்படுத்தவே...’’ என பேச ஆரம்பித்த தாய் சேய் மகளிர் நல மருத்துவர் சசித்ரா தாமோதரன், கோவை மாவட்டம் காரமடையில் நடத்திவரும் தன் மகளிர்நல மருத்துவமனையில் நூலகம் ஒன்றை குழந்தைகளின் எபிஜெனட்டிக்ஸ் நலனுக்காகவே இயக்கி வருகிறார்.

‘‘கர்ப்பகாலத்தில் இருக்கும் பெண்கள் புத்தகங்களைத் தேடிப் படித்தால், குழந்தையும் வெளி உலகத்திற்கு வந்தபிறகு புத்தகம் படிக்கத் தொடங்கும். அதனால்தான் என் மருத்துவமனையில் நூலகம் அமைத்திருக்கிறேன். இங்கு வரும் கருவுற்ற பெண்கள் தெனாலிராமன் கதை புத்தகத்தை எடுத்துப் படித்தால்கூட மகிழ்ச்சிதான்!

இந்த நூலகத்தில் மருத்துவம் சார்ந்த புத்தகங்கள் தவிர்த்து, ஆங்கிலம், தமிழில் புதினம், சிறுகதை, கவிதை, தத்துவம், இலக்கியம், பக்தி இலக்கியம், ஆன்மீகம், வரலாறு, தன் வரலாறு, இயற்கை மருத்துவம், கருவுற்ற மற்றும் குழந்தை பெற்ற பெண்களுக்குத் தேவையான ஆலோசனை புத்தகங்கள், பிறந்த குழந்தைக்கு பேர் வைப்பது தொடர்பான புத்தகங்கள், நோயாளிகளிடம் செவிலியர் நடந்து கொள்ளும் விதம்... என அனைத்துப் பிரிவிலும் புத்தகங்கள் இருக்கின்றன.

நூலகத்தை நிர்வகிக்க ஒரு நூலகரும் உண்டு. மருத்துவமனைக்கு வரும் கர்ப்பிணிகள் மட்டுமின்றி, வெளியில் உள்ள கருவுற்ற பெண்களும் நூலகத்தை பயன்படுத்திக் கொள்ளலாம். அனுமதி இலவசம். ஆனால், ஒரு கண்டிஷன். புத்தகத்தைப் படித்துவிட்டு அங்கேயே வைத்துவிட்டுச் செல்ல வேண்டும். மூன்றாம் தளத்தில் நூலகம் அமைக்கப்பட்டுள்ளது. லிஃப்ட்டைத் தவிர்த்து பெண்கள் படியேறி மூன்றாம் தளம் செல்ல வேண்டும்...’’ புன்னகைக்கும் சசித்ரா தாமோதரன், இந்த நூலகத்தில் வகுப்புகளும் நடைபெறுகின்றன என்கிறார்.