தென்னிந்திய திரையுலகின் ஆவணக் காப்பகம்!

‘‘வானம் வரை வளரவேண்டும்... நண்பர் ஞானம் அவர்களின் நிழற்பட ஞானமும், அவரது ஆயுளும்...’’ இது காவியக் கவிஞர் வாலியின் வாழ்த்து.‘‘‘ஃபிலிம் நியூஸ்’ ஆனந்தன் பாதையில் 86 ஆண்டுக் கால தமிழ் வரலாற்று நாயகர், நாயகிகளை தன் புகைப்படத் தொகுப்பு மூலம் மீண்டும் புத்துயிர் பெறச் செய்து இன்றைய தலைமுறையினர் அறிந்துகொள்ள உதவும் கலைப்பணி இது...’’ என புகழாரம் சூட்டுகிறார் சிவகுமார். இப்படி தமிழ்த்திரையுலகின் ஜாம்பவான்கள் பலரும் ஞானத்தை பாராட்டக் காரணமிருக்கிறது.

1940ல் ஆரம்பித்து இன்று வரை தமிழ், தெலுங்கு, கன்னட, மலையாளத் திரையுலகில் வெளியான திரைப்படங்கள், நட்சத்திரங்கள், இயக்குநர்கள், ஒளிப்பதிவாளர்கள், திராவிட இயக்கத் தலைவர்கள் என கறுப்பு வெள்ளை காலத்தின் பொக்கிஷப் புகைப்படங்களை இப்போதும் பாதுகாத்து, அதை பத்திரிகை மற்றும் சினிமா துறையினருக்கும் அளித்து வருகிறார் ஞானம் என்கிற ஞானப்பிரகாசம்.

வார, மாத, நாளிதழ்களில் வெளிவரும் திரையுலக ஜாம்பவான்களின் மலரும் நினைவுகள், அவர்களின் வாழ்க்கை வரலாறுகள், தொடர்கள் என சினிமா சார்ந்த வரலாற்றுப் பதிவுகள் இடம்பெறும்போதெல்லாம், அதற்கு புகைப்படங்களைக் கொடுத்து உதவுவது இவர்தான். அந்தக் கட்டுரைகளில் ‘படங்கள் உதவி: ஞானம்’ என வெளிவந்திருப்பதை நீங்கள் பார்த்திருப்பீர்கள். அந்த ஞானம் இவர்தான்.

மந்தைவெளியில் இருக்கிறது ஞானத்தின் ‘கலை’க்கூடம். வீட்டு ஹாலில் ஆரம்பித்து சமையற்கட்டு வரை எங்கும் பரந்து விரிந்திருக்கிறது பொக்கிஷ பதிவுகள். கறுப்பு வெள்ளையில் ஆரம்பித்து இன்றைய டிஜிட்டல் சினிமா ஸ்டில்கள் வரை குவியல் குவியலாக புன்னகைக்கின்றன.
இன்னொரு புறம், இவரால் பட உதவி செய்யப்பட்டு வெளியான புத்தகங்களின் அணிவரிசை. சாதாரண அவரது வீட்டின் அறைகள் டைம் ட்ராவல் மெஷின் அறை போல, ஃப்ளாஷ்பேக்கில் அழைத்துச் செல்வது நிஜம்.

‘‘முன்னாடியெல்லாம் பத்திரிகை ஆபீஸ், சினிமா கம்பெனிகள்னு படிப்படியா ஏறிப்போய் ஸ்டில்களை காப்பி போட்டு கொடுத்துட்டு வருவேன். இப்ப எல்லாருக்குமே மெயில் அனுப்புறேன். தவிர, ஒரிஜினல் ஸ்டில் மிஸ் ஆகிடுமோனு பயமும் இல்ல. ஒருமுறை ஸ்டில்ஸ் ரவி சார், அவர் எடுத்த போட்டோக்களை எல்லாம் ஆல்பம் பண்ணப் போனார். அப்ப அவரிடம் சில புகைப்படங்கள் விடுபட்டுப் போனதால், என்கிட்ட கேட்டார். நான் அதையெல்லாம் என் கலெக்‌ஷனில் இருந்து எடுத்துக் கொடுத்ததும், அவருக்கே ஆச்சரியம். அந்த நட்பில் அவ்வப்போது நலம் விசாரிப்பார். நிவார் புயல் டைமில் இந்தப் படங்களின் மீது அவர் காட்டிய அக்கறை அலாதியானது.