இந்த ஆண்டு ராமநவமி 2024 புதன்கிழமை பிறக்கிறது. அன்று மாலை 6:54 வரை நவமி இருக்கிறது. பகவானின் அவதார வைபவத்தில் மிக முக்கியம் அவனுடைய நட்சத்திரத்தை விட திதிதான். பகவான் 10 அவதாரங்களை எடுத்தான். அதில் இரண்டு அவதாரங்கள் பூரணமான அவதாரம் என்று போற்றப்படுகிறது. 

ஒன்று ராம அவதாரம். இரண்டு கிருஷ்ண அவதாரம். ராமன் நவமியிலும், கிருஷ்ணன் அஷ்டமியிலும் அவதாரம் செய்தான். இதனால், இந்த இரண்டு திதிகளும் பகவானின் பூரணமான அனுக்கிரகத்தைப் பெற்று ஸ்திதியாகியது. ஸ்ரீராம நவமியில் சிறப்புகள் குறிக்கும். ஸ்ரீராமபிரான் மற்றும் ராமாயணத்தோடு தொடர்புடைய திருத்தலங்கள் குறித்தும், முப்பது முத்துக்கள் தொகுப்பில் காண்போம்.

ஸ்ரீராமன் அவதரித்த வம்சம் ரகு வம்சம். சூரியனிலிருந்து தொடங்கும் வம்சம் ரகு வம்சம். கட்வாங்கனின் மகன் தீர்த்தபாகு மிகச் சிறந்த ஆட்சி செய்தான். இந்த மன்னனின் மகன் ரகுவின் பெயரால், ரகு வம்சம் என்று அழைக்கப்படுகிறது. காளிதாசன் தன்னிகரற்றதாகக் கருதப்படும் ரகுவம்சம் என்ற அற்புதமான காவியத்தை வடமொழியில் படைத்தான். 

சூரிய குலக் கொழுந்தான ராமருக்கு முன் அந்தக் குலத்தில் பிறந்தவர்களையும் ராமருக்குப் பின் அந்தக் குலத்தில் பிறந்தவர்களைப் பற்றியும் சிறப்பாக எழுதப்பட்ட காவியம் ரகு வம்சம். ராமனுக்கு முன்னும் பின்னும் இருக்கும் 32 அரசர்களைப் பற்றி ரகுவம்சத்தில் காளிதாசர் குறிப்பிடுகிறார். நடு நாயகமாக ராமனின் கதையைச் சொல்கிறார். ராகுவின் மகன் அஜ மகாராஜன். அஜனின் மகன்தான் ராமனின் தந்தையான தசரதன்.

ஸ்ரீராம நவமி இந்த ஆண்டு சித்திரையில் வருகிறது. சில வருடங்களில் பங்குனி மாதத்திலும் வரும். என்ன காரணம் என்றால், பங்குனி மாத அமாவாசைக்கு பிறகு சாந்த்ரமான முறையில் சித்திரை (சைத்ர) மாதம் தொடங்குகிறது. பங்குனி அமாவாசைக்கும், சித்திரை அமாவாசைக்கும் இடைப்பட்ட காலம் சைத்ரமாதம். அதில் வரும் வளர்பிறை நவமி ஸ்ரீராம நவமி.

ஸ்ரீராம நவமி அன்று காலையில் எழுந்து வீட்டை நன்றாக சுத்தம் செய்து, பின் நீராடி, நண்பகலில் ஸ்ரீராமநவமி பூஜை செய்ய வேண்டும். மிக முக்கியமாக பானகம், நீர் மோர் பாயாசம் வடை போன்றவற்றை நிவேதனம் செய்ய வேண்டும். அன்று ராம ஜனன ஸ்லோகமும், பூஜை முடிவில் பட்டாபிஷேக ஸ்லோகமும் பாடி முடிக்க வேண்டும். சிலர் பூஜையில் ராமரின் ஜாதகத்தை வைத்து பூஜிப்பார்கள்.

ஸ்ரீ ராமபிரானின் ஜாதகத்தை வீட்டில் வைத்து வழிபடும் வழக்கம் சிலரிடம் உண்டு. பகவான் ஸ்ரீ ராமபிரானுக்கு ஜாதகமா? என்று நினைக்கலாம். ஆம். ‘‘அஜாயமான பகுதா விஜாயாதே’’ (பிறப்பில்லாதவன் பல படியாக பிறக்கிறான்) என்று வேதவாக்கியம் (புருஷ சூக்தம்) சொல்வது போல, பகவான் மண்ணுய்ய, மண்ணில் மனிசருய்ய அவதாரம் எடுக்கின்றான். 

அப்படி அவதாரம் செய்கின்ற நேரத்தில் எந்தெந்த கிரக நிலைகள் எப்படி இருந்தன என்பதை நம்முடைய முனிவர்கள் பதிவு செய்திருக்கின்றார்கள். காலம் நடையாடும் தேசம் என்று இந்த பூலோகத்தைச் சொல்லுவார்கள். கர்மவினை அதிகரிப்பதும், அந்த கர்மவினை தீர்வதும் இந்த உலகத்தில்தான். அதற்கு காலம் துணை செய்கின்றது. அந்தக் காலத்தை கிரகங்கள் நிர்ணயிப்பதால், ஒவ்வொரு அவதாரத்தின் காலமும் மிகத் துல்லியமாக சொல்லப்பட்டு இருக்கிறது.

இந்த ஸ்ரீராமருடைய ஜாதகத்தை வைத்து தினசரி ஸ்ரீராமாயண ஸ்லோகங்களைச் சொல்லி வழிபாடு செய்வதன் மூலம், நம்முடைய கிரக தோஷங்கள் பாதிக்காது. வால்மீகி பகவான் ஸ்ரீராமனின் ஜனனத்தின் போது கிரகங்கள் எப்படி இருந்தன என்பதை விளக்குகின்றார். கடக லக்கனம். லக்கினத்தில் குருவும் சந்திரனும். 

கஜ கேசரியோகம். புனர்பூசம் நான்காம் பாதத்தில் அவதாரம் செய்தார் ராமர். எனவே, சந்திரனுக்கு வர்கோத்தம பலம் கிடைக்கும். அவர் பெயரே ராமச்சந்திரன் அல்லவா. சூரிய குலத்தில் உதித்தவர். அதனால் தந்தையின் வம்ச கௌரவத்தைச் சொல்லும் சூரியன் பத்தாம் இடத்தில் மேஷத்தில் உச்சம். நவமி திதி என்பதால் சூரியனுக்கும் சந்திரனுக்கும் 90 பாகைக்கு மேல் 120 பாகைக்குள் இடைவெளி இருக்கும். அப்படி இருந்தால்தான் நவமிதிதி வரும்.

ராமாயணம் மிக மிகப் பழமையான காவியம். ஆதி காவியம். இதிகாசம் என்பார்கள். (இரண்டு இதிகாசங்கள் 1. ராமாயணம், 2. மகாபாரதம்) வான்மீகி ராமாயணம்தான் அசல் ராமாயணம். நாரதர் சொல்லச் சொல்லச் எழுதினார் வான்மீகி. அதன் வடிவத்தைத்தான் நான் தமிழில் எழுதினேன் என்பது கம்பனின் வாக்குமூலம். 

‘‘தேவபாடையில் இக்கதை செய்தவர் மூவர் ஆனவர் தம்முளும் முந்திய நாவினால் உரையின் படி நான் தமிழ்ப் பாவினால் இது உணர்த்திய பண்பு அரோ!” (இதில் மூவர் என்பது வால்மீகி, வசிட்டர், வியாசர் ஆகிய மூவராகும். இதில் வியாசரை நீக்கி போதாயனரைச் சேர்த்து மூவர் என்று கூறுவோரும் உளர்), வடமொழியில் ராமாயணக் கதையைப் பெருங்காவியமாகப் பாடியதில் வான்மீகி, வசிட்டர், வியாசர், போதாயனர் ஆகிய மாமுனிவர்கள் முக்கியமானவர்கள்.

நாரதர் கூற அதைக் கேட்டு வட மொழியில் (சமஸ்கிருத மொழியில்) வால்மீகி முனிவர் பாடியுள்ள ராமாயணப் பெருங்காவியம் சிறப்பு மிக்க தாகும். மக்களிடையில் மிகவும் பிரபலமாகப் பரவியுள்ளதாகும். கம்பீரமான 24000 சமஸ்கிருத ஸ்லோகங்களைக் கொண்டதாகும். 

24 எழுத்துக் களைக்கொண்ட காயத்ரி மந்திரத்தின் விரிவு வால்மீகியின் ராமாயணம். இறைவன் ராமனாக அவதாரம் செய்தது. இறைவனின் மூச்சுக்காற்றான வேதம் ராமாயணமாக அவதாரம் செய்தது. கம்பராமாயணத்தின் தோற்றத்தைப் பற்றி தனிப்பாடல் ஒன்று இவ்வாறு குறிப்பிடுகிறது.

பெரும்பாலும் வால்மீகி ராமாயணத்தை அடிப்படையாகக் கொண்டுதான் எல்லா ஆசாரியார்களும் உரை விளக்கம் அளித்திருக்கிறார்கள். ஆயினும், ராமாயணத்தின் சுவை அறிந்த பலரும் ராமாயணத்தை பல்வேறு மொழிகளில் இயற்றியிருக்கின்றார்கள். நூற்றுக்கணக்கான ராமாயணங்கள் இருந்தாலும், ஒரு சில ராமாயணங்களே மக்களிடம் செல்வாக்கு பெற்று இருக்கின்றன. 

அந்த அடிப்படையில், துளசிதாசரின் ``ராமசரிதமானஸ்’’, கம்பன் தமிழில் எழுதிய ``கம்பராமாயணம்’’, தமிழில் அருணாச்சல கவிராயர் எழுதிய ``ராம நாடக கீர்த்தனை’’ முதலியவை பிரசித்திப் பெற்ற ராமாயணங்கள். இது தவிர ஆழ்வார்கள், ராமாயண நிகழ்வுகளை தங்கள் பாசுரங்களில் பாடி இருக்கின்றார்கள் அனேகமாக ராமாயண நிகழ்வுகளை பாடாத ஆழ்வாரே கிடையாது என்று சொல்லலாம்.

மூல ராமாயணமாகிய வால்மீகி ராமாயணத்திலோ, கம்பனின் ராமாயணத்திலோ இல்லாத பல நிகழ்வுகளும், ஆழ்வார்கள் தங்கள் பாசுரங்களில் சொல்லுகின்றார்கள். இது தவிர ராமாயண நிகழ்வுகளை பல தனிப் பாடல்களிலும், கீர்த்தனைகளிலும் பல மகான்கள் எழுதி வைத்திருக்கிறார்கள். 

17ஆம் நூற்றாண்டில் தமிழ்நாட்டில் திருவாரூரில் பிறந்த தியாகராஜ ஸ்வாமிகள், நூற்றுக்கணக்கான கீர்த்தனைகளை ராமன் மீது பாடியுள்ளார். ராமாயண நிகழ்வுகளை அவர் பாடிய கீர்த்தனைகளில் இருந்தே வரிசைப்படுத்தி ``தியாகராஜ ராமாயணம்’’ என்று பலரும் பாடுவது உண்டு. ஆழ்வார்களைப் போலவே தியாகராஜ சுவாமிகளும், மூல ராமாயணத்தில் இல்லாத பல நிகழ்வுகளை தம்முடைய கீர்த்தனை களில் பாடி இருக்கின்றார்.

சங்க இலக்கியத்தில் அகநானூறு என்ற இலக்கியத்தில் மிக அருமையான காட்சி ஒன்று. சமுத்திரத்தை கடப்பதற்காக ராமன் வானரசேனையோடு கடற்கரைக்கு வந்துவிட்டான். மிக நீண்ட கடலைப் பார்க்கும் பொழுது, எப்படி இந்த கடலைக் கடந்து, அந்தப் பக்கம் உள்ள இலங்கைக்கு செல்வது என்று ஆலோசனை நடத்துகின்றான். 

அப்படி மந்திர ஆலோசனை நடத்துகின்ற பொழுது மரத்தின் மீது பறவைகள் அமர்ந்து கிரிச்கிரீச் என்று சப்திக்கின்றன. அதனால் ராமன் என்ன பேசுகிறான், மற்றவர்கள் என்ன ஆலோசனை கூறுகின்றார்கள் என்பதை கேட்க இடையூறாக இருந்தது. உடனே ராமன் அந்தப் பறவைகளைப் பார்த்து ‘‘பேசக் கூடாது’’ என்கிற தொனியிலே கையை உயர்த்துகின்றான்.

மேலே சொன்ன பாடல் விவரிக்கும் காட்சி இது. ராவணன் சீதையை வான் வழியே கவர்ந்து செல்கின்றான். சீதை தன்னை யாராவது காப்பாற்ற மாட்டார்களா என்று கதறி அலறுகின்றார். புஷ்பக விமானத்தில் போகின்ற பொழுதுதான் எந்த பக்கத்திலே போகின்றோம் என்பதை ராமன் தெரிந்து கொள்ள வேண்டும் என்பதற்கு அடையாளமாக தன்னுடைய அணிகலன்களை எல்லாம் கழற்றி கீழே போடுகின்றாள்.

இந்த அணிகலன்களை எல்லாம் அந்த பகுதியிலே இருக்கக்கூடிய வானரங்கள் கையில் எடுக்கின்றன. குரங்குகளுக்கு எந்த அணிகலனை எங்கே அணிவது என்பது தெரியாமல் மாற்றி மாற்றி அணிந்து கொள்ளும் காட்சி பார்க்க நகைப்புக்கு உரியதாக இருந்தது என்பதை புறநானூற்று ஆசிரியர் சொல்லுகின்றார்.

மயங்குவாள்’’

 பகவானிடம் நேரடியாகச் செய்த சரணாகதி பலிக்கும் பலிக்காமலும் இருக்கும். ஆனால், பகவானின் அடியார்கள் மூலம் செய்த சரணாகதி பலிக்காமல் போகாது என்பது வைணவ தத்துவம். இங்கே அரக்கர்கள், பகவானின் அடியார்களான சுக்கிரீவன், அனுமன், அங்கதன் முதலி யோர்களின் வழியாக இராமனிடம் அடைக்கலம் கேட்கிறார்கள், பாசுரந் தொடங்கும்போதே “ஏத்துகின்றோம் நாத்தழும்ப இராமன் திருநாமம்” என்ற அழகை என் சொல்வோம்! 

“ராமோ ராமோ ராம இதி ப்ரஜாநாமபவந் கதா - ராமபூதம் ஜகதபூத் ராமே ராஜ்யம் ப்ரசாஸதி. (இராமபிரான் அரசாட்சி புரிந்த காலத்திலே ஜனங்களனைத்தின் வாயிலும் ஸ்ரீராம நாமத்தை தவிர வேறொன்றும் வந்ததில்லை, உலகமே ராம மயமாக ஆகிவிட்டது) என்றாப்போலே, இலங்கையும் ராமநாம மயமாக ஆய்விடுகின்றதிப்போது நாக்குத் தடிக்கும்படி ஸ்ரீ ராம நாமங்களையே சொல்லுகின்றார்கள்.

முன்பு ராவணன், கடும் தவம்செய்தான். பிறகு தனது பத்துத்தலைகளையும் மறைத்துக் கொண்டு நான்முகனிடம் சென்று, குறையாத வாழ்நாளும், உலகை வெல்லும் ஆற்றலும், வரம் வேண்டினான் அப்போது எம்பெருமான் ஒரு சிறு குழந்தை வடிவாய் அப்பிரமனுடைய மடியிலே உறங்குவான்போலே கிடந்தானாம். 

‘பத்துத் தலைகளையுடைய ராவணன், உருவத்தை மறைத்துக் கொண்டு உன்னை வஞ்சித்து வரம் வேண்டிக் கொள்ள வந்திருக்கிறான், இவனுக்கு நீ வரமளித்தால் பெருந் தீங்காய் முடியும் என்று தெரிவிப்பவன் போன்று, தன் திருவடியால், ராவணனுடைய பத்துத்தலைகளையும் எண்ணிக்காட்டினன் என்பதாக இவ்வரலாறு வழங்குகின்றது. அந்த திருவடியே நமக்கு சரண், அரண் எனப் பாசுரம் முடிகிறது. இந்த செய்தி ஆழ்வார் மட்டுமே சொன்ன செய்தி.

திருச்சித்ரக்கூடம் சோழ நாட்டு திருத் தலங்களில் ஒன்று. திருமங்கை ஆழ்வாரும் குலசேகர ஆழ்வாரும் பாடிய தலம். புகழ்பெற்ற நடராஜர் ஆலயத்திற்குள்ளேயே கிழக்கு நோக்கி தனி கொடிமரம், கோபுரத்தோடு உள்ள தலம். கோவிந்தராஜ பெருமாள் தேவாதிராஜன் என்று பெருமாளுக்குப் பெயர். சயன கோலம். 

இந்தத் தலத்தில்தான் குலசேகர ஆழ்வார் தம்முடைய இஷ்ட தெய்வமாகிய ராமன் கதையை முழு பதிகமாகப் பாடினார். ஸ்ரீ ராமாயணத்தின் முக்கியமான நிகழ்ச்சிகள் அத்தனையும் இந்தத் தலத்தில் குலசேகர ஆழ்வார் பாடினார். உத்தர காண்டச் செய்திகளும் குலசேகர ஆழ்வார் ராமாயணப் பதிகத்தில் இருப்பதால் இது முழுமையான ராமாயணமாக பாராயணம் செய்யப்படுகிறது.