புராணங்களின் அடிநாதம்

வணக்கம் நலந்தானே!

இந்த தேசத்தின் ஜீவநாடியாக, அடிநாதமாக ஆன்மிகம் என்கிற பெரிய மரபு யுகங்களாக ஓடிக்கொண்டிருக்கிறது. இந்த ஆன்மிக மரபே நம் தேசத்தை ஆதியிலிருந்து அடையாளப்படுத்தும் விஷயமாகும். சரி, இந்த ஆன்மிகம் எதை மையமாக வைத்து நிறுவப்பட்டுள்ளது?

வேதங்களைக் கொண்டு? சரி, இந்த வேதங்கள் யாரால் இயற்றப்பட்டன?

இது எவராலும் இயற்றப்படவில்லை? அண்டம் எனும் அகண்டத்திலிருக்கும் மந்திரங்களை ரிஷிகள் கிரகித்தார்கள். அவற்றை வியாஸர் நான்காகப் பிரித்துத் தொகுத்தார்.
இப்படிப் போய்த்தான் இந்திய ஆன்மிக மரபை புரிந்து கொள்ள வேண்டுமா? வேறு வழியே இல்லையா?

புராணங்கள் எனும் கதை ரூபத்தில் இந்த தேசத்தில் இத்தனை கடினமான விஷயங்களை கொழுக்கட்டைக்குள் பூர்ணம்போல கொடுத்திருக்கிறது. இந்த தேசத்தின் ஆன்மிக மரபையும், கலாச்சாரத்தையும், தர்மங்களையும், வேத, வேதாந்தங்களையும், யோக ரகசியங்கள் அனைத்தையும் கதை எனும் எளிய சர்க்கரை தடவியே ஆதிநாளிலிருந்து சொல்லப்பட்டபடியே வந்து கொண்டிருக்கிறது.