இறைச்சுவை இனிக்கும் இலக்கியத்தேன்-67 சிந்தையில் நிறைந்த ஸ்ரீராமர்!ஸ்ரீராம் ஜெய்ராம் ஜெய்ஜெய் ராம்

இந்த பக்தி நாமாவளி காற்றில் மிதந்து, காதில் புகுந்து, இதயத்தில் கலந்து உணர்வில் ஒன்றி ஒரு புதிய உத்வேகத்தை ஏற்படுத்துகிறதல்லவா?
ஆம்! அந்த அளவுக்கு ஆன்மிக அன்பர் களின் இதயத்தில் இரண்டறக் கலந்துள்ளது, ஸ்ரீராமாயணம்.ஜகம் புகழும் புண்ணிய கதையான அந்த ராமர் பெருமை கேட்காத இரு காது உலகத்திலேயே இருக்காது என்று சொல்லலாம். கருவில் இருந்த காலத்திலேயே திருமால் சரிதத்தைப் பிரகலாதன் கேட்ட பிரதேசம்தானே இது.‘கருவரங்கத்துள்  இருந்து கைதொழுதேன் திருவரங்க மேயான் திசை’
- என ஆழ்வாரும்,

கருவாய்க் கிடந்து உன் கழலே நினையும் கருத்துடையேன் என அப்பரும்
அற்புதமாகப் பாடுகிறார்கள்.ஞானபூமியான நம் இந்தியத் திருநாட்டில் நம் வாழ்விற்கு வழிகாட்டியாகத் திகழ்கின்றன ஆண்டவனின் அவதாரப் பெருமைகள். ஏழாவது அவதாரமாகச் சிறக்கும் ராம அவதாரம் மானுடத்தை நெறிப்படுத்த மாலவன் எடுத்த மகோன்னதப் பிறப்பு.
‘நடையின் நின்றுயர் நாயகன்’
- என கம்பர் ஸ்ரீராமரைக் காட்சிப் படுத்துகிறார்.

உலக வாழ்வில் உயர்ந்த நெறிகளை -தர்ம வழிகளைக் கடைப்பிடித்து வாழ் வாங்கு வாழ வேண்டும் என்பதை ஸ்ரீராமர் காட்டியுள்ளார்.‘ஒரு சொல் - ஒரு வில் - ஒரு இல்’ என்னும் உயரிய கோட்பாட்டை இறுதிவரை கடைபிடித்து ‘மானுடம் வென்றதம்மா’ என கம்பர் முழக்கமிடும் வண்ணம் அவதார நேர்த்தி கொண்டதே அரிய ராமரின் வரலாறு!
குகன் - வேடுவர் இனத்தைச் சார்ந்தவன்.
சுக்ரீவன்-குரங்கு இனத்தைச் சார்ந்தவன்.
விபீஷணன்-அரக்கர் இனத்தைச் சார்ந்தவன்.

ஸ்ரீராமர் அன்பால் அனைவரையும் சகோதரர் என ‘ஒரு சொல்’லால் தழுவிக் கொண்டார். கடைசிவரை அந்த ஒரு சொல்லில் இருந்து மாறுபடாதிருந்தார். ராம, லக்ஷ்மண, பரத, சத்துருக்கனர் என தசரத புத்திரர்கள் நால்வர் அல்ல. நீங்கள் மூவரும் சேர்ந்து ஏழுபேர் என இணைத்துச் சிறந்து இனிய வரலாறுதானே ஸ்ரீராமாயணம்.அவர் ஜெயராமராக விளங்கியதால் ஒரே அம்புதான்! எதிரியை வீழ்த்தினார்! தருமத்தை நிலை நிறுத்தினார்.