விஷ்ணு விஷால் நடிப்பில் ராம்குமார் இயக்கத்தில் வெளியான படம் ‘ராட்சசன்’. சூப்பர் ஹிட்டான இந்தப் படத்தில் இன்பராஜ் என்கிற ஆசிரியர் வேடத்தில் வில்லனாக நடித்திருக்கிறார் வினோத் சாகர். படம் பார்ப்பவர்களை பாதிக்க வைப்பதே ஒரு கதாபாத்திரத்தின் ஈர்ப்பு என்று சொல்லலாம்.

அப்படி பார்வையாலேயே மிரட்டும் ஆசிரியர் வேடத்தில் நடித்த வினோத் சாகரின் கதாபாத்திரம் பார்ப்பவர்களையும் கோபப்படவும், பாராட்டவும் வைத்தது. இதுதான் ஒரு நடிகருக்கு ரசிகர்கள் தரும் சிறந்த அங்கீகாரம். இந்த கதாபாத்திரம் கொடுத்த அடையாளம்தான் இப்போது தமிழ், தெலுங்கு, மலையாளம் என மூன்று மொழி படப்பிடிப்பு களுக்கும் பறந்து கொண்டிருக்கிறார் வினோத் சாகர்.

சவால்கள் நிறைந்த வேடங்களில் நடிக்க விருப்பம். அது நெகட்டிவ் வேடமாக இருந்தாலும் சரி, குணச்சித்திர கதாபாத்திரமாக இருந்தாலும் சரி. என்னுடைய ரோல் மாடல் ராதாரவி சார். கொடுத்த கதாபாத்திரத்தை சிறப்பாகச் செய்யக்கூடியவர்.

நாசர் சார் நடிப்பும் எனக்கு பிடிக்கும்.‘ராட்சசன்’ படத்தைப் பார்த்து ராதாரவி சார் பாராட்டியது என்னால் மறக்க முடியாது. ‘40 வருடத்தில் நான் எவ்வளவோ வில்லத்தனம் பண்ணியிருக்கிறேன். ஆனால், நீ பண்ண வில்லத்தனம் நான் பண்ண வில்லை. என்னை மிஞ்சிட்டடா’ என்று ராதாரவி சார் என்னைப் பாராட்டினார். மேலும், டப்பிங் யூனியனில் எனக்கு விருதும் கொடுத்தார்.