முன்பெல்லாம், குழந்தைகள் மைதானத்தில் விளையாடி, சைக்கிள் ஓட்டி, கவலையின்றி உற்சாகமானவர்களாக சுற்றி வந்தார்கள். ஆனால் இப்போது, பல குழந்தைகள் சின்ன வயதிலேயே குளுக்கோஸ் மீட்டர்கள், உணவுமுறை அட்டவணைகள் மற்றும் மருத்துவருடன் கலந்தாலோசனை சந்திப்புகள் என்ற நிலைக்கு வந்துவிட்டதை நாம் காண்கிறோம். 

குழந்தைகளிடையே அதிகரித்து வரும் சர்க்கரை நோய் மற்றும் வாழ்க்கை முறை தொடர்பான பிற உடல்நலப் பிரச்னைகள், குழந்தைகளின் வாழ்க்கை முறைகளும், சூழல்களும் எந்த அளவிற்கு மாறி வருகின்றன என்பதைக் காட்டுகிறது. குறிப்பாக வாழ்க்கைமுறை மாற்றங்களால் குழந்தைப் பருவத்தில் சர்க்கரை நோய் பாதிப்பு அதிகரித்து வருகிறது. 

கவலையளிக்கும் இந்த மாற்றத்திற்கான காரணங்களையும், தங்கள் குழந்தைகளின் நீண்டகால ஆரோக்கியத்தையும் மகிழ்ச்சியையும் மேம்படுத்த பெற்றோர் என்ன செய்ய வேண்டும் என்பதை அறிந்து கொள்வது இன்றைய காலகட்டத்தில் அத்தியாவசியமாகும் என்கிறார் குழந்தைகள் நல சிறப்பு மருத்துவர் எஸ். சத்யமானசா காயத்ரி வினய். அவர் நம்முடன் பகிர்ந்து கொண்டவை:

குழந்தைகளின் உடலுக்கு குளுக்கோஸை ஆற்றலாகப் பயன்படுத்த இன்சுலின் தேவை. உடல் இன்சுலினுக்கு சரியாக பதில்வினையாற்றாதபோது அல்லது போதுமான அளவு உற்பத்தி செய்ய முடியாதபோது, குளுக்கோஸ் உடலால் பயன்படுத்தப்படுவதற்கு பதிலாக ரத்தத்திலேயே தங்கிவிடுகிறது. 

நீரிழிவு உள்ள குழந்தைகள், புதிய பழங்கள், காய்கறிகள், முழு தானியங்கள் மற்றும் சிறுதானியங்கள் (கேழ்வரகு, சோளம், பழுப்பு அரிசி), புரதம் நிறைந்த உணவுகள் (முட்டை, பன்னீர், பருப்பு வகைகள், முளை கட்டிய பயறுகள்), மோர், தயிர், முந்திரி, பாதாம் போன்ற கொட்டை வகைகள் மற்றும் விதைகள், போதுமான தண்ணீர் ஆகியவற்றை உள்ளடக்கிய உணவை உட்கொள்ள வேண்டும்.

குறித்த காலஅளவுகளில் ரத்தசர்க்கரை பரிசோதனைகள், மருத்துவர் பரிந்துரைத்த மருந்து அல்லது இன்சுலின், வயதுக்கு ஏற்ற உடல் செயல்பாடு, சமச்சீரான உணவு, மற்றும் குழந்தைகளுக்கான நாளமில்லாச் சுரப்பி நிபுணரிடம் தவறாமல் தொடர்ந்து மருத்துவ ஆலோசனை பெறுவது ஆகியவை அவசியம். 

இதில் குடும்பங்களின் ஈடுபாடு பெரும் பங்கு வகிக்கிறது. பெற்றோர், குழந்தைகளிடம் கட்டுப்பாடுகளை விதிப்பதற்குப் பதிலாக, ஆதரவாகவும், அன்பாகவும் பேசி ஆலோசனை வழங்கும்போது குழந்தைகள் நீரிழிவு மேலாண்மையில் சிறப்பாகச் செயல்படுகிறார்கள்.

ஆம், நிச்சயமாக. முறையான கவனிப்புடன், இயல்பான வாழ்க்கையை சர்க்கரை நோய் உள்ள குழந்தைகளால் வாழ முடியும். இதற்கு விழிப்புணர்வு, சமநிலையான பழக்கவழக்கங்கள், உணர்வு ரீதியான ஆதரவு மற்றும் ஆரம்ப நிலையிலேயே சிகிச்சை மேலாண்மை ஆகியவை முக்கியம். குழந்தைப் பருவ சர்க்கரை நோய் என்பது கவலையளிக்கும் ஒரு விஷயமாக வளர்ந்து வருகிறது. 

ஆனால் கவனிப்பு, சமச்சீரான வாழ்க்கை முறை மற்றும் பெற்றோரின் ஆதரவான வளர்ப்பின் மூலம், குழந்தைகள் ஆரோக்கியமாகவும் சுதந்திரமாகவும் வளரமுடியும். அவர்கள் மற்ற குழந்தைகளைப் போலவே விளையாட, கற்றுக்கொள்ள, சிரிக்க மற்றும் மகிழ்ச்சியுடன் வாழ முடியும்; ஆனாலும் சற்று கூடுதல் விழிப்புணர்வுடனும் கவனிப்புடனும் இருக்க நாம் அவர்களுக்கு வழிகாட்ட வேண்டும்.