அப்போலோ மருத்துவ குழுமம் சார்பில் சென்னை கிரீம்ஸ் சாலையில் 35 படுக்கைகளுடன் கூடிய அப்போலோ ஆயுர்வைத் என்ற பிரத்யேக ஆயுர்வேத மருத்துவமனை தொடங்கப்பட்டுள்ளது. இம்மருத்துவமனையை அப்போலோ குழுமத்தின் நிறுவனர் -தலைவர் மருத்துவர் ப்ரதாப் சி.ரெட்டி தொடங்கி வைத்தார். 

இங்கு, எலும்பியல், நரம்பியல் மற்றும் நரம்பு சிதைவு கோளாறுகள், வளர்சிதை மாற்றக் கோளாறுகள், பெண்கள் ஆரோக்கியம், குழந்தைகளின் வளர்ச்சிக் கோளாறுகள், முதியோர் நலன், மலக்குடல் நோய்களுக்கான ஆயுர்வேத பாரா - சர்ஜிக்கல் சிகிச்சைகள், நாள்பட்ட காயங்கள், விளையாட்டு, தோல் நோயியல் மருத்துவம் மற்றும் சுவாசக் கோளாறுகள் உள்ளிட்ட பிரச்னைகளுக்கு ஆயுர்வேத சிகிச்சை மற்றும் சிறிய அளவிலான துணை நிலை அறுவைசிகிச்சைகளும் வழங்குகின்றனர். 

இம்மருத்துவமனையின் ஆயுர்வேத மருத்துவர், அஜித்குமார் விவேகானந்தன், பார்வை கோளாறுக்கு ஆயுர்வேத தீர்வு என்ன என்பது குறித்து நம்முடன் பகிர்ந்து கொண்டவை:

ஸ்கிரீன் டைம் என்று எடுத்துக் கொள்ளும்போது, மொபைல் ஃபோனை பார்ப்பது மட்டுமல்ல, எல்.இ.டி டிவி, எல்.இ.டி விளக்குகளின் அதிகபட்ச ஒளி போன்றவையும் கண்களை பாதிக்கிறது. காரணம், அல்ட்ரா வைலட் மற்றும் புளு ஸ்பெக்ட்ரம் அளவு எல்.இ.டி யில் அதிகமாக இருக்கும். 

நமது மூளை அதிகப்படியான அந்த வெளிச்சத்தை பார்க்கும்போது இரவாக இருந்தாலும் அதை பகல் பொழுதாக நினைத்துக் கொள்ளும். இதனால், கண்ணில் அதிக அழுத்தம் ஏற்பட்டு, விழித்திரையில் பாதிப்பு ஏற்படுகிறது. இதனால் தூக்கம் கெட்டு, மன அழுத்தம், உடல் சோர்வு போன்றவை ஏற்படுகிறது. இவைகளும் பார்வையை  பாதிக்கும்.

ஏற்கெனவே, இன்றைய நவீன உணவு பழக்கத்தினால் ஒருபுறம் நமது கண்கள் மெதுவாக பாதிக்கப்பட்டு வருகிறது. அதில் மேலும், பாதிப்பை ஏற்படுத்தும் வகையில் நாம் ஸ்கிரீனில் அதிகம் முழ்கி இருக்கும்போது கண்களுக்கு தேவையான ஓய்வு கிடைக்காமல் தூக்கம் பாதிக்கிறது. இதனால் விழித்திரையைச் சுற்றி உள்ள பகுதிகள் சுருங்கத் தொடங்கி பார்வையை பாதிக்கிறது. 

உதாரணமாக சொல்ல வேண்டும் என்றால், ஒரு கார் நூறு கிலோமீட்டர் வேகத்தில் செல்லும்படி தயார் செய்யப்பட்டுள்ளது. 

அந்த காரில் நாம் 200 கிலோமீட்டர் வேகத்தில் சென்றால் என்னவாகும் ஒருகட்டத்தில் காரின் பாகங்கள் எல்லாம் தனித்தனியாக பிய்த்துக் கொண்டு போய்விடும் அல்லவா அதுபோலத்தான் உடலும். உடலுக்கு இவ்வளவுதான் தாங்கக்கூடிய சக்தி இருக்கிறது எனும்போது, அதைத்தாண்டி நாம் அழுத்தம் கொடுத்தால், உடல் அதைத்தாங்கிக் கொள்ளும் சக்தியை இழந்து பிரச்னைகள்  ஆரம்பமாகிறது. 

சிகிச்சை முறை என்று எடுத்துக் கொண்டால், கண்ணில் அழற்சி ஏற்பட்டிருக்கிறதா, பித்தம் அதிகரித்திருக்கிறதா, கண்வீக்கம் அடைந்திருக்கிறதா அல்லது கண்ணில் உள்ள செல்கள் பாதித்திருக்கிறதா போன்றவற்றை ஆராய்ந்து அவரவரின் பார்வை குறைபாட்டுக்கு தகுந்த சிகிச்சைகள் மேற்கொள்ள வேண்டும். இன்றைய காலகட்டத்தில் கணினியில் அமர்ந்து வேலை பார்ப்பவர்கள் அதிகரித்துவிட்டனர். 

அவர்கள் ஸ்கிரீன் அதிகநேரம் பார்க்க வேண்டிய கட்டாயத்தில் இருக்கின்றனர், இவர்கள் கண்களை பாதுகாக்கும் ப்ளு ஸ்பெக்ட்ரம் பில்டர் கிளாஸ் அணிந்து வேலை செய்ய வேண்டும். பின்னர், முக்கால் மணி நேரத்துக்கு ஒருமுறை கணினியை விட்டு எழுந்து சிறிது நடந்துவிட்டு பின்னர் மீண்டும் தங்கள் பணியை தொடர வேண்டும். 

புடபாகம் என்ற சிகிச்சைமுறை, அஞ்சனம் என்ற சிகிச்சை முறை என பல வகையான சிகிச்சை முறைகள் ஆயுர்வேதத்தில் இருக்கிறது. அது அவரவர் பிரச்னைக்கு ஏற்ப உள்புற மற்றும் வெளிப்புற மருந்துகள் மூலம் சிகிச்சை முறைகளை பயன்படுத்துகிறோம். 

அதுபோன்று ஏதாவது நோய் காரணமாக மருந்து மாத்திரைகள் அதிகமாக சாப்பிட்டு வருபவர்கள், சர்க்கரை நோயாளிகள் போன்றோருக்கும் பார்வை குறைபாடு ஏற்பட அதிக வாய்ப்பு இருக்கிறது. இவர்கள், பெரும்பாலும் உணவுமுறையில் மாற்றங்கள் கொண்டு வந்தாலே கண் பிரச்னைகளை பெரும்பாலும் தவிர்த்துக் கொள்ளலாம். 

 பொதுவாக ஆயுர்வேத சிகிச்சையைப் பொருத்தவரை சிகிச்சை தொடங்கும்போது ஒருவரின் முழு வரலாறையும் தெரிந்து கொள்வோம். அதாவது, அவரது தினசரி பழக்கவழக்கங்கள் என்ன, தினசரி உணவுமுறை என்ன, அவர் என்னமாதிரியான வேலை செய்கிறார்கள். 

அவர்களுக்கு வேறு ஏதாவது பிரச்னை இருக்கிறதா, அவர்களது பரம்பரையில் யாருக்கேனும் பிரச்னை இருக்கிறதா, அவர்களது தூக்கப் பழக்கம் என்ன போன்ற அனைத்து தகவல்களையும் தெரிந்து கொண்டு முறையாக சிகிச்சையை தொடங்கும்போது, அவர்களது பிரச்னைகள் எல்லாம் சரியாகி ஆரோக்கியமாக வாழத் தொடங்குகின்றனர். 

அவ்வப்போது வெந்தயம் ஊற வைத்து சாப்பிட்டு வரலாம். இது கண்களுக்கு குளிர்ச்சித் தரக்கூடியது. கடுகு, உப்பு அதிகம்  சாப்பிடுவதை தவிர்க்க வேண்டும். 

தூசி, புகை அதிகமாக இருக்கும் இடத்தில் நிற்பதை தவிர்க்க வேண்டும். எல்.இ.டி விளக்குகளுக்கு பதில் மஞ்சள்நிற பல்புகள் பயன்படுத்தலாம். சிலர் பறவைகளை கூண்டில் வைத்து வளர்ப்பார்கள். அவர்கள் பறவைகளின் எச்சங்களை அவ்வப்போது சுத்தம் செய்து கொண்டே இருக்க வேண்டும்.

பறவைகளின் எச்சங்களினாலும் தொற்றுகள் ஏற்பட்டு  கண்கள் பாதிக்கும் வாய்ப்புகள் உண்டு.  அதிக சூடுள்ள தண்ணீரை தலைக்கு ஊற்றி குளிக்கக் கூடாது. அதிக சூடான தண்ணீர் கண்ணுக்குச் செல்லும் நரம்புகளை பாதிக்கும். எனவே, குளிர்ந்த நீரில் குளிப்பது நல்லது. அப்படி குளிர்ந்த நீரில் குளிக்க முடியவில்லை என்றால், அதிக சூடு இல்லாமல் குளிக்க வேண்டும். 

முன்பெல்லாம் 80 வயதுக்கு மேல் உள்ளவர்களுக்குதான் கண்புரை பிரச்னைகள் இருந்தது. ஆனால், சர்க்கரைநோயின் காரணமாக தற்போது 40 வயதுகளிலேயே கண்புரை பிரச்னை ஏற்படுகிறது. இது லைப் ஸ்டைல் மாற்றத்தாலும், உணவு பழக்கத்தாலும் ஏற்பட்டதுதான். எனவே, இவர்கள், உணவு பழக்கங்களில் மிகவும் கவனமாக இருக்க வேண்டும். 

தொடர் தலைவலி இருப்பவர்கள், சைனசைடிஸ் பிரச்னை உள்ளவர்களுக்கும் கண்கள் பாதிக்கும் வாய்ப்புகள் அதிகம். எனவே, அடிக்கடி தலைவலி வருகிறது என்றால், உடனடியாக மருத்துவ ஆலோசனைப் பெற்று அதற்கு சிகிச்சை எடுத்துக் கொள்ள வேண்டும். 

வெல்டிங் வேலை செய்பவர்கள், இரவு நேரங்களில் வண்டியை இயக்கும் டிரைவர்கள் இவர்கள் எல்லாம் கண்களை பாதிக்காமல் இருக்க கண்ணாடிகளை பயன்படுத்த வேண்டும். இவர்கள் ஒருமணி நேரத்திற்கு ஒருமுறை சுத்தமான குளிர்ந்த தண்ணீரால் கண்களை கழுவ வேண்டும். 

இப்படி செய்வதனால், கண்கள் அதிகம் பாதிக்கப்படாமல் தவிர்க்கலாம்.