ரத்தப்புற்றுநோய், ஹெச்.ஐ.வி. போன்றவற்றால் பாதிப்படைந்தவர்களுக்கு எலும்புமஜ்ஜை மாற்று அறுவைசிகிச்சையை செய்கின்றனர். மேலும், உயிருக்கு ஆபத்தான பல்வேறு நோய்களில் இருந்தும் எலும்பு மஜ்ஜை மாற்று அறுவைசிகிச்சை காக்கிறது. 

உதாரணமாக, அமெரிக்காவில் பல வருடங்களாக ஹெச்.ஐ.வி. தொற்று இருந்தவர்கள் இரண்டு பேருக்கு எலும்பு மஜ்ஜை மாற்று சிகிச்சை அளிக்கப்பட்டதை அடுத்து, அவர்கள் உடலில் இருந்து இக்கிருமி முற்றிலும் நீங்கிவிட்டதாக கூறப்படுகிறது. 

இந்த எலும்புமஜ்ஜை மாற்று என்பது என்ன.. அதன் பணி என்ன போன்றவற்றை நம்முடன் பகிர்ந்து கொள்கிறார் எலும்பு மஜ்ஜை சிகிச்சை நிபுணர் மருத்துவர் எம்.பி.ராம்பிரபு. 

ஒவ்வொருவருக்கும் எலும்பினுள்ளே பஞ்சு போன்ற ஒரு திசு இருக்கும். அதைத்தான் எலும்பு மஜ்ஜை என்று அழைக்கிறோம். இந்த எலும்பு மஜ்ஜையிலிருந்துதான் ரத்த செல்கள் உருவாகிறது. 

இந்த ரத்த செல்களில் மூன்று வகைகள் இருக்கிறது. சிவப்பு ரத்த அணுக்கள், வெள்ளை ரத்த அணுக்கள் மற்றும் பிளேட்லெட்ஸ் .இதில், நாம் சுவாசிக்கும் காற்றில் உள்ள ஆக்ஸிஜனை நுரையீரல் வழியாக மற்ற பாகங்களுக்கு எடுத்துச் செல்லும் பணியை சிவப்பு ரத்தஅணுக்கள் செய்கிறது. 

உதாரணமாக, பிறந்த குழந்தை அனிமீக்காக இருந்தால், அதன் எலும்புமஜ்ஜையைப் பரிசோதித்து, அவற்றில் ஏதேனும் குறைபாடு இருந்தால் அதாவது தலசீமியா என்று குறிப்பிடப்படும் குறைபாடு இருந்தால், மாற்று எலும்புமஜ்ஜையை அந்த குழந்தையின் ரத்த தொடர்புடையவரிடமிருந்து பெற்று சிகிச்சை செய்து, அந்த குழந்தையை காப்பாற்றுவார்கள்.

எலும்புமஜ்ஜை புற்றுநோயை பொருத்தவரை, ரத்தபுற்று நோய் என்றுதான் சொல்வோம். இந்த ரத்தபுற்று நோய் பெரும்பாலும், பத்து வயதிலிருந்து 20 வயதுக்குட்பட்ட குழந்தைகளை அதிகளவில் பாதிக்கும் ஒருசிலருக்கு முப்பதிலிருந்து ஐம்பது வயதிற்குள் வரலாம். 

இது பரம்பரை காரணமாக வரலாம் அல்லது மரபணு குறைபாட்டினால் வரலாம் அல்லது கதிர்வீச்சுகளால் வரலாம். சுற்றுசூழலில் கலந்து வரும் ரசாயன மாசுகளால் ஏற்படலாம். 

அதாவது, தண்ணீர், உண்ணும் உணவுகள் மூலமும் கலந்து வரும் ரசாயனங்களால் ஏற்படுவது. இந்த ரத்தபுற்று நோய் ஏற்படும்போது, நார்மலாக உள்ள எலும்புமஜ்ஜை அழியத் தொடங்கிவிடும். 

இது அழியும்போது, உடலில் உள்ள ரத்த அணுக்கள் குறைந்து உயிருக்கு ஆபத்தாகிவிடும். அதுபோன்று பிளேட்லெட் குறையும்போது, ரத்தம் உறையாமல், மூக்கு,வாய் வழியாக ரத்தம் வெளியே வருவது போன்றவை ஏற்படும்.. 

எலும்புமஜ்ஜையினால் ஏற்படும் ஒவ்வொரு நோய்க்கும் ஒவ்வொருவிதமான சிகிச்சை முறைகள் இருக்கும். உதாரணமாக, ரத்தபுற்று நோய் பொருத்தவரை, கீமோ தெரபி சிகிச்சை அளிக்கப்படும். இதன் மூலமே பலர் குணமாகிவிடுவார்கள். இந்த ரத்த புற்றிலேயே 3 வகைகள் இருக்கிறது. 

ஒன்று அக்யூட் லுக்கிமியா, குரோனிக் லுக்கிமியா என இரண்டு விதம் இருக்கிறது. இந்த ஆக்யூட் லுக்கிமியா என்பது உடனடி அறிகுறிகளை காண்பித்துவிடும். குரோனிக் லுக்கிமியா மெது மொதுவாகதான் அறிகுறிகளை காண்பிக்கும். இதற்கு பெரும்பாலும் கீமோ தெரபி சிகிச்சைகள் அளிக்கப்படும். அதுவே, சற்று முற்றிய நிலையில் இருப்பவர்கள்தான் எலும்புமஜ்ஜை டிரான்ஸ்பிளாண்ட் செய்யப்படும். 

அதாவது, எலும்புமஜ்ஜை மாற்று அறுவைசிகிச்சை செய்யப்படும். இப்போது நவீன சிகிச்சை முறைகள் வந்துவிட்டதால், ஸ்டெம்செல் மாற்று சிகிச்சையே பெரும்பாலும் வழங்கப்படுகிறது. அதாவது, முன்பெல்லாம் எலும்புமஜ்ஜை எடுத்து மாற்று அறுவைசிகிச்சை செய்தார்கள். இப்போது, ரத்தத்திலிருந்து ஸ்டெம்செல்களை பிரித்து எடுத்து மாற்று அறுவை சிகிச்சை செய்கிறோம். 

எலும்புமஜ்ஜை தானத்தை பொருத்தவரை நல்ல ஆரோக்கியத்துடன் இருக்கும் நபர்கள் யார் வேண்டுமானாலும் வழங்கலாம். ஸ்டெம்செல்கள் வழங்கலாம். அதாவது, எச்.ஐ.வி போன்ற தொற்று வியாதிகள் இருக்கக் கூடாது அவ்வளவுதான்.

எலும்புமஜ்ஜை தானம் வழங்குவதற்கென உலகளவில் அங்கீகரிக்கப்பட்ட அமைப்புகள் இருக்கின்றன. அவற்றில் பதிவு செய்து கொண்டு எலும்புமஜ்ஜை தானம் வழங்கலாம். அவர்கள் பெறப்படும் எலும்புமஜ்ஜையை பத்திரப்படுத்தி வைப்பார்கள். பின்னர், தேவைப்படுவோருக்கு வழங்குவார்கள். 

உதாரணமாக ரத்ததானம் செய்யும்போது, எப்படி ரத்தப்பிரிவு பார்த்து தானம் வழங்குகின்றோமோ, அதுபோன்று எலும்புமஜ்ஜை மாற்று செய்ய வழங்குபவர், பெறுபவர் இருவரின் டிஷூவும் பொருந்தி வர வேண்டும். அப்போதுதான் அதனை பெறுபவரின் உடல் ஏற்றுக் கொள்ளும். 

அந்தவகையில், உடன் பிறந்தவர்களாக இருந்தால் 25 சதவீதம் பொருந்தி வர வாய்ப்பு உள்ளது. அதுவே, வெளி ஆட்களாக இருந்தால், லட்சத்தில் ஒருவருக்கு அல்லது பத்து லட்சத்தில் ஒருவருக்குத்தான் பொருந்தும். அப்படி தேடி, யாருக்கு அது பொருந்தி வருகிறதோ அதை வாங்கி மாற்று அறுவைசிகிச்சை செய்வார்கள்.