இதனால் தவறான முடிவையே சரியென தீர்மானித்த நிலையில் வாழ்வை சிக்கலாக்கிக் கொள்பவர்கள் பலர்.உண்மையை நீங்கள் சான்றுகளோடு கூறினாலும் அவரைத் திருப்திப்படுத்த முடியாது. 

தகுந்த உளவியல் சிகிச்சையை மேற்கொள்வதே பேரனாய்டுக்கு சரியான  தீர்வாக இருக்கும்.உரிய காலத்தில் முறையான மனநல ஆலோசனைகளைப் பெறத் தவறினால் இந்த அவநம்பிக்கை ஆளுமைக் கோளாறானது, (PPD - Paranoid Personality Disorder) மாயத் தோற்றக் கோளாறாக ( Dilutional Disorder) உருமாறும். போலியாக ஒன்றை நம்பி மூழ்கி விடுவார்கள்.

அது மூளைச் சோர்வையும், விரக்தி மனநிலையையும் உண்டாக்கும். இத்தகைய மனநிலை உள்ளவருக்கு அவரின் பிறந்த நாளில் சஸ்பென்ஸ் ஆக ஒரு பரிசைக்கூட உடன் இருப்பவர்களால் கொடுக்க முடியாது. அவர்களுக்குத் தெரியாமல் நீங்கள் ‘கேக்’ ஆர்டர் செய்ய, ஒரு பார்ட்டியை ஏற்பாடு செய்ய முயன்று கொண்டிருப்பீர்கள். 

ஆனால் அவர்களோ எனக்குத் தெரியாமல் எங்கே சென்றாய் / யாரிடம் பேசினாய் என்று விசாரித்து, பரிசோதிக்கும் கேள்விகளால் உங்களை துளைத்து விடுவார்கள். 

இவ்வாறு அவர்களுக்கு வரவிருக்கும் நன்மையை அவர்களே கெடுத்துக் கொள்வார்கள்.இவர்கள் ஒருவகையில் பரிதாபத்திற்கு உரியவர்களே. இத்தகு பாதிப்பு கொண்டவர்களை நேரடியான கரிசனமான கவனிப்பு மூலமாகவும், உளவியல் ஆலோசனைகள் மூலமாகவும் குணப்படுத்த முயல்வது அவசியம்.

எது சரி எது தவறு  என்று முடிவெடுக்க முடியாமல் தொடர்ந்து மூளை அலைவுற்றுக் கொண்டேயிருக்கும்.சோர்வுற்ற மூளை தன்னைப் பிழைத்துக் கொள்ள,உயிரை தக்க வைக்க (Survival act ) அடுத்தவரை ஆத்திரமூட்டும். சிலநேரம் தன்னையே மாய்த்துக் கொள்ளவும் முயற்சி செய்யும். உங்களுடைய நெருங்கிய வட்டத்தில் எவரேனும் சந்தேகம் ஆட்கொண்ட மனநிலையில் இருந்தால் தாமதமின்றி அவருக்கு உதவி புரிய வேண்டும். 

சந்தேகத்திலிருந்து விடுபட வழி காட்டுவதே நல்ல மனிதமாகும். 24x7 நேரமும் மனிதர்களை எடை போட்டுக்கொண்டு இருப்பது என்று சமநிலை தவறும் பொழுது பெருங்குழப்பங்கள் விளையும் என்பதை நமக்குள்ளே நாம் சொல்லிக் கொள்வது இன்றைய சூழலில் மிகவும் அவசியம்.

மேலும் அந்த சந்தேகநோய் பணியிடம், சமூகம் என எங்கும் பரவக்கூடும். இப்படியானவரோடு வாழ்பவர் உறவில் எப்போதும் ஏமாற்றம் அடைபவராக மனவலியோடு இருக்கவும் நேரிடும். அது நாளுக்குநாள் வளர்ந்து பிரிவு,விவாகரத்து, தற்கொலை எண்ணம் போன்ற விளைவுகளை நோக்கி  நகர்த்தும். எனவே, உடனுக்குடன் தெளிவுபடுத்த வேண்டியது அவசியம். தெளிவுப்படுத்த விருப்பமில்லை, வாய்ப்பில்லை எனும் பட்சத்தில் எவருக்கும் பாதிப்பு ஏற்படாமல் நாகரீகமான பிரிவை நட்புறவோடு ஏற்கச் செய்வதே மனநலத்திற்கு உகந்தாகும். 

ஆனால் பலரும் இன்று என் விருப்பம், என் முடிவு, என் வாழ்வு, என்னைத் தவறாக நினைத்தால் என்ன,  நான் ஏன் விளக்கம் கொடுக்க வேண்டும், எதற்குப் பேச வேண்டும் என்றே இருக்கிறார்கள். இது தற்காலிகமான தப்பித்தல் வழியே அன்றி தீர்வு இல்லை.

வேறு சில ஆளுமைக்கோளாறு (Personality disorders ) கொண்டவர்கள் அடுத்தவருக்கு சந்தேகம் வரும்படியாகவே தொடர்ந்து குறிப்புகளைக் கொடுப்பது, அரைகுறைத் தகவல்களைப் பகிர்ந்து குழப்புவது என்றிருக்கிறார்கள்.

இதுவொரு எதிர்மனநிலை விளையாட்டு. அடுத்தவரை சந்தேகப்படும்படி தூண்டி, அவரின் குழப்பங்களைக் கண்டு குரூரமாகக் குளிர் காய்வார்கள். இவர்கள், தன்னுடைய அறிவு, திறமை கொண்டு பிறரை ஈர்க்க முடியாது என்று உள்ளே அவநம்பிக்கையில் தோய்ந்து குலைந்து போனவர்கள்.