மாறுது உலகம்... கெத்து காட்டுகிறது AI

Chatgptஐ விட வலிமை... வந்தாச்சு கூகுள் ஜெமினி!

‘ஜெமினி’ என்றாலே எஸ்.எஸ்.வாசனின் சினிமா தயாரிப்பு நிறுவனமும், நடிகர் ஜெமினி கணேசனுமே நம் நினைவிற்கு வருவார்கள். ஆனால், இப்போது அதனுடன் ஒரு செயற்கை நுண்ணறிவும் சேர்ந்திருக்கிறது!ஆம். பிரபல தொழில்நுட்ப நிறுவனமான கூகுள், ‘ஜெமினி’ என்ற வலிமைமிக்க மல்டிமாடல் செயற்கை நுண்ணறிவை கடந்த வாரம் அறிமுகப்படுத்தியுள்ளது. ஏற்கனவே ஓபன்ஏஐ நிறுவனம் சாட்ஜிபிடி என்ற ஏஐ மூலம் பல்வேறு பணிகளை எளிதாக சாத்தியமாக்கி வருகிறது. இந்நிலையில், கூகுள் இந்த ஏஐயை அறிமுகம் செய்துள்ளது.

இந்த சேவையானது நானோ, ப்ரோ, அல்ட்ரா (Nano,Pro,Ultra) ஆகிய மூன்று வடிவங்களில் கிடைக்கும் எனத் தெரிவித்துள்ளது. இதில் நானோவும், ப்ரோவும் செயல்பாட்டுக்கு வந்துள்ளன. அல்ட்ராவை அடுத்த ஆண்டு அறிமுகப்படுத்த இருப்பதாகத் தெரிவித்துள்ளது கூகுள் நிறுவனம். இதில் ‘ஜெமினி அல்ட்ரா’ மிகப்பெரிய, திறமையான வகையைச் சார்ந்தது. ‘ஜெமினி ப்ரோ’ பரந்துபட்ட அளவிலான பணிகளைச் செய்கிறது. ‘ஜெமினி நானோ’ குறிப்பிட்ட பணிகள் மற்றும் மொபைல் சாதனங்களுக்குப் பயன்படுத்தும் வகையில் வடிவமைக்கப்பட்டுள்ளது.

ஏஐ மூலம் நம் பணிகளை எல்லாம் எளிதாக்கிக் கொள்ளலாம்; எந்த ஒரு விஷயத்தையும் வேகமாகச் செய்யமுடியும்; எதிர்காலம் ஏஐ காலம் என்றெல்லாம் சொல்லப்பட்டுவரும் நிலையில் கூகுள் ஜெமினி முக்கியமானதாகப் பார்க்கப்படுகிறது. இதுகுறித்து ஏஐ நிபுணர் ஐ.எஸ்.ஆர் செல்வகுமாரிடம் பேசினோம். ‘‘மனித நுண்ணறிவு - அதாவது நாம் யோசிப்பது, கற்பனை செய்வது, படைப்பது உள்ளிட்ட இன்டலிஜென்ஸ் விஷயங்களை இயந்திரங்கள் மூலம் சாத்தியப்படுத்துவதே செயற்கை நுண்ணறிவு. இதைத்தான் ஓபன்ஏஐ நிறுவனம் சாட்ஜிபிடி மூலமும், கூகுள் நிறுவனம் ஜெமினி மூலமும் நமக்கு வழங்குகின்றன.

கூகுள் நிறுவனம் கடந்த 2000ம் ஆண்டில் இருந்தே இந்தச் செயற்கை நுண்ணறிவுக்கான பணிகளை முன்னெடுத்திட்டு வர்றாங்க. இதற்காக ‘கூகுள் ப்ரைன்’ (Google Brain), ‘டீப் மைண்ட்’ (Deep Mind)னு இரண்டு பிரிவுகளை உருவாக்கினாங்க. இவை ஏஐ தொழில்நுட்பத்திற்கான ஆராய்ச்சிப் பிரிவுகள். ஒருகட்டத்துல இந்த ரெண்டு பிரிவுகளையும் இணைச்சாங்க.
இதுல டீப் மைண்ட் பிரிவில் சில முன்னேற்றங்களைக் கொண்டு வந்தாங்க. அதாவது, மோட்டார் ஸ்கில்ஸ்னு சொல்வோம். உட்கார்வது, எழுந்துபோவது, நடப்பது, குதிப்பது, ஓடுவது... இதுபோல உடல் அசைவுகள் எல்லாம் மோட்டார் ஸ்கில்ஸ்ல வரும்.

அடுத்து இன்டலிஜென்ஸ். யோசிப்பது, படைப்பது உள்ளிட்டவை இதனுள் வரும். இந்த மோட்டார் ஸ்கில்ஸையும், இன்டலிஜென்ஸையும் இணைக்கிற விஷயங்களை டீப் மைண்ட் பிரிவுல மேற்கொண்டாங்க. பிறகு, இந்த ரெண்டு விஷயங்களையும் எப்படி மிஷினுக்குக் கற்றுக் கொடுப்பதுனு யோசிச்சாங்க. அதற்கு கூகுள், ஆர்.எல்னு ஒருமுறையைக் கொண்டு வந்தாங்க. அதாவது reinforcement learningனு பெயர். இதுக்கு சில இலக்குகளை நிர்ணயம் செய்தாங்க.

உதாரணத்திற்கு நாம் குழந்தைகளிடம் இந்த நேரத்திற்குள் இந்த வேலையை முடித்துவிட்டால் நீ கேட்டதை வாங்கித்தருவேன்னு சொல்வோம் இல்லையா... அதுபோல இந்தச் செயற்கை நுண்ணறிவு தொழில்நுட்பத்திற்கும் இலக்கு நிர்ணயிச்சு கத்துக்கொடுத்தாங்க.  இந்தக் கற்றலுக்குப் பிறகு அது அனுபவத்தின் வழியாக சிறந்த பயிற்சியாளராக மாறுச்சு. இதற்கு Deep Q-Network (DQN)னு பெயர் வச்சாங்க. இது நிறைய விஷயங்களை ஆர்.எல் வழியாக கத்துக்கிட்டு இன்னும் பல நெட்வொர்க்கை உருவாக்கியது.  

இப்படி டீப் மைண்ட் பிரிவு, இந்த ஆர்.எல் வழியாக டீப் க்யூ நெட்வொர்க்கை உருவாக்கி செயற்கை நுண்ணறிவைக் கொண்டு வந்தது. இதன்பிறகு பலகட்ட சோதனைக்கு இந்த ஏஐயை உட்படுத்தினாங்கஇதில் முதலாவதாக அடாரி (Atari)னு 2டி கேம்ஸ் இருக்கு. ரொம்ப சவாலான விளையாட்டு. இதுல கை,கால்களை அசைக்கணும் அதேநேரம் யோசிக்கவும் செய்யணும். இந்த செயற்கை நுண்ணறிவை ஐம்பது அடாரி கேம்ஸ்ல சோதனை செய்தாங்க. அது எல்லா விளையாட்டுகளிலும் எளிதாக ஜெயிச்சது. இதன்பிறகு, இதனை மறுஅளவீடு செய்றாங்க.