தமிழ் சினிமாவில் பெண் தொழில்நுட்பக் கலைஞர்களே மிகவும் குறைவு. அதிலும் ஆண்கள் அதிகளவில் ஆதிக்கம் செலுத்தும் ஒளிப்பதிவுத் துறையில் உள்ள பெண்களை விரல்விட்டு எண்ணிவிடலாம்.

இதில் இந்திய அளவில் குறிப்பிடத்தகுந்த பெண் ஒளிப்பதிவாளராக ஜொலிப்பவர் ப்ரீத்தா ஜெயராமன்.‘கண்ணாமூச்சி ஏனடா’, ‘அபியும் நானும்’, ‘கௌரவம்’, ‘ஹே சினாமிகா’ என பதினைந்துக்கும் மேற்பட்ட படங்களின் வழியே தமிழ் ரசிகர்களை வெகுவாக ஈர்த்தவர். அதுமட்டுமல்ல. தமிழ், இந்தி, கன்னடம், தெலுங்கு என நான்கு மொழிகளில் படுபிஸியான கேமரா வுமன் இவர். ஒளிப்பதிவாளர் பி.சி.ஸ்ரீராமின் பள்ளியில் படித்தவர்.

பி.சி சாரைப் பொறுத்தவரை அவர் ஒரு இன்ஸ்டிடியூஷன்னுதான் சொல்லணும். அவ்வளவு திறமைகள் அடங்கிய மிக எளிமையான மனிதர். ஒவ்வொரு படத்தையும் வித்தியாசமா பண்ணணும்னு அவர் மெனக்கெடும் விதம், கூட இருப்பவங்களுக்கு மட்டுமே தெரியும். இப்பவரை அப்படியேதான் தன் பணிகளைச் செய்திட்டு வர்றார்.

‘‘என்னுடைய கேரியர்ல ஆரம்ப காலத்தில் நிறைய போராட்டங்கள் இருந்துச்சு. அதையெல்லாம் கடந்து வந்துட்டேன். ஏன்னா செட்ல ரொம்ப நேரம் நிற்கணும். ஃபீல்டு வொர்க் பண்ணணும். கேமராவை  ஹேண்டில் செய்யணும். இரவு நேர ஷூட்டிங்ல பணிபுரியணும். இப்படி நிறைய இருக்கு. அடுத்து குடும்பம் முழு சப்போர்ட் செய்யணும்.

அதனால நம்பிக்கையும், தைரியமும் இருந்தால்தான் சிறப்பா பணிகள் செய்ய முடியும். அப்புறம் மற்ற துறைகள் மாதிரி இந்தத் துறையில் உடனே கைநிறைய சம்பளம் கிடைக்காது. ஒரு இடத்தைப் பிடிக்கும் போதே உங்களுக்கான அங்கீகாரம் வரும்.  அதுவரை பொறுமையா காத்திருக்கணும்.

என்னைப் பொறுத்தவரை நான் எதைப்பத்தியும் கவலைப்படாமல் சுதந்திரமா என்னுடைய வேலைகள்ல ஓடிட்டே இருந்தேன். அப்புறம் குடும்பமும் நிறைய ஒத்துழைச்சாங்க. அவங்க சப்போர்ட்டால்தான் இன்னைக்கு நான் இந்த இடத்துக்கு வந்திருக்கேன். இப்ப இந்தத் துறையில் இந்தியா முழுவதும் மொத்தத்துல 200 பெண்கள்தான் இருப்பாங்க.

நம்ம தென்பகுதியில் இன்னும் குறைவுதான். கர்நாடக மாநிலத்துல யாருமே இல்ல. நான் பெங்களூர்ல இருக்கிறதால கன்னட ஒளிப்பதிவாளர்னு நான் மட்டுமே இருக்கேன். இந்தத் துறையில் இன்னும் நிறைய பெண்கள் வந்து சாதிக்கணும் என்பதே என் ஆசை!’’ என கண்கள் மிளிர சொல்கிறார் ப்ரீத்தா!