பெண்கள் எதிர்கொள்ளும் கடுமையான காலகட்டமான மெனோபாஸ் பற்றியும் அதற்கான ஆயுர்வேதம் சொல்லும் தீர்வுகளையும், சிகிச்சை முறைகளைப் பற்றியும் சற்று விரிவாக தெரிந்து கொள்வோம்.

மெனோபாஸ் என்பது ஒரு பெண்ணின் மாதவிடாய் சுழற்சியின் இயல்பான நிறுத்தமாகும். இது பொதுவாக 45 முதல் 55 வயதுக்கு இடைப்பட்ட காலத்தில் நிகழ்கிறது. ஆயுர்வேதத்தில் மெனோபாஸ் காலம் ரஜோநிவிருதி காலம் என்று அழைக்கப்படுகிறது.

 பூப்படையும் காலத்தில் தொடங்கும் மாதவிடாய் சுழற்சியானது 45 வயதிற்கு மேல் நிற்கும்காலம் மெனோபாஸ் என்று அழைக்கப்படுகிறது. இதற்கு முந்தையகாலம் பெரிமெனோபாஸ் என்று நாம் அழைக்கிறோம். பெரிமெனோபாஸ் என்பது மாதவிடாய் நிரந்தரமாக நிற்பதற்கு முன்வரும் காலம். 

இந்த நேரத்தில் பெண்களுக்கு மூன்று முதல் ஆறு மாதங்களுக்கு ஒருமுறை மட்டுமே மாதவிடாய் வரும். அப்படியே வந்தாலும் அது இயற்கைக்கு மாறாக ரத்தப்போக்கு மிகவும் குறைவாகவோ அல்லது நாள் கணக்கில் மிகுந்தோ குறைந்தோ காணப்படும். இது பொதுவாக மூன்று முதல் நான்கு ஆண்டுகள் வரை நீடிக்கும். சில சமயங்களில் 10 ஆண்டு வரை கூட ஆகலாம்.

பெரிமெனோபாஸுக்கு, கண்டறியும் சோதனை எதுவும் இல்லை. இந்த காலத்தில் பாலின ஹார்மோன்களின் அளவுகள் ஏற்ற இறக்கம் கொண்டிருக்கும். 

மாதவிடாய் முற்றிலுமாக நின்ற பிறகு இந்த ஹார்மோன்களின் அளவு படிப்படியாக குறைகிறது. மெனோபாசும் சரி பெரிமெனோபாசும் சரி - இவை வாழ்க்கையின் இயற்கையான நிலைகளாக பார்க்க வேண்டுமே தவிர இது ஒரு நோயல்ல என்பதை உணர்ந்து செயல்பட வேண்டும். சில பெண்கள் இந்த கட்டத்தில் மன அழுத்தத்திற்கு உள்ளாகிறார்கள். இந்த நிலையை பக்குவமாக எதிர்கொண்டால் எளிதில் கடந்து விடலாம்.

இந்நிலை பற்றிய விழிப்புணர்வு மிகவும் அவசியம். அறிகுறிகள் லேசானவையாக இருந்தால் வாழ்க்கைமுறை மாற்றங்களுடன் எண்ணெய் மசாஜ் போன்றவை போதுமானதாக இருக்கும். மருத்துவ சிகிச்சை தேவையில்லை. ஆனால் கடுமையான அறிகுறிகள் இருந்தால் சிகிச்சை தேவைப்படும்.மாதவிடாய் நிறுத்தம் என்பது இயற்கையான நிலையாக இருந்தாலும் அதற்கு வேறு சில வியாதிகளும், மருத்துவமுறைகளும் காரணங்களாக இருக்கலாம். 

அறுவைசிகிச்சை முறைகள் மற்றும் புற்றுநோய் சிகிச்சைகள் பொதுவாக மாதவிடாய் நிறுத்தத்தைத் தூண்டுகின்றன. மேலும் கீமோதெரபி மற்றும் கதிர்வீச்சு சிகிச்சை ஆரோக்கியமான கருப்பை செயல்பாட்டை கணிசமாக பாதிக்கும். எனவே, இந்த சிகிச்சைகள் மாதவிடாய் நிறுத்தத்தைத் தூண்டக்கூடும்.

 மாதவிடாய் நிறுத்தத்தைப் பற்றி நாம் அறிந்தாலும் இந்த நிலையை அடையும்போது அமைதியாகவும், பக்குவமாகவும் இருப்பது அவசியம்.கடுமையான மாதவிடாய் காலங்களை அனுபவித்த பல பெண்களுக்கு நிரந்தர மாதவிடாய் நிறுத்தம் ஒரு பெரிய நிவாரணம் தருகிறது.

தாம்பத்தியத்தின் போது சி ல பெண்கள் கருத்தடை மாத்திரைகளை தொடர்ந்து பயன்படுத்துகிறார்கள், இதனால் பல உபாதைகளை சந்திக்கின்றனர். ஆனால் மாதவிடாய் நிறுத்தத்திற்கு பிறகு அவற்றின் தேவை இருப்பதில்லை. அவர்கள் தங்கள் பாலியல் வாழ்க்கையை மகிழ்ச்சியுடன் கழிக்க முடியும்.