இந்தியாவின் வடகிழக்கு மாநிலங்களில் ஒன்று நாகலாந்து. விவசாயம், கனிமங்கள், கால்நடைகள், தொழில்துறைகள் என பொருளாதாரப் பின்புலம் கொண்ட மாநிலமான இது, இப்போது ட்ரை ஃப்ளவர்ஸ் எனப்படும் உலர் பூக்கள் தொழிலில் ஜொலிக்க ஆரம்பித்துள்ளது.

இதில் குறிப்பாக பெண் தொழில்முனைவோர்கள் நிறைய பேர் உருவாகத் தொடங்கியிருப்பது நாகலாந்து மாநிலத்தைப் பலரையும் திரும்பிப் பார்க்கச் செய்துள்ளது. இதற்குக் காரணம் நாகலாந்தில் இயற்கையாகவே கிடைக்கும் சில வகை பூக்கள்தான்.

இந்தியாவில் உலர் பூக்கள் தொழில் மையங்களாக தமிழகத்தின் தூத்துக்குடி, கேரளாவின் கொச்சி, மேற்கு வங்காளத்தின் கொல்கத்தா ஆகிய நகரங்கள் உள்ளன.இந்தப் பூக்களுடன், கட் கிரீன்ஸ் (பொக்கேவில் வைக்கப்படும் இலைகள்) எனப்படும் பச்சை இலைகள் உள்ளிட்டவற்றின் உற்பத்தியை மகாராஷ்டிரா, கேரளா, கர்நாடகா, உத்தரகாண்ட் மற்றும் வடகிழக்கு மாநிலங்கள் மேற்கொள்கின்றன. 

 அதுமட்டுமல்ல. இந்தியா உலர் பூக்கள் தொழிலில் உற்பத்தி மற்றும் ஏற்றுமதியில் உலக அளவில் முன்னணியில் உள்ளதும் குறிப்பிடத்தக்கது. குறிப்பாக ஏற்றுமதியில் 320 கோடி ரூபாய் பங்களிப்பை வழங்கும் துறையாக இது மிளிர்கின்றது.  

டிஜூவினு டேட்ஸோ என்ற பெண்மணி இந்த உலர் பூக்கள் தொழில் தன் வாழ்க்கையை மாற்றியதாகக் குறிப்பிடுகிறார். ‘‘ஆரம்பத்தில் காய்கறிகள் விற்கும் தொழில் செய்து வந்தேன். பிறகு, 2021ல் பூ விற்பனை வணிகத்திற்குள் வந்தேன். முதலில் அன்று மலர்ந்த ஃப்ரஷ் பூக்களை மட்டுமே விற்க ஆரம்பித்தேன். 

ஆனால், பூக்கள் விரைவாக அழுகி அதில் நிறைய நஷ்டத்தைச் சந்தித்தேன். இந்நிலையில்தான் உலர் பூக்கள் தொழிலுக்குள் வந்தேன். இப்போது எந்த நஷ்டமும் ஏற்படுவதில்லை. ஆண்டு முழுவதும் எனது தொழில் சிறப்பாக நடக்கிறது. சுற்றுலாப் பயணிகளும், வாடிக்கையாளர்களும் இந்தப் பூக்களை வாங்கிச் செல்கின்றனர்’’ என்கிறார் சந்தோஷமாக.

இவர் பூக்களை உலர்த்துவதற்கென்றே தனி ஷெட் வைத்துள்ளார். இதன்மூலம் தனது குடும்பத்திற்கு உதவிகரமாகவும் இருந்து வருகிறார். இதேபோல நாகலாந்து மலர் வளர்ப்போர் சங்கத்தின் துணைத் தலைவரான டெம்சுயாங்லா பொன்ஜென் என்ற பெண்மணி பல ஆண்டுகளாக இந்தப் பூத்தொழிலில் இருப்பவர். தற்போது இன்டோர் பிளான்ட்ஸ் எனப்படும் உட்புற அழகுச் செடிகளில் அதிக கவனம் செலுத்துகிறார். 

‘‘இந்த இன்டோர் பிளான்ட்ஸ் அதிக டிமாண்ட் கொண்டது. உட்புற அழகுச் செடிகளையும் உலர் பூக்களையும் நன்றாகப் பராமரித்தால் நீண்டஆயுள் கொண்டு அழகாக ஜொலிக்கும். ஐந்து ஆண்டுகளுக்கு முன்பு ஒரு அரசியல்வாதிக்காக நான் உலர் பூக்களில் பூங்கொத்தை உருவாக்கிக் கொடுத்தேன். அது இன்றுவரை புதியதாகவும் அழகாகவும் அப்படியே இருக்கிறது’’ என்கிறார் அவர்.

இந்த உலர் பூக்கள் வணிகத்தைப் பெண்கள் தேர்ந்தெடுக்கக் காரணம் ஒரு தொழில்முனைவோராக இருப்பதற்கான வாய்ப்பையும், நிறைய சுதந்திரத்தையும் அது தருகிறது என்பதால்தான்.

இதற்கு ஒரு உதாரணம், ருகுனு கென்னாவ் என்ற பெண்மணி. இவர் நாகலாந்து தலைநகர் கோஹிமாவின் மாவட்ட நீதிமன்றத்தில் நான்கு ஆண்டுகள் வழக்கறிஞராக இருந்தவர். இப்போது பூக்கடை வைத்துள்ளார். 

புதிய பூக்கள் மற்றும் உலர் பூக்கள் இரண்டையும் விற்பனை செய்கிறார். இவரைப் போல பல பெண்கள் இந்த வணிகத்திற்குள் வந்துள்ளனர்.