சண்டிகார் வி.நிலையத்திற்கு வெளியே எங்களுக்காக பெரிய சைஸ் முயல்களாய் இரண்டு வெள்ளை இன்னோவா கார்கள் காத்திருந்தன. அதன் பஞ்சாபி ஓட்டுனர்கள் இருவரும் (டர்பன் கட்டி ஒருவர், கட்டாமல் ஒருவர்) தமிழ் முறைப்படி கைகூப்பி வணக்கம் வைத்தபோது, ஆஹா, தமிழறிந்த ஓட்டுனர்கள் என்பதால் பயணம் முழுக்க நிறைய உரையாடி அதிகமான தகவல்கள் அறிந்துகொள்ளலாம் என்கிற என் எண்ண பலூன், “க்யா சாப்... ஆப் கைஸே ஹை?’’ என்கிற கேள்வியால் ஊசி குத்தப்பட்டது.தமிழ் நஹி மாலுமாம். இந்தி, பஞ்சாபி மட்டுமே மாலுமாம். 

இங்கிலீஷ் குச் குச் மாலுமாம். ஓட்டுனர் கவி பல்ராம்சிங் (டர்பன் கட்டியவர்.) நேற்று, நாளை என்பதற்கு யெஸ்டர்டேயையும், டுமாரோவையும் மாற்றி மாற்றி சொல்லி பயணம் முழுதும் குழப்(ம்)பினார்.

சமீபமாக கொேரானா வழங்கிய ஏராளமான வெட்டி நேரத்தில் இணையம் வழியாக இந்தி படிக்க மீண்டும் உந்துதல் ஏற்பட்டு பெங்களூரில் வாழும் ஒரு அம்மிணியைப் பிடித்தேன். முழுத் தொகையையும் கட்டியதும் இந்தியின் அணா, ஆவண்ணாவில் ஆரம்பித்தார். 

எனக்கு எழுதப் படிக்க அவசியமில்லை. வழங்கு இந்தி அதாவது பேச, புரிந்துகொள்ளும் இந்தி மட்டும் கற்றுத்தந்தால் போதும் என்று நான் எத்தனை கெஞ்சியும்... அந்தப் பண்டிட் ஏற்கவில்லை. எழுதப் படிக்க கற்றுக்கொண்டு, பிறகு பேச்சு வழக்கிற்கு வரலாம் என்று ஸ்ட்ரிக்ட்டாய் இருந்தார்.

வீடியோ வகுப்பு என்பதால் ஃபிரேமுக்கு வெளியே குனிந்துதான் கொட்டாவி விடுவேன். ஹோம் வொர்க் வேறு கொடுத்தார். அவர் மொபைல் போனை ஒரு ஸ்டாண்டில் வைக்காமல் கையில் பிடித்தபடியே பாடம் நடத்துவதைப் பார்த்து அமேஸான் மூலம் ஒரு ஸ்டாண்ட் பரிசனுப்பிய கையோடு முழுமையாக கட்டடித்துவிட்டேன். முடியல!

அந்த ஹோட்டலில் திரும்பின பக்கமெல்லாம் ஓர் அறிவிப்பு ஒட்டியிருந்தார்கள். அது: ‘குரங்குகளின் தொல்லை இருக்கலாம் என்பதால் அறையின் கதவையோ, ஜன்னல் கதவுகளையோ திறந்துவைக்காமல் எச்சரிக்கையுடன் இருக்கவும்’! 

இந்தக் குரங்கு மேட்டர் ஹோட்டலில் ஏற்கெனவே தங்கியவர்களின் கருத்துக்களில் இல்லையே என்றார் மாப்பிள்ளை. (தங்கியவர்களின் கருத்துக்கள் என்கிற பகுதியிலும் அந்தந்த ஹோட்டல்காரர்களே கள்ளக் கருத்துக்கள் பதிவு செய்யும் மற்றும் ஒரு ஃபிராடுத்தனம் உண்டு என்பதறிக! அவர்களின் இணையதளத்தில் போட்டிருக்கும் படங்கள் சிலரின் இள வயது முகநூல் படங்கள் போல ஹோட்டல் துவங்கிய முன்னொரு காலத்தில் எடுக்கப்பட்டதாக இருக்கும்).

கடல் மட்டத்திலிருந்து 7238 அடி உயரத்தில் அமைந்திருக்கிறது சிம்லா. 

ஊட்டியைவிட (7350) கொஞ்சம் குள்ளம். கொடைக்கானலை (7200) விடவும் கொஞ்சம் உயரம். கிளைமேட் இரவில் 12 டிகிரி சென்டிகிரேடும் பகலில் 22 டிகிரியும் இந்த சீசனில் இருப்பதால் இரவில் அவசியமாக கம்பளி ஆடைகள் தேவைப்படும். பகலில் அணியலாம். அணியாமலும் இதமான குளிரை அனுபவிக்கலாம்.

குஃப்ரியில் இருந்து இருபது நிமிடங்கள் குதிரையில் பயணம் செய்துதான் ஜிப்லைன் போன்ற சாகச விளையாட்டுகள் நிறைந்த பகுதிகளுக்கு வர இயலும். கிட்டத்தட்ட இருநூறு, முன்னூறு குதிரைகள் போய், வரும் அந்தச் சாலையின் மொத்த அகலமே சில இடங்களில் அதிகபட்சம் பனிரெண்டடி மட்டுமே இருக்கும். 

அந்தப் பனிரெண்டு அடி மோசமான பாதைதான் போகிற வருகிற எல்லாக் குதிரைகளுக்குமான ஒரே பாதை. அந்தப் பாதையோ சீராக அமைத்து தார் போடப்பட்ட சாலை அல்ல! மேடும், பள்ளமுமாக, ஏற்றமும் இறக்கமுமாக மலைகளில் ட்ரெக்கிங் போகும் பாதை போன்ற கடினமான பாதை.